مەملەكەت باسشىسى استانا قالاسىنىڭ اكىمىن قابىلدادى

پرەزيدەنتكە  بارلىق نەگىزگى ەكونوميكالىق كورسەتكىش بويىنشا وڭ ديناميكا بايقالاتىنى جايىندا مالىمەت بەرىلدى. بيىلعى 7 ايدا ينۆەستيتسيا كولەمى 9,2 پايىزعا ۇلعايىپ, 678,5 ميلليارد تەڭگەگە جەتتى. جىل سوڭىنا دەيىن جالپى سوماسى 87 ميلليارد تەڭگە بولاتىن 25 ينۆەستيتسيالىق جوبانى ىسكە قوسۋ جوسپارلانعان. ونىڭ 15 جوباسى وڭدەۋ ونەركاسىبى سالاسىندا جۇزەگە اسىرىلادى.

مەملەكەت باسشىسىنا قالانىڭ تىنىس-تىرشىلىگىن قامتاماسىز ەتەتىن نىساندار قۇرىلىسىنىڭ بارىسى تۋرالى باياندالدى. گازبەن جىلىتۋ ستانتسيالارى مەن 3-جەو الداعى جىلىتۋ ماۋسىمىندا ىسكە قوسىلادى دەپ جوسپارلانىپ وتىر. ولار ساعاتىنا 1100 گكال جىلۋ بەرەدى. بۇل ەلوردادا جىلۋ ەنەرگياسىنا دەگەن سۇرانىستى ارتىعىمەن قامتاماسىز ەتۋگە ىقپال ەتەدى. 

بۇدان بولەك, قالا اكىمى الەۋمەتتىك نىساندار سالۋ (مەكتەپتەر, جەڭىلدىكپەن بەرىلەتىن قولجەتىمدى تۇرعىن ۇيلەر, مەديتسينالىق ورتالىقتار), ۇزاققا سوزىلعان قۇرىلىستاردى اياقتاۋ, اپاتتى جاعدايداعى جانە ەسكى ۇيلەردى بۇزۋ, تۇرعىن ءۇي الاپتارىن دامىتۋ, قالانى اباتتاندىرۋ جانە كوگالداندىرۋ جايىندا ايتتى. سونداي-اق بيىلعى وقۋ جىلىندا استانادا 11 مەكتەپ سالىناتىنىن, ونىڭ تورتەۋى قازىر جۇمىس ىستەپ جاتقانىن جەتكىزدى. «جايلى مەكتەپ» ۇلتتىق جوباسى اياسىندا 2024-2025 جىلدارى 90 مىڭعا جۋىق وقۋشىعا ارنالعان 24 مەكتەپ سالىنادى.  ونىڭ 15-ءى قارقىندى دامىپ كەلە جاتقان ەسىل جانە نۇرا اۋداندارىندا بوي كوتەرمەك.

پرەزيدەنت قاسىم-جومارت توقاەۆ قالانىڭ الەۋمەتتىك جانە ينجەنەرلىك ينفراقۇرىلىمىن ودان ءارى دامىتۋعا, جىلىتۋ ماۋسىمىنا دايىندىعىنا جانە اباتتاندىرۋ جۇمىستارىنا قاتىستى بىرقاتار تاپسىرما بەردى.