فوتو: gov.kz
بالا كەزىنەن توقىما توقۋعا قۇشتار بولعان ول اتالمىش ءىستى كاسىبىنە اينالدىرعان. سۇيىكتى ىسىنە قوسىمشا, ۇيدە وتىرعان قىز-كەلىنشەكتەرگە ءوز بىلگەنىن ۇيرەتۋ ءىسىن دە قولعا العان.
وبلىس اكىمىنىڭ ءباسپاسوز قىزمەتى حابارلاعانداي, العاش كاسىبىن بالالارعا ارنالعان ءساندى ۇلگىدەگى كيىمدەر مەن ويىنشىقتار تىگۋدەن باستاعان كاسىپ يەسى وسى كۇندەرى قوسىمشا اياق كيىمدەر توقىپ, تابىس كوزىن ارتتىرۋدا. تاپسىرىسقا وراي ۇيگە ارنالعان تاپىشكەلەر جانە بالالار مەن ەرەسەكتەرگە ارنالعان ءتۇرلى اياق كيىم مەن سومكەلەردى دە توقىپ شىعادى ەكەن.
«توقىمانىڭ بارلىق ءتۇرىن توقيمىن. ءبىلىمىمدى جەتىلدىرىپ, سوڭعى ەكى جىلدا اياق كيىمنىڭ تۇرلەرىن توقۋدى تابىس كوزىنە اينالدىردىم. ەندىگى ماقساتىم – تۇيە جانە قوي جۇندەرىن وڭدەپ, زاماناۋي تەحنيكالاردى يگەرۋ ارقىلى ۇلكەن كاسىپ اشۋ. قازىرگى كەزدە توقىما اياق كيىمگە سۇرانىس ارتىپ جاتىر. ساپاسى فابريكادان شىققان ونىمدەردەن ارتىق بولماسا, كەم تۇسپەيدى. حالىقتىڭ ارقاسىندا تابىس تاۋىپ وتىرعاندىقتان سۇرانىسقا سايكەس بارىنشا ۇلگەرىپ, ساپاسىنا اسا ءمان بەرۋ ارقىلى كوپتىڭ كوڭىلىنەن شىعۋعا تىرىسامىن», دەيدى كاسىپ يەسى.
ايتا كەتسەك, بۇعان دەيىن بىرنەشە رەت وبلىس ورتالىعىندا قولونەر مادەنيەتىن قالىپتاستىرۋ جانە ىشكى ءتۋريزمدى دامىتۋ ماقساتىندا ۇيىمداستىرىلعان ايماقتىق كورمە-بايقاۋلاردا گۇلناحار ماميلاەۆا ءوز ونىمدەرىن ۇسىنىپ, ءىس-شاراعا جينالعانداردىڭ قوشەمەتىنە بولەنگەن ەدى.
