ورتالىق كوممۋنيكاتسيالار قىزمەتىندە وتكەن ءباسپاسوز ءماسليحاتىندا ساۋدا جانە ينتەگراتسيا مينيسترلىگىنىڭ تەحنيكالىق رەتتەۋ جانە مەترولوگيا كوميتەتىنىڭ توراعاسى قۋانىش ەلىكباەۆ قازاقستانداعى حالال ينفراقۇرىلىمىنىڭ دامۋ بارىسى تۋرالى جان-جاقتى باياندادى. تاقىرىپقا قاتىستى بىرقاتار ماسەلە بويىنشا «قازاقستاندىق ستاندارتتاۋ جانە مەترولوگيا ينستيتۋتى» رمك باس ديرەكتورىنىڭ ورىنباسارى باۋىرجان مۇحامەدجانوۆ, ۇلتتىق اككرەديتتەۋ ورتالىعى باس ديرەكتورىنىڭ ورىنباسارى ءابسامات اكىموۆ تۇسىنىك بەردى.
ەلىمىز الدىندا 2025 جىلعا قاراي شيكىزاتتىق ەمەس ەكسپورت كورسەتكىشىن 41 ميلليارد دوللارعا جەتكىزۋ مىندەتى تۇر. حالال يندۋسترياسى بۇل كورسەتكىشكە قول جەتكىزۋدىڭ درايۆەرى بولىپ سانالادى. ونى دامىتۋ اياسىندا ەلىمىزدە جۇرگىزىلىپ جاتقان جۇمىستار ستاندارتتاۋ, ساراپشىلاردى اتتەستاتسيالاۋ مەن اككرەديتتەۋ, حالىقارالىق ىنتىماقتاستىق جانە ءۇشىنشى ەلدەردىڭ نارىعىنا شىعۋ باعىتىندا ءورىس الىپ كەلەدى.
«حالال ونىمدەرىنىڭ الەمدىك نارىعى وتە جىلدام ءوسىپ كەلەدى, قازىر ول 3 تريلليون دوللارعا باعالانىپ وتىر. 2028 جىلعا قاراي بۇل كورسەتكىش پەسسيميستىك ستسەناريدە – 3,27 تريلليونعا, وپتيميستىك ستسەناريدە 11 تريلليونعا جەتەدى دەپ كۇتىلۋدە», دەدى ق.ەلىكباەۆ.
حالال نارىعى بويىنشا مەملەكەتتىك دەڭگەيدە 18 ۇلتتىق ستاندارت قابىلداندى, تمد ەلدەرى ءۇشىن 11 مەملەكەتارالىق ستاندارت جوباسى ازىرلەندى. وسى ماقساتتا الەمدىك جەتەكشى ستاندارتتار نەگىزىندە حالىقارالىق ۇيىمدارمەن مال سويۋعا قويىلاتىن تالاپتارعا, سەرتيفيكاتتاۋ ورگاندارىنا, كوسمەتيكالىق ونىمدەردى سەرتيفيكاتتاۋ تارتىبىنە, تۋريزم مەن سايكەستىك بەلگىسىنە قىزمەت كورسەتۋگە قاتىستى بىرقاتار مەموراندۋم مەن كەلىسىم جاسالدى.
قازاقستان حالال ستاندارتتاۋ جونىندەگى تەحنيكالىق كوميتەتتى العاشقىلاردىڭ ءبىرى بولىپ قۇرىپ قانا قويماي, بۇگىندە تمد اياسىندا وسىنداي كوميتەتتىڭ حاتشىلىعىن باسقارىپ وتىر. سونىمەن قاتار حالال ونىمدەرى بويىنشا ساراپشى-اۋديتورلاردى دايارلاۋ بويىنشا وقۋ باعدارلامالارى قابىلداندى, بىرقاتار جوعارى وقۋ ورىننىڭ وقۋ باعدارلامالارىنا «حالال ءوندىرىس تەحنولوگياسى» ءپانى ەنگىزىلدى. الەمنىڭ جەتەكشى ەلدەرىندە ءبىلىم العان 8 ساراپشى-اۋديتور سەرتيفيكاتتالدى. العاشقى حالال ەرىكتى سەرتيفيكاتتاۋ جۇيەسى مەملەكەتتىك رەەستردە تىركەلدى. قازاقستاندا 100-دەن استام زەرتحانا بارلىق تاماق ونىمدەرىنە ارنالعان بىرىڭعاي تەحنيكالىق رەگلامەنتكە سايكەس اككرەديتتەلگەن. ونىڭ 37-سىندە دنق كومپونەنتتەرىن انىقتاۋعا بولادى.
