كەزدەسۋ بارىسىندا ولجاس بەكتەنوۆ دەپۋتاتتارعا اقمولا وبلىسىنىڭ اكىمى لاۋازىمىنا مارات مۇرات ۇلى احمەتجانوۆ پەن مۇرات ساعات ۇلى بالپاننىڭ كانديداتۋراسىن ۇسىنۋ تۋرالى پرەزيدەنتتىڭ حاتىن وقىپ بەردى.
اشىق داۋىس بەرۋدىڭ ناتيجەسىندە 177 دەپۋتات مارات احمەتجانوۆتىڭ, 73 دەپۋتات مۇرات بالپاننىڭ كانديداتۋراسىن قولداپ, داۋىس بەردى. جينالىسقا بارلىعى 250 دەپۋتات قاتىستى. داۋىس بەرۋ قورىتىندىسى بويىنشا پرەزيدەنت جارلىعىمەن احمەتجانوۆ مارات مۇرات ۇلى اقمولا وبلىسىنىڭ اكىمى بولىپ تاعايىندالدى.
ءوڭىر اكتيۆىنە جاڭا اكىمدى تانىستىرعان ولجاس بەكتەنوۆ مارات احمەتجانوۆتىڭ قۇقىق قورعاۋ جانە قاداعالاۋ سالالارىندا ءتۇرلى باسشىلىق قىزمەتتەردى ءتيىمدى اتقارعان تاجىريبەلى باسشى ەكەنىن اتاپ ءوتتى.
ولجاس بەكتەنوۆ وبلىس باسشىلىعى پرەزيدەنتتىڭ حالىققا جولداۋىندا كورسەتىلگەن مىندەتتەردى ىسكە اسىرۋعا كۇش سالۋى قاجەت ەكەنىن ايتتى. اقمولا وبلىسىنىڭ اكىمدىگى ءوڭىر ەكونوميكاسىن دامىتۋ, ازاماتتاردى ساپالى اۋىزسۋمەن قامتاماسىز ەتۋ, وبلىس ورتالىعىنداعى جىلۋ ەنەرگياسىنىڭ تاپشىلىعىن جويۋ, مەديتسينا سالاسىن دامىتۋ, تۇرعىنداردى الەۋمەتتىك ينفراقۇرىلىممەن قامتاماسىز ەتۋ, تۋريستىك الەۋەتتى نىعايتۋ, ەلوردا ماڭىنداعى اۋماقتاردى دامىتۋ جانە باسقا دا ماڭىزدى باعىتتار بويىنشا بەلسەندى جۇمىس ىستەۋى كەرەك.
ولجاس بەكتەنوۆ جەرگىلىكتى اتقارۋشى ورگانداردىڭ جۇمىسى ازاماتتارمەن تابىستى بايلانىس ورناتۋعا جانە مەملەكەت باسشىسىنىڭ تاپسىرمالارىن جۇزەگە اسىرۋعا نەگىزدەلۋى قاجەت ەكەنىنە نازار اۋداردى.
كەزدەسۋ سوڭىندا ولجاس بەكتەنوۆ مارات احمەتجانوۆقا وبلىس تۇرعىندارىنىڭ يگىلىگى ءۇشىن پرەزيدەنت جۇكتەگەن بارلىق مىندەتتى ورىنداۋ جولىندا تابىس تىلەدى, سونداي-اق ايماقتىڭ بۇرىنعى باسشىسى ەرمەك مارجىقپاەۆقا اتقارعان جۇمىسى ءۇشىن العىس ايتتى.
