ءبىزدىڭ بۇرىمدىلار كلۋبتىق دەڭگەيدەگى جارىستاردا تابىستى ونەر كورسەتىپ جۇرگەنىن جانكۇيەرلەر جاقسى بىلەدى. ءار جىلدارى الماتىنىڭ «راحاتى» (2004, 2007 جىلدارى), وسكەمەننىڭ «التايى» (2021) مەن پەتروپاۆلدىڭ «قۋانىشى» (2022) ازيانىڭ كلۋبتىق چەمپيوناتىندا باس جۇلدەنى ولجالاعانى جوعارىدا ايتىلعان ءسوزىمىزدىڭ ايقىن دالەلى. ودان بولەك, تالدىقورعاننىڭ «جەتىسۋى» ەكى مارتە (2010, 2013) جانە «التاي» ءبىر رەت (2022) فينالدا ۇتىلىپ, كۇمىس مەدالدى يەلەندى. قولاعا قول سوزعانداردىڭ ساناتىندا «راحات» (2002) پەن «جەتىسۋ» (2011, 2014) بار. سارى قۇرلىقتىڭ كىل مىقتىلارى جينالعان ءدۇبىرلى دودادا وسىنشاما جۇلدە الۋ, ارينە, از ولجا ەمەس.
ال قازاقستاننىڭ ۇلتتىق قۇراماسى ءوز تاريحىندا تەك ءبىر رەت ولجاعا كەنەلدى. اتاپ ايتساق, 2005 جىلى قىتايدىڭ تايتسان قالاسىندا جالاۋى جەلبىرەگەن جارىستا جەرلەستەرىمىز ءوز توبىندا ەكىنشى ورىن الدى. ءبىزدىڭ قىزدار العاشقى ءتورت ويىندا تايلاند (3:0), گونكونگ (3:0), فيليپپين (3:1) جانە سولتۇستىك كورەيانى (3:2) ۇتقانىمەن, سوڭعى تۋردا قىتاي ەلىنىڭ وكىلدەرىنە (0:3) جول بەردى. شيرەك فينالدا تايپەيدى (3:1) تىزە بۇكتىردى. جارتىلاي فينالدا جاپونيامەن جولىمىز قيىستى. اسا شيەلەنىستى وتكەن ويىندا ۆياچەسلاۆ شاپراننىڭ شاكىرتتەرى 3:2 ەسەبىمەن قارسىلاستارىنىڭ ۋىسىنان جەڭىستى ج ۇلىپ اكەتتى. وكىنىشكە قاراي, فينالدا قايتا قىتايعا (0:3) ەسە جىبەردى. ناتيجەسىندە, قازاقستاننىڭ ۆولەيبولشىلارى كۇمىسپەن كۇپتەلدى. سودان بەرى باقانداي 18 جىل ءوتتى. بىراق تايتسانداعى كورسەتكىشتى ءالى دە قايتالاي الماي كەلەمىز.
جالپى, ازيا چەمپيوناتى 1975 جىلدان بەرى ۇزدىكسىز ۇيىمداستىرىلىپ كەلەدى. وسىعان دەيىن اتالعان جارىستىڭ جالاۋى 20 مارتە جەلبىرەدى. سول ارالىقتا مولىنان ولجاعا كەنەلگەن قىتاي قۇراماسى. قىتاي ەلىنىڭ ويىنشىلارى 13 رەت التىننان القا تاقتى. باس جۇلدەنىڭ بەسەۋى جاپونيانىڭ قىزدارىنا بۇيىردى. تايلاند ەكى رەت جەڭىس تۇعىرىنىڭ ەڭ بيىك ساتىسىنا كوتەرىلدى. جوعارىدا اتالعان مەملەكەتتەردەن بولەك, وڭتۇستىك كورەيانى دا اتاپ وتسەك, ەش ايىبى جوق. ولاردىڭ قورجىنىندا 7 كۇمىس پەن 10 قولا مەدال بار. وعان قازاقستاننىڭ ءبىر كۇمىسىن قوسىڭىزدار. ياعني اتالعان جارىستىڭ تاريحىندا نەبارى بەس مەملەكەتتىڭ وكىلدەرىنە عانا جۇلدە الۋ باقىتى بۇيىرعان ەكەن.
وسىنىڭ الدىنداعى ازيا چەمپيوناتى 2019 جىلى وڭتۇستىك كورەيانىڭ استاناسى – سەۋلدە ءوتتى. ول كەزدە دە قازاقستاننىڭ بۇرىمدىلارى بەسىنشى ورىندى قاناعات تۇتتى. ءبىرىنشى كەزەڭنىڭ توپتىق تۋرنيرىندە اۋستراليا (3:0) مەن ءۇندىستاندى (3:1) ۇتىپ, جاپونياعا (0:3) جول بەردى. ەكىنشى كەزەڭدە قىتاي (0:3) مەن جاپونيادان (0:3) جەڭىلىپ, يندونەزيانى (3:0) ۇتتى. بەسىنشى ورىن ءۇشىن باسەكەدە تايپەيدى (3:1) ءسۇرىندىردى. سەۋلدەگى جارىستا باس جۇلدەنى جاپونيا ولجالادى. فينالدا جاپوندار تايلاندتان باسىم تۇسسە, كورەيالىقتار قولا مەدالدى مويىندارىندا جارقىراتتى. ال اتاعى جەر جارعان قىتاي ۆولەيبولشىلارى ءتورتىنشى ورىندا قالىپ قويدى.