بۇگىنگى تاڭدا حالال ينفراقۇرىلىمى تەك مۇسىلمان ەلدەرىندە عانا ەمەس, بۇكىل الەمدە ەكونوميكانىڭ دامۋ قارقىنى بار سالاسى بولىپ وتىر. حالال (اراب تىلىنەن اۋدارعاندا – رۇقسات ەتىلگەن) قۇندىلىقتار جۇيەسى: تاماق, كيىم, كوسمەتيكا, پارفيۋمەريا, جەكە گيگيەنا, دەمالىس, كوڭىل كوتەرۋ, قارجى جانە وزگە دە ادام ءومىرىنىڭ كەز كەلگەن سالاسىمەن بايلانىستى. كەڭ ماعىناسىندا, دوڭىز, يت, جىرتقىش اڭدار, سونداي-اق قۇرامىندا الكوگول جانە باسقا دا زياندى, ۋلى قوسپالارى بار تاعامداردى ەسەپكە الماعاندا باسقا تاعامداردىڭ بارلىعى تۇتىنۋعا جارامدى. حالال نارىعىنىڭ كولەمى مەن ونىڭ جىل سايىنعى ءوسۋ قارقىنىن ەسكەرسەك, ەلىمىزدىڭ دە جاھاندىق حالال نارىققا ءوز ءونىمىن جەتكىزۋىنە مول مۇمكىندىگى بار. بۇل تۇرعىدا ۇلتتىق اككرەديتاتسيا ورتالىعى تاراپىنان وندىرۋشىلەرگە حالال سەرتيفيكاتتار مەن ستاندارتتارى بەرىلىپ, ەلدىڭ جاھاندىق نارىققا ەنۋىنە العىشارت قالىپتاستىرۋدا.
حالال ونىمدەرىنىڭ سايكەستىك سەرتيفيكاتىن شەتەلدە مويىنداعان ۇيىمدار دا بار, سول ارقىلى 10 جىل ىشىندە وتاندىق كاسىپورىندارعا 1 300-دەن استام سەرتيفيكات بەرىلگەن. ءوز تاۋارلارىن الەمنىڭ جەتەكشى نارىقتارىنا جەتكىزۋ ءۇشىن الەمنىڭ 10 ەلىنەن سەرتيفيكات الۋعا ءوتىنىش بەرگەن كاسىپورىندار نەگىزىنەن شۇجىق, كونديتەرلىك ونىمدەر, سۋسىندار, جارتىلاي فابريكاتتار, ءسۇت, بال وندىرەدى.
«وتكەن جىلى پارسى شىعاناعى ەلدەرىنە ەكسپورتتالاتىن حالال ونىمدەردى سەرتيفيكاتتاۋ جونىندەگى ءبىرىنشى ورگان اككرەديتتەلدى, ول جارما, ۇن, كەبەك, قوي جانە سيىر ەتىن ەكسپورتتاۋعا سەرتيفيكات بەردى», دەپ مالىمدەدى ق.ەلىكباەۆ.
كوميتەت قابىلداعان ستاندارتتار ءارتۇرلى نەگىز بويىنشا تالاپتاردى كوزدەيدى. مىسالى, كەز كەلگەن تۇردەگى الكوگولگە تىيىم سالۋ سياقتى جالپى تالاپتار بار. ەلىمىز بەن الىس-جاقىن شەتەلدەر اراسىنداعى تۇراقتى ەكونوميكالىق بايلانىستاردى ەسكەرە وتىرىپ, حالال ينفراقۇرىلىمىن دامىتۋدىڭ بولاشاعى زور دەپ سەنىممەن ايتۋعا بولادى.
