كوللاجدى جاساعان – قونىسباي شەجىمباي, «EQ»
جارتى عاسىر بۇرىن جارىق كورگەن بۇل جيناق تىنىشباي راحيموۆتىڭ جەكە كىتاپحاناسىنا تيەسىلى ەكەن. العاشقى بەتىن اشا بەرگەندە-اق اقىننىڭ «تىنىشباي راقىمنىڭ جەكە كىتاپحاناسى» دەگەن ءمورى تۇر. ءبىزدى ەلەڭ ەتكىزگەن – قولتاڭبا. اۆتورى – تىنىشباي راحيموۆ.
«توقاش – قازاق پوەزياسىنا ەشكىمدى قايتالاماي, وزىندىك سونى ىزبەن, پوەتيكالىق جاڭا ورنەكپەن كەلگەن وزگەشە اقىن. جىرلارىندا قايتا وقىعىڭ كەلەتىن جاڭالىقتار كوپ: ياعني توقاشتىڭ ءوز جولى جەتەلەپ وتىرادى. مىنە, بۇل – اقىن!
جامبىل قالاسى,
29.09.74»
ءيا, ومىردەن وتكەن سوڭ قانشاما اقىن-جازۋشىنىڭ جەكە كىتاپحاناسى ساتىلىپ كەتتى. ءومىر بويى جينالعان كىتاپتاردىڭ يەسىنىڭ كوزىندەي جەكە كىتاپحاناعا اينالماي, ءار دۇكەننىڭ سورەسىنە كەتۋىنە الەۋمەتتىك-تۇرمىستىق جاعداي, ياكي قوعامدىق سانا سىندى فاكتورلار اسەر ەتكەن بولار.
اتالعان جيناققا توقاشتىڭ سىرعا تولى ولەڭدەرى مەن پوەمالارى ەنگەن. قىسقا عۇمىرىن, بار تىرشىلىگىن ادەبيەتكە عانا ارناپ, سول جولعا قالعان قىزىقتىڭ بارلىعىن قۇربان ەتكەن اقىن:
ء«ومىرىم بۇرقىراپ ءوتتى عوي,
اشىعان قىمىزداي سابادا.
كۇندەرىم – تەلەگراف سىمدارى,
جىلدارىم – ىزديعان باعانا»,
– دەپ جىرلايدى.
