ءىس-شارانى ۇيىمداستىرۋداعى نەگىزگى ماقسات – مەملەكەتتىك ءتىلدىڭ قولدانىس اياسىن كەڭەيتۋ, قازاق ءتىلىنىڭ ەتنوسارالىق قارىم-قاتىناس ءتىلى رەتىندەگى قىزمەتىن نىعايتۋ جانە مەملەكەتتىك ءتىلدى مەڭگەرگەن وزگە ۇلت وكىلدەرىن ىنتالاندىرۋ بولسا, بايقاۋدىڭ شارتى – ءاربىر ۇمىتكەر قازاق اقىنى ماعجان جۇماباي ۇلىنىڭ كەز كەلگەن شىعارماسىنان الىنعان ءماتىندى جاتقا وقىپ, بەينەماتەريالدى الەۋمەتتىك جەلىدە جاريالاۋعا ءتيىس.
بايقاۋ-اكتسياعا ەلىمىزدىڭ بارلىق وڭىرىنەن 200-گە تارتا ادام قاتىسسا, ولاردىڭ اراسىندا ورىس, تۇرىك, ازەربايجان, تاعى باسقا ەتنوس وكىلدەرى بار ەكەن. «اسىرەسە بۇل ءىس-شاراعا جامبىل وبلىسىنىڭ تۇرعىندارى ايرىقشا بەلسەندىلىك تانىتتى», دەيدى ۇيىمداستىرۋشىلار.
جوعارىدا ايتقانىمىزداي, الەۋمەتتىك جەلىدەگى ء«لۇپىل» سانى جوعارى ۇمىتكەرلەردىڭ بەينەماتەريالدارىن قازىلار القاسى سارالاپ, سالىستىرا وتىرىپ, جۇلدەگەرلەردى انىقتادى.
ماڭعىستاۋ وبلىسى مۇنايلى اۋدانى شوعى مۇڭال ۇلى اتىنداعى №5 جالپى ءبىلىم بەرۋ ورتا مەكتەبىنىڭ بيولوگيا ءپانى مۇعالىمى ءابدۋلازيز ءماجيتوۆ (سۋرەتتە) باس جۇلدەگە لايىق دەپ تانىلىپ, اقشالاي سىيلىققا يە بولسا, الماتى وبلىسى قاراساي اۋدانى جىبەك جولى اۋىلدىق وكرۋگى ءا.بايسالباەۆ اتىنداعى ورتا مەكتەبىنىڭ ورىس ءتىلى جانە ادەبيەتى ءپانىنىڭ مۇعالىمى ناعيما اليەۆاعا ءبىرىنشى ورىن بۇيىردى. ەكىنشى ورىندى شىمكەنت قالاسىنداعى №41 ماكارەنكو اتىنداعى مەكتەپ ۇستازى ديانا قىرىقپاەۆا مەن ۇلىتاۋ وبلىسى جاڭاارقا اۋدانىنىڭ زەينەتكەرى ەللا كيم تيان-سەن ءوزارا بولىسسە, تەمىرتاۋ قالالىق تىلدەردى دامىتۋ ورتالىعىنىڭ تىڭداۋشىسى ءدانيا كاليمۋللوۆا مەن سولتۇستىك قازاقستان وبلىسى پوليتسيا دەپارتامەنتىنىڭ قىزمەتكەرى يليا ماسەنكو ءۇشىنشى ورىندى قاناعات تۇتتى.
سونداي-اق 10 قاتىسۋشى ىنتالاندىرۋ سىيلىعىنا يە بولدى. بۇدان باسقا, مانەرلەپ وقىپ, شەبەرلىك كورسەتكەن كوپتەگەن قاتىسۋشى ءتىل ساياساتى كوميتەتى توراعاسىنىڭ ديپلومىمەن ماراپاتتالدى.
