«ادام قۇقىعىن قورعاۋ سالاسىندا ماڭىزدى قادامدار جاسالدى. ادىلدىكتى جانە زاڭ ۇستەمدىگىن ورناتۋ ءۇشىن اۋقىمدى جۇمىس جۇرگىزىلىپ جاتىر. شەشىم قابىلداۋ ۇدەرىسىنە ازاماتتاردىڭ قاتىسۋ مۇمكىندىگى ارتتى. قوعامنىڭ ساياسي مادەنيەتى مۇلدە جاڭا سيپاتقا يە بولدى», دەپ پرەزيدەنت وسى جولداۋىندا اتاپ كورسەتكەندەي, قازىرگى كۇندە جاڭا قازاقستان قۇرۋعا بەت بۇرعان ەلىمىزدە الدىمەن ادىلدىكتى تۇعىر ەتكەن زاڭ ۇستەمدىگىن ورناتۋدىڭ ماڭىزى زور. ويتكەنى, ازاماتتىق قوعام, ادام قۇقىعى تاۋەلسىز مەملەكەتىمىز ءۇشىن باستى ورىندا.
بارشاڭىزعا بەلگىلى وتكەن جىلى مەملەكەت باسشىسىنىڭ باستاماسىمەن رەسپۋبليكامىزدا جاڭادان اباي, ۇلىتاۋ جانە جەتىسۋ وبلىستارى ءوز الدىنا بولەك ەنشىسىن الدى. قاسىم-جومارت كەمەل ۇلىنىڭ بۇل باتىل قادامى دا حالىقتىڭ كوكەيىندەگىسىن ءدوپ باسىپ, قوردالانعان الەۋمەتتىك ماسەلەلەردىڭ وڭىنان شەشىلۋىنە جول اشتى. سول تۇرعىدا ءبىزدىڭ سالانىڭ ماماندارىنا دا ۇلكەن جاۋاپكەرشىلىك جۇكتەلىپ, وبلىستاعى 17 باسقارمانىڭ قاتارىندا 2022 جىلدىڭ 24 ماۋسىمىندا اباي وبلىستىق ادىلەت دەپارتامەنتى قۇرىلدى.
سودان بەرگى ءبىر جىل ىشىندە قابىلداۋىمىزعا كەلگەن ازاماتتاردىڭ قۇقىقتىق-زاڭدىق تۇرعىدان قوعامداعى ورنىن ايقىنداۋ, ولارعا دۇرىس باعىت-باعدار بەرۋ تۇرعىسىندا اۋقىمدى جۇمىس اتقارىلىپ جاتقاندىعىن ايتا كەتكەن ارتىق بولماس.
پرەزيدەنت جولداۋىنا زەر سالا قاراساق, الدىمەن ازاماتتىق سانانى جاڭا بەلەسكە كوتەرۋگە شاقىرادى. «بارىنە بىردەي مۇمكىندىك بەرەتىن وركەنيەتتى ەل – ادىلەتتى قازاقستاندى قۇرامىز. زاڭ جانە ءتارتىپ, ءوزارا تۇسىنىستىك, تىلەكتەستىك پەن جاۋاپكەرشىلىك بارىنەن بيىك تۇراتىن ءتيىمدى مەملەكەت بولامىز. قوعامدىق ءتارتىپتى بۇزاتىن كەز كەلگەن ارانداتۋشىلىق ارەكەتكە قاتاڭ توسقاۋىل قويۋ قاجەت. وكىنىشكە قاراي, قۇقىق قورعاۋ مەكەمەلەرى جانە ايماق باسشىلارى وسى جۇمىستى دۇرىس اتقارماي وتىر. باسقا سوزبەن ايتقاندا, زاڭ ۇستەمدىگىن قامتاماسىز ەتپەيدى. سونىڭ سالدارىنان قوعامىمىزدا ۇدايى كەلەڭسىز وقيعالار بولىپ جاتادى», دەپ بۇكپەسىز شىندىقتى ءدوپ باسىپ ايتقان.
پرەزيدەنت جولداۋىندا بارلىق سالا بويىنشا قامتىلعان ماسەلەلەردى تۇبەگەيلى ءارى دۇرىس شەشىلۋىن جۇزەگە اسىرۋ ءۇشىن زاڭ ۇستەمدىگىن ورناتۋعا بەلسەندى ۇلەس قوسۋ ءار ازاماتتىڭ پارىزى.
جانبولات ساماشەۆ,
اباي وبلىسى ادىلەت دەپارتامەنتى باسشىسىنىڭ ورىنباسارى
