جيىنعا عىلىمدى قارىشتاپ دامىتامىن, سەرپىلىس اكەلەمىن دەگەن جاس عالىمدار جينالدى. ەرەكشە باستامالار كوتەرىپ, عىلىم جۇمىسىن جۇرگىزۋدەگى ماڭىزدى ماسەلەلەر تۋرالى ايشىقتى ويلارىن ايتتى. جيىندا اكادەميانىڭ ۆيتسە-پرەزيدەنتى اسقار جۇمادىلداەۆ: «اكادەميانىڭ 100 كۇندىك ەسەبىن مەملەكەت باسشىسى قاسىم-جومارت توقاەۆقا ۇسىندىم. ەسەپتى تاپسىراردا «قۇلاننىڭ قاسۋىنا – مىلتىقتىڭ باسۋى. قۇلاننىڭ قاسۋىن مەن دە كوردىم, ءسىز دە كوردىڭىز. ەندى مىلتىقتىڭ باسىلۋى قالدى», دەدىم. ونداعى ويىم عىلىم ىسىندەگى باستامالاردى جۇزەگە اسىرىپ, ىسكە كوشەتىن ءسات كەلدى دەۋ ەدى. ال ىسكە كوشۋ ءۇشىن عالىمداردىڭ باسى قوسىلىپ, ءۇنى جارقىن شىعۋى قاجەت. وسى جيىن – قازاقتىڭ ءبىراۋىز ءسوزىنىڭ ءىس جۇزىندەگى كورىنىسى», دەدى.
عىلىمي ورتانىڭ حالىقارالىق دەڭگەيدە تانىلۋىنا عالىمداردىڭ سۇيەكتى جاريالانىمدارىنىڭ سانى, دايەكسوزدىلىگى, عىلىمي ىقپال يندەكسى اسەر ەتەتىنى انىق. كەيىنگى 5 جىل ىشىندە ءبىزدىڭ عالىمداردىڭ ءاربىر بەسىنشى جاريالانىمى الەمدەگى ۇزدىك جۋرنالداردىڭ 25 پايىزىنا ەندى. بۇل كورسەتكىش – ءالى دە بولسا عىلىمي ورتانى الماس قىلىشتاي قايراي ءتۇسۋىمىز كەرەك ەكەنىنىڭ دالەلى. مەملەكەت باسشىسى بۇل جونىندە «مەن بۇل سالاعا ەرەكشە ءمان بەرەمىن. سەبەبى ءبىلىم, ءبىلىم مادەنيەتى بولماسا, قازاقستان ءارى قاراي دامي المايدى. تاياۋ ارادا سىزدەر دە عالىمدار مەن تاجىريبەلى مامانداردىڭ قاتارىن تولىقتىرىپ, مەملەكەتىمىزدىڭ دامۋىنا ەلەۋلى ۇلەس قوساسىزدار دەپ سانايمىن. مەن جاستارعا سەنەمىن», دەگەن بولاتىن.
Astana IT University الاڭىندا وتكەن العاشقى وتىرىستا ەنەرگەتيكا جانە ماشينا جاساۋ, اقپاراتتىق, كوممۋنيكاتسيالىق جانە عارىشتىق تەحنولوگيالار, گەولوگيا, مينەرالدى جانە كومىرسۋتەك شيكىزاتىن ءوندىرۋ جانە قايتا وڭدەۋ, جاڭا ماتەريالدار, تەحنولوگيا, قاۋىپسىز بۇيىمدار مەن كونسترۋكتسيالار, ۇلتتىق قاۋىپسىزدىك جانە قورعانىس سالاسىنداعى زەرتتەۋلەر تاقىرىبى زەردەلەندى. ال جيىننىڭ س.سەيفۋللين اتىنداعى قازاق اگروتەحنيكالىق زەرتتەۋ ۋنيۆەرسيتەتىندە وتكەن بولىگىندە اگروونەركاسىپتىك كەشەننىڭ تۇراقتى دامۋىن, اۋىل شارۋاشىلىعى ونىمدەرىنىڭ قاۋىپسىزدىگىن, سۋ رەسۋرستارىن, جانۋارلار مەن وسىمدىكتەر دۇنيەسىن ۇتىمدى پايدالانۋ جانە ەكولوگيا, جاراتىلىستانۋ عىلىمى سالاسىنداعى عىلىمي زەرتتەۋلەردىڭ ءال-اۋقاتى تالقىلاندى.
عىلىم اكادەمياسى قۇرىلعان ۋاقىتتان باستاپ جاس عالىمدارعا ەرەكشە كوڭىل ءبولىنىپ كەلەدى. الداعى ۋاقىتتا ولاردىڭ عىلىمدى دامىتۋعا قاتىستى ويلارى تىڭدالىپ, عالىمداردىڭ تاستاي بەرىك ورداسى قالانباق. اكادەميانىڭ باستى مىندەتىنە عىلىمعا جاناشىر ازاماتتاردىڭ ورتاسىن قالىپتاستىرۋ قوسىلىپ وتىر.
اسقار جۇمادىلداەۆ ء«ال-حورەزمي «مينۋستى پليۋسكە اينالدىر» دەيدى. مەن ونى بىلاي جالعاستىرامىن: جەڭىلىستى جەڭىسكە اينالدىر. قانداي قاراڭعىلىق بولسا دا, ساۋلەنىڭ ۇشقىنىن كورۋ كەرەك», دەپ جاس عالىمداردى عىلىم ساۋلەسىن جاعۋعا شاقىردى.
ەلىگىماي توڭكەر,
جۋرناليست
