ماۋلەن اشىمباەۆ ەرەكشە قاجەتتىلىكتەرى بار ازاماتتاردى قولداۋ جانە كەدەرگىسىز ورتا قالىپتاستىرۋ ەلىمىزدىڭ الدىندا تۇرعان نەگىزگى مىندەتتەردىڭ ءبىرى ەكەنىن اتاپ ءوتتى.
«مەملەكەت باسشىسى ينكليۋزيۆتى دامۋ ماسەلەلەرىنە ءاردايىم باسا ءمان بەرىپ كەلەدى. ادىلەتتى قازاقستان دەگەنىمىز دە بارشاعا تەڭ مۇمكىندىك جاساۋعا تابان تىرەيتىنى انىق. وسى رەتتە بوچچادان ءوتىپ جاتقان وسىنداي سايىستار قازاقستاندا ينكليۋزيۆتى قوعام قۇرۋعا ءوز ۇلەسىن قوسىپ وتىر دەپ ايتۋعا تولىق نەگىز بار. الداعى ۋاقىتتا دا ءبارىمىز بىرلەسىپ, ۇلكەن ناتيجەلەرگە قول جەتكىزەمىز دەپ سەنەمىن», دەدى م.اشىمباەۆ.
سونىمەن قاتار سەنات سپيكەرى ەلىمىزدە اتالعان سپورت ءتۇرىنىڭ قولعا الىنعانىنا كوپ ۋاقىت وتپەسە دە, ايتارلىقتاي ناتيجەلەرگە قول جەتكىزىپ ۇلگەرگەنىن تىلگە تيەك ەتتى. سونداي-اق ول ينكليۋزيۆتى قوعامدى دامىتۋ ءۇشىن وسى قارقىندى جوعالتپاي ءتيىستى جۇمىستى جالعاستىرۋدىڭ ماڭىزدىلىعىنا جانە بۇل باعىتتا سەنات زاڭنامالىق دەڭگەيدە قاجەتتى قولداۋ كورسەتۋگە دايىن ەكەنىنە نازار اۋداردى.
«قازىرگى تاڭدا ەلىمىز بويىنشا 20-دان استام بوچچا ۇيىرمەسى جۇمىس ىستەيدى. ول جەرلەردە 150-گە جۋىق ەرەكشە قاجەتتىلىگى بار سپورتشى جاتتىعادى. بيىل ءبىز ۇلتتىق قۇرامامىزدى جاساقتادىق. قۇراما حالىقارالىق جارىستاردا ەلىمىزدىڭ نامىسىن قورعايدى. سپورتشىلارىمىزدىڭ ءىرى سايىستارعا قاتىسۋىنىڭ ءوزى ۇلكەن جەتىستىك. سونداي-اق بۇل – ءار ادامنىڭ ءوز مۇمكىندىكتەرىن ىسكە اسىرۋىنا جول اشاتىن تولىق ينكليۋزيۆتى قوعام قۇرۋ ىسىندەگى ماڭىزدى قادام», دەدى م.اشىمباەۆ.
