ءدۇبىرلى دودادا قازاقستاننىڭ تۋى استىندا 12 سپورتشى ونەر كورسەتۋ ۇستىندە. ەرلەر اراسىندا باستى ءۇمىت دەنيس ۋلانوۆقا ارتىلىپ وتىر. 81 كيلو سالماقتا سىنعا تۇسەتىن ول 2016 جىلعى ريو وليمپياداسىندا ءتورتىنشى ورىنعا تابان تىرەگەن ەدى. ۋاقىت وزا دەنيستىڭ باستى قارسىلاسى گابريەل سىنكرەياننىڭ دوپينگ قولدانعانى انىقتالىپ, رۋمىنيالىق اۋىر اتلەت بىرنەشە جىلعا ۇلكەن سپورتتان شەتتەتىلدى. ءسويتىپ, قولا مەدال ۋلانوۆقا تابىس ەتىلدى. ودان بولەك, شىعىس قازاقستان وبلىسىنىڭ تۋماسى 2016 جىلى تاشكەنتتە ازيا چەمپيونى اتانىپ, 2017 جىلى تايپەيدەگى دۇنيەجۇزىلىك ۋنيۆەرسيادادا باس جۇلدەنى ولجالادى.
دەنيس ۋلانوۆتان بولەك, جاستار اراسىنداعى الەم چەمپيونى, بىرقاتار ءدۇبىرلى دودادا جەڭىس تۇعىرىنا كوتەرىلگەن اقمولدا سايرامكەزدىڭ دە مۇمكىندىگى جوعارى باعالانىپ وتىر. ەر-ريادتا ول 67 كيلو سالماق دارەجەسىندە كۇش سىناسادى. سونداي-اق پارسى شىعاناعىندا ەرناز الپىسوۆ (55 كيلو), سەرگەي پەتروۆيچ (89 كيلو), ەلامان سەيىتقازى (81 كيلو), الىشەر سەيىتقازى جانە اسىلجان بەكتاي (96 كيلو) ونەر كورسەتەدى. ال ايەلدەر اراسىنداعى سايىستا اينۇر ابدىحالىقوۆا (49 كيلو), نادەجدا لي مەن ەكاتەرينا ستوليارەنكوعا (71 كيلو), اينۇر نۇرلىبەكوۆا (76 كيلو) مەن ايشا وماروۆاعا (81 كيلو) ءۇمىت ارتامىز. ءدۇبىرلى دودا 17 قىركۇيەكتە اياقتالادى.
سوڭعى ءۇش الەم چەمپيوناتىنىڭ ناتيجەلەرىنە توقتالساق, 2020 جىلى پاتتايادا جەڭىس تۇعىرىنا كوتەرىلۋ باقىتى تەك يگور سونعا بۇيىردى. 55 كيلو سالماقتاعى جەرلەسىمىز لوندون وليمپياداسىنىڭ جەڭىمپازى, ريو وليمپياداسىنىڭ كۇمىس جۇلدەگەرى, بەس دۇركىن الەم چەمپيونى, ەكى دۇركىن ازيا ويىندارىنىڭ جەڭىمپازى وم يۋن چحولگە ەسە جىبەرىپ, كۇمىس مەدالدى قاناعات تۇتتى.
2021 جىلى تاشكەنتتە ۇيىمداستىرىلعان جارىستا قازاقستان قۇراما كومانداسى مۇشەلەرى اراسىندا جالعىز جۇلدەنى ارلي چونتەي يەلەندى. 55 كيلو سالماق دارەجەسىندە ونەر كورسەتكەن ول قوسسايىس قورىتىندىسى بويىنشا 260 (118+142) كيلولىق زىلتەمىردى ەڭسەرىپ, جەڭىس تۇعىرىنىڭ ەڭ بيىك ساتىسىنا كوتەرىلدى.
2022 جىلى كولۋمبيانىڭ بوگاتو قالاسىندا قورجىنىمىزعا ءبىر كۇمىس پەن ءبىر قولا مەدال ءتۇستى. نۇرعيسا ادىلەت ۇلى (96 كيلو) ەكىنشى ورىندى يەلەندى. ونىڭ كورسەتكىشى – 383 (174+209) كيلو. قازاقتىڭ نار تۇلعالى ۇلى باحرەيننىڭ الىبى لەسمان پارەدەستەن عانا قالىپ قويدى. 73 كيلو سالماقتاعى الەكسەي چۋركين ۇزدىك ۇشتىكتى تۇيىندەدى. ول 343 (153+190) كيلولىق زىلتەمىردى تىك كوتەردى. جەرلەسىمىزدىڭ الدىن يندونەزيانىڭ قوس ساڭلاعى – راحمات ەرۆين ابدۋللا مەن ريزكي دجۋانيانسيا ورادى.
بىلتىرعى الەم چەمپيوناتىنىڭ قورىتىندىسى بويىنشا جالپىكوماندالىق ەسەپتە قىتاي قۇراماسى وزدى. اسپاناستى ەلىنىڭ تولاعايلارى 6 التىن, 3 كۇمىس جانە 3 قولانى ولجالادى. جارىس قوجايىندارى ەكىنشى ورىنعا تابان تىرەدى. كولۋمبيالىقتاردىڭ قورجىنىندا 2 التىن, 2 كۇمىس جانە 4 قولا مەدال بار. ءۇشىنشى ورىندا – تايلاند. تاي ەلىنىڭ وكىلدەرى ءتۇرلى-ءتۇستى جۇلدەلەردىڭ ارقايسىسىن قوس-قوستان ەنشىلەدى.
