فوتو: اننا ماۆرەشكونىڭ جەكە مۇراعاتىنان
الەۋمەتتىك جەلى ارقىلى كوزىمىز شالعان ەرەكشە ۆيدەو اۆتورى اننا ماۆرەشكونى سوزگە تارتقان ەدىك. اتىراۋدا تۋىپ-وسكەن ورىس قىزى قازاقتىڭ بارلىق سالت-ءداستۇرىن جاقسى كورەتىنىن ايتتى. مۇندايدا بىردەن مۇمكىن ونىڭ كۇيەۋى قازاق شىعار دەگەن وي كەلەدى. جوق. اتا-اناسى دا جولداسى دا ورىس. تەك ونىڭ ءسىڭىلىسى قازاق جىگىتكە تۇرمىسقا شىققان-دى. ءسويتىپ ولار قازاقپەن قۇدا بولعالى ۇلتىمىزدىڭ ءتۇرلى سالتىمەن تانىسقان كورىنەدى.
اننا ماۆرەشكو ءسىڭىلىسى بالالى بولىپ, تۇساۋكەسەر ءراسىمىن جاساعاندا ءمان-ماعىناسى مول ءداستۇردى ءوز بالاسى دۇنيەگە كەلگەندە جالعاستىرۋدى نيەت ەتكەن. سولايشا دۇنيەگە ەكى قىز, ءبىر ۇل اكەلگەن انا وسى مۇراتىنا جەتىپتى.
«قىزدارىم ءبىر جاسقا تولعاندا ىرىمداپ, ۇيدە ءوزىمىز تۇساۋكەسەر ءراسىمىن جاساعانبىز. ەندى مىنە, كوپتەن كۇتكەن ۇلىمىز دۇنيەگە كەلىپ, ونىڭ دا تۇساۋىن قازاقى ىرىممەن كەستىردىك. ەندى عانا ءتاي-ءتاي باسىپ جۇرگەن بالام تۇساۋىن كەستىرگەننەن كەيىن نىق قادام باسا باستادى. بۇنىڭ ءبىر ءوز قۇدىرەتى بار سياقتى. تاعىلىمى مول ءداستۇردى كەيىن بالالارىمنىڭ دا جالعاستىرعانىن قالايمىن», دەدى ول.
اننا جاي عانا ادەمى ەستەلىك رەتىندە تۇسىرىلگەن ۆيدەونىڭ الەۋمەتتىك جەلىدە مۇنشا تانىمال بولىپ كەتەتىنىن بىلمەدىك دەيدى. جەلىدە ولارعا جىلى لەبىزىن ءبىلدىرىپ جاتقاندار كوپ.
