فەستيۆالدىڭ ماقساتى – ساحنا ساڭلاعىنىڭ 100 جىلدىعىن مەرەكەلەۋ, ونىڭ ەسىمىن ۇلىقتاۋ, سونىمەن قاتار رەجيسسەرلەر مەن اكتەرلەر اراسىنان كاسىبي قولتاڭباسى قالىپتاسقان ۇزدىك ساحناگەرلەردى انىقتاۋ. فەستيۆالگە ەلىمىزدەن ع.مۇسىرەپوۆ اتىنداعى قازاق مەملەكەتتىك اكادەميالىق بالالار مەن جاسوسپىرىمدەر تەاترى, ن.ءجانتورين اتىنداعى ماڭعىستاۋ وبلىستىق مۋزىكالىق دراما تەاترى, ج.ايماۋىتوۆ اتىنداعى پاۆلودار وبلىستىق قازاق مۋزىكا-دراما تەاترى, س.سەيفۋللين اتىنداعى قاراعاندى وبلىستىق اكادەميالىق دراما تەاترى, الماتى قالالىق مادەنيەت باسقارماسىنىڭ «جاڭا عاسىر» تەاترى, استانا قالالىق «مۋزىكالىق جاس كورەرمەن تەاترى» جانە شەتەلدەن تۇركيا, ازەربايجان, تۇركىمەنستان, وزبەكستان, قىرعىزستان مەملەكەتتەرىنىڭ تەاترلارى قاتىسادى.
فەستيۆال اياسىندا ب.ريموۆانىڭ ءبيۋستى سالتاناتتى تۇردە اشىلادى. سونىمەن قاتار م.اۋەزوۆ اتىنداعى قازاق ۇلتتىق دراما تەاترى فەستيۆالدىڭ شىمىلدىعىن بيكەن ريموۆا باستى ءرولدى سومداعان «ەڭلىك-كەبەك» قويىلىمىمەن اشپاق.
تەاتر فەستيۆالى حالىقارالىق دەڭگەيدە وتكىزىلەتىن بولعاندىقتان, قازىلار القاسىنىڭ مۇشەلەرى قازاقستانمەن قوسا, ازەربايجان, باشقۇرتستان ەلدەرىنەن تاڭدالعان. قازىلار القاسىنىڭ توراعاسى – قازاقستاننىڭ ەڭبەك سىڭىرگەن قايراتكەرى, م.اۋەزوۆ اتىنداعى قازاق ۇلتتىق دراما تەاترىنىڭ ديرەكتورى ەركىن جۋاسبەك.
