مىرزاعالي ايتجانوۆ: تاشكەنتتەن كەيىن تاشكەنباي دەمالىس سۇرادى, سابىرحان بابىندا

– الدىمەن جۇكتەمەدەن باستاساق. فەدەراتسيا باسشىلىعى, مينيسترلىك قىتايدا وتەتىن جازعى وليمپيادا ويىندارىنان نەشە جولداما الۋدى تاپسىردى؟

– «ارىق سويلەپ سەمىز شىق» دەيدى بالەن سالماقتا چەمپيون بولامىز, تۇگەن بوكسشىمىز جولداما الادى  دەۋدەن اۋلاقپىن, ءبارىن رينگ ايگىلەيدى. ءبىز تەك بارىنشا تىڭعىلىقتى دايىندىقتى ىسكە اسىرىپ كەلەمىز. راس, باسشىلىق تاراپىنان كەمىندە 3-4 جولداما الۋ قاجەتتىگى ايتىلدى, ارقامىزعا اۋىر اماناتتى ارقالادىق. وقۋ-جاتتىعۋ جيىندارى دا ويداعىداي, جوسپار بويىنشا ءوتىپ جاتىر. الاتاۋ بوكتەرىندە جىگىتتەردىڭ فيزيكالىق دەنە دايىندىعىن ارتتىرىپ, تاۋدىڭ تازا اۋاسىندا ازىرلىك جالعاسىپ جاتىر.

– جازعى ازيا ويىندارىندا پاريج وليمپياداسىنىڭ جولداماسى تەك فينالعا شىققاندارعا ياعني ءار سالماقتا  چەمپيون اتانعاندار مەن كۇمىس مەدال يەگەرلەرىنە بەرىلەدى. ودان كەيىن دە  الەمدىك ىرىكتەۋ ياعني ليتسەنزيالىق تۋرنير ەكى رەت وتەدى ەكەن.

– ءتورت جىلدا ءبىر مارتە اينالىپ سوعاتىن  جازعى ازيا ويىندارىنىڭ  ءباسى دە بيىك, داڭقى دا جوعارى. ء وزىڭ ايتقانداي,  وليمپيادالىق جەتى سالماقتا تەك فيناليستەرگە جولداما بەرىلەدى. دەمەك, ءار بوكسشى دا بارىن سالاتىنى انىق. ەۋروپا قۇرلىعىنىڭ ويىندارى ءوتتى. پانامەريكا ويىندارى, افريكا قۇرلىعىنىڭ ىرىكتەۋى وتەدى. وسى ءار قۇرلىقتاعى  جولداما  بەرىلەتىن  دودادا  باعى جانباعان بوكسشىلار كەلەسى جىلدىڭ كوكتەمىندە يتاليا مەن تايلاندتا وتەتىن الەمدىك تۋرنيردە وليمپيادا  جولداماسى ءۇشىن  ايقاسادى.

بيىلعى جىل  سپورتشىلار ءۇشىن  ماڭىزدى جارىستارعا تولى بولدى ءوزى. كوكتەمدە بوكستان الەم چەمپيوناتى تاشكەنتتىڭ تورىندە دۇركىرەدى. قوڭىر كۇزدە مىنە تاعى دا ءىرى دودا جازعى ازيا ويىندارى كۇتىپ تۇر.  ءبىز وليمپيادالىق جەتى سالماق دارەجەسىندە  قۇرلىق الامانىنا قاتىساتىن بوكسشىلاردى استانا قالاسىندا وتكەن  ەلوردا كۋبوگىندە ىرىكتەدىك. فەدەراتسيا باسشىلىعىنىڭ  تاپسىرماسى  بويىنشا ءار سالماقتا ءوزىنىڭ الەۋەتىن  ايقىن كورسەتىپ, مىقتىلىعىن دالەلدەگەن بوكسشىلار قىتايعا بارادى.

