– اسكەري دايارلىققا جانە كومانديرلەردىڭ كاسىبيلىگىنە جوعارى تالاپ قويىلادى. سوندىقتان قازىرگى زامانعى ۇرىس جاعدايىندا بولىمشەلەر نەگىزگى كۇشتەن بولەك, دەربەس ارەكەت ەتۋگە دايىن بولۋى قاجەت. كومانديرلەر مەن باستىقتار باتىل شەشىم قابىلداپ نەمەسە ورىندى باستاما كوتەرىپ, بەرىلگەن تاپسىرمانى ورىنداۋ ءۇشىن تىڭ ءتاسىل قولدانۋى كەرەك. ولار باتىلدىعىمەن, توزىمدىلىگىمەن جانە انتقا بەرىكتىگىمەن كوپكە ۇلگى بولۋى قاجەت. اسكەردىڭ كۇشى – تارتىپتە! بۇل رەتتە كومانديرلەردىڭ اتقاراتىن ءرولى ەرەكشە. قارۋلى كۇشتەردەگى دايىندىقتىڭ جوعارى دەڭگەيىن, ءوزارا ۇيلەسىمدىلىكتى جانە قاتاڭ ءتارتىپتى ساقتاۋ قاجەت. ءاربىر سارباز وزىنە سەنىپ تاپسىرىلعان قارۋ مەن تەحنيكانى جەتىك مەڭگەرىپ, ولاردى ۇرىستا شەبەر قولدانىپ, جەدەل شەشىم قابىلداپ, باتىلدىق تانىتۋى كەرەك, – دەپ ءسوزىن تۇيىندەدى پرەزيدەنت.
«باتىل تويتارىس-2023» وقۋ-جاتتىعۋ جيىنى بارىسىندا مەملەكەتتىك جانە اسكەري باسقارۋ ورگاندارىنىڭ قورعانىس وپەراتسياسىن ورىنداۋعا دايىندىعى تەكسەرىلدى. اسكەر بارلىق دەڭگەيدەگى شتابتاردا قابىلدانعان شەشىمدەردى تولىق جۇزەگە اسىردى.
وقۋ-جاتتىعۋ جيىنىنا بارلىعى 8 مىڭ اسكەري قىزمەتشى جۇمىلدىرىلىپ, 600 اسكەري تەحنيكا مەن قارۋ-جاراق پايدالانىلدى.
