فوتو: Akorda.kz
قاسىم-جومارت توقاەۆ ەكى ەلدىڭ قارىم-قاتىناسىن ودان ءارى نىعايتۋ ءۇشىن زور مۇمكىندىك پەن الەۋەت بار ەكەنىنە نازار اۋداردى.
ء«بىز البانيانى بالقان تۇبەگىندەگى وتە ماڭىزدى سەرىكتەس ەل رەتىندە قاراستىرامىز. بۇل كەزدەسۋ – ءوزارا ءتيىمدى ىنتىماقتاستىعىمىزدى نىعايتۋ ءۇشىن ناقتى ناتيجەگە قول جەتكىزۋ تۇرعىسىنان العاندا شەشۋشى ءسات. قازاقستان مەن البانيانى كوپتەگەن ورتاق دۇنيە بايلانىستىرادى. ءبىزدىڭ ەلدەرىمىزدە كوپتەگەن ۇلت پەن ءدىن وكىلدەرى مەكەن ەتەدى. سونىمەن قاتار ەكى ەل حالقىنىڭ دا باسىم كوپشىلىگى – مۇسىلماندار. بۇۇ, ەقىۇ جانە يىۇ سەكىلدى ءىرى حالىقارالىق ۇيىمدار اياسىنداعى ىنتىماقتاستىعىمىز بەن بايلانىستارىمىزدى نىعايتۋ قاجەت», دەدى مەملەكەت باسشىسى.
پرەزيدەنت استانا مەن تيرانا اراسىندا تىكەلەي اۋە قاتىناستارىن ورناتۋ قاجەت ەكەنىن ايتتى.
«تۋريزم, كولىك, ەنەرگەتيكا جانە باسقا دا سالالارداعى مۇمكىندىكتەر تۋرالى ايتا كەلە, استانالارىمىز اراسىندا تىكەلەي اۋە قاتىناسىن اشۋ مۇمكىندىگىن قاراستىرۋ قاجەت. قازاقستان ءوزارا ىنتىماقتاستىقتى دامىتۋعا نيەتتى ەكەنىن تاعى دا اتاپ وتكىم كەلەدى. ءبىز ناقتى ناتيجەلەرگە قول جەتكىزۋ ءۇشىن قولدان كەلگەننىڭ ءبارىن جاسايمىز», دەدى قاسىم-جومارت توقاەۆ.
جيىن بارىسىندا بايرام بەگاي ەكىجاقتى ىنتىماقتاستىقتىڭ قازىرگى جاي-كۇيىن جوعارى باعالادى.
ء«بىزدىڭ العاشقى كەزدەسۋىمىز ەكى ەل اراسىندا سىندارلى ديالوگ باستالعانىن كورسەتەدى. البانيا مەن قازاقستان اراسىنداعى قارىم-قاتىناستى كەڭەيتۋ, سونداي-اق ىنتىماقتاستىعىمىز بەن گۋمانيتارلىق بايلانىستارىمىزدى نىعايتۋ جونىندەگى ورتاق ماقساتقا ساي ءىس-ارەكەتتەرىمىز جالعاسادى دەپ ۇمىتتەنەمىن. سونىمەن قاتار ەكونوميكالىق ىنتىماقتاستىقتى نىعايتۋ ءۇشىن الەۋەتىمىز مول. ءبىز وسى مۇمكىندىكتى پايدالانا الامىز. تاۋ-كەن, ەنەرگەتيكا, اۋىل شارۋاشىلىعى, تۋريزم جانە ينفراقۇرىلىمدىق دامۋ سالالارىنداعى ءوزارا ىنتىماقتاستىعىمىزدى نىعايتقىمىز كەلەدى», دەدى البانيا پرەزيدەنتى.