– الەم چەمپيونى ماحمۇد سابىرحان سالماعىن اۋىرلاتىپ 57 كەلىگە اۋىستى. جاڭا سالماققا ۇيرەنىسۋى قالاي؟

– ماحمۇد  كوكتەمدەگى الەم چەمپيوناتىنا 54 كەلىدە قاتىستى. بارلىق قارسىلاستارىن ايقىن ۇتتى. جاستار اراسىندا دا  ءوزىنىڭ سالماعىندا الەمدە تەڭدەسسىز ەكەنىن پاش ەتكەن بوكسشى. ەرەسەكتەر ساپىنا قوسىلعاندا دا  شىڭدالا ءتۇستى.  دەگەنمەن دە 54 كەلى بۇگىنگى تاڭدا  وليمپيادالىق سالماق بولىپ سانالمايدى. سودان كەيىن 57 كەلىگە اۋىستى. ەلوردا كۋبوگىندە جاڭا سالماقتا ءوزىنىڭ الەۋەتىن بايقاپ كوردى. دەگەنمەن دە بۇل سالماق دارەجەسىندە الەم چەمپيونى وزبەكستاندىق ابدىمالىك حالوكوۆ بار. جاسوسپىرىمدەر وليمپياداسىنىڭ چەمپيونى, ازيا چەمپيونى حالوكوۆ تا قىتايعا بارادى. ءۇندىستان ەلىنىڭ ءۇمىتى مۇحاممەد حۋسسامۋددين, قىرعىز بوكسشىسى مۇناربەك سەيىتبەك ۇلى سىندى الەم چەمپيوناتىنىڭ قولا جۇلدەگەرلەرى تۇر. ماحمۇدتىڭ جاڭا سالماعىندا بۇلاردان وزگە دە مىقتىلار بار. وليمپيادانىڭ جولداماسى ءۇشىن قانداي اسۋدان اسۋ كەرەكتىگىن بوكسشىمىز جەتە سەزىنىپ, تىڭعىلىقتى ازىرلىك جۇرگىزۋدە.

– جازعى وليمپيادا ويىندارىندا ەرلەردىڭ  جەتى سالماق دارەجەسىندە سىنعا ءتۇسۋى باسەكەلەستىكتى,  كوشباسشىلىق تىزگىندى ۇستاۋ ءۇشىن تارتىستى كۇشەيتە تۇسكەنى بەلگىلى. اسىرەسە جەڭىل سالماق دارەجەلەرىندە ايقاس كۇشەيمەك. 48 كەلىدەگى الەم چەمپيونى سانجار تاشكەنباي دا وليمپيادالىق سالماق 51 كەلىگە اۋىسۋى مۇمكىن عوي. بۇل سالماقتا جازعى ازيا ويىندارىنا ءوزىڭىزدىڭ ءتول شاكىرتىڭىز, توكيو وليمپياداسىنىڭ  قولا جۇلدەگەرى  ساكەن بيبوسىنوۆ  قاتىسادى.

– ارينە, كەز كەلگەن اۋەسقوي بوكسشىنىڭ ارمانى جازعى وليمپيادا ويىندارىنىڭ چەمپيونى اتانۋ. ءوزىڭىز بىلەسىز, تاۋەلسىز قازاق ەلىنىڭ بوكسشىلارى جازعى وليمپيادا ويىندارىنان 2021 جىلى وتكەن توكيو وليمپياداسىنا دەيىن التىن مەدالسىز قايتپاپ ەدى. توكيو تورىندە سپورتشىلارىمىزدىڭ كورسەتكىشى كوڭىل كونشىتپەگەنى ءۇشىن ەرىنبەگەننىڭ ءبارى سىنادى. سىن تۋرا ايتىلسا, كەمشىلىك  تۇزەلەدى, كەم-كەتىك بۇتىندەلەدى. ولقىلىقتىڭ ورنىن تولتىرۋ ءۇشىن بارىمىزدى سالىپ ەڭبەكتەنىپ كەلەمىز. سانجار تاشكەنباي تاشكەنتتەگى الەم چەمپيوناتىنان كەيىن دەمالىس سۇرادى, وتباسىن قۇرىپ, شاڭىراق كوتەردى. قازىر ەندى قايتادان جاتتىعۋعا كىرىستى. وليمپيادالىق سالماققا وتەمىن دەسە كەز كەلگەن بوكسشىنىڭ جۇرەك قالاۋى. ەشقانداي شەكتەۋ جوق, تەك ءوزىڭدى دالەلدەي الساڭ, كوشباسشى ەكەنىڭدى  پاش ەتسەڭ  بولعانى.

اڭگىمەلەسكەن قۋانىش نۇردانبەك ۇلى,

«Egemen Qazaqstan»