كەشەن 1 600 باس ساۋىن سيىرعا لايىقتالىپ سالىنىپ جاتىر. بۇل جوبا اۋدانداعى بۇرىن-سوڭدى قولعا الىنعان ەڭ ءىرى جوبا ەكەندىگىن سۇيىنشىلەپ اتاپ ايتا كەتۋىمىز كەرەك. استانانى ازىق-ت ۇلىكپەن قامتاماسىز ەتۋ بەلدەۋىندەگى تاۋارلى-ءسۇت فەرماسى ءوز جۇمىسىن باستاعان كەزدە قالا تۇرعىندارىنىڭ اق داستارقانىن ءسۇت ونىمدەرىنىڭ الدەنەشە تۇرىمەن بايىتىپ, نارىقتاعى ءونىم باعاسىن ءبىرشاما تۇراقتاندىرۋعا وڭ اسەر ەتۋى ابدەن مۇمكىن.
– ءسۇت ونىمدەرىن وڭدەيتىن كەشەن سالۋ يدەياسى وسىدان ەكى جىل بۇرىن تۋىنداپ ەدى, – دەيدى «مانشۇك-اە» جاۋاپكەرشىلىگى شەكتەۋلى سەرىكتەستىگىنىڭ باسشىسى تيمۋر پىشەنوۆ. – ءبىز ەنەرگيا قۋاتىن ۇنەمدەيتىن, ەكونوميكالىق جاعىنان ءتيىمدى جاڭا تەحنولوگيالىق قۇرىلعىلاردى پايدالانباقپىز. بۇل ءىس الدىمەن فەرما جۇمىسشىلارىنا جايلى بولادى. وسىنداي ۇنەمدەۋدىڭ ارقاسىندا تاۋارلى-ءسۇت فەرماسى ونىمدەرىنىڭ وزىندىك قۇنى تومەندەيدى. تاۋلىگىنە 45-48 توننا ءسۇت وڭدەۋگە مۇمكىندىك بار.
بۇگىنگى كۇنى فەرما قۇرىلىسى الدىن الا مەجەلەنگەن جوسپار بويىنشا جۇرگىزىلىپ وتىر. 2 سيىر, 5 بۇزاۋ قوراسى, ساۋىن بلوكتارى, مال ازىعىن دايىندايتىن تسەح, اكىمشىلىك-تۇرمىستىق كەشەن سالىندى. كەشەن ءوز جۇمىسىن باستاعان كەزدە استانا قالاسىمەن بىرگە وزگە دە ەلدى مەكەندەردى ساپالى ءسۇت ونىمدەرىمەن قامتاماسىز ەتەتىن بولادى. ونىڭ ۇستىنە جاڭا جۇمىس ورىندارى دا اشىلىپ وتىر. قازىر مۇندا 35 ادام جۇمىس ىستەيدى. الداعى ۋاقىتتا سەرىكتەستىك باسشىلارى وزدەرىنە قاجەتتى مامانداردى وقىتىپ الماق. مال ماماندارىن دا وقىتىپ, دايىنداۋ كوزدەلىپ وتىر. سەرىكتەستىك باسشىلارى بولاشاق ماماندار ءۇشىن التى تۇرعىن ءۇي سالدى. الداعى ۋاقىتتا تاعى دا ءتورت پاتەر سالماقشى. تاۋارلى ءسۇت فەرماسى تاياۋ ارادا ىسكە قوسىلادى.
اقمولا وبلىسى,
تسەلينوگراد اۋدانى
