سۋرەتتى تۇسىرگەن ج.جۇمابەكوۆ
وتىرىستى اشقان ءماجىلىس توراعاسى مەملەكەت باسشىسى قاسىم-جومارت توقاەۆتىڭ قازاقستان حالقىنا جولداۋىندا دەپۋتاتتاردىڭ الدىنا قويىلعان مىندەتتەردى جاريا ەتتى. ونىڭ بارلىعى وڭىرلەردەگى پروبلەمالارمەن ۇندەس ەكەنىن اتاپ ءوتتى. بۇل ءاربىر وتباسىنىڭ اماندىعى, تۇراقتى جۇمىسى, لايىقتى جالاقىسى, اماندىعى مەن قاۋىپسىزدىگى, ەلدەگى تىنىشتىق, بەيبىتشىلىك پەن كەلىسىم.
«قاسىم-جومارت كەمەل ۇلى بۇگىن جۇرتشىلىقتى الاڭداتقان ماسەلەلەردىڭ بارىنە ناقتى جاۋاپ بەردى. پرەزيدەنت ازاماتتارعا قامقورلىق جاساۋ, ولاردىڭ ءال-اۋقاتىن ارتتىرۋ – مەملەكەتتىڭ باستى نازارىندا ەكەنىن تاعى دا ايقىن كورسەتتى. ماسەلەن, كەلەر جىلى 1 قاڭتاردان باستاپ ەڭ تومەنگى جالاقى مولشەرى 85 مىڭ تەڭگەگە دەيىن كوتەرىلەدى. بۇل شارا 1,8 ميلليون ادامدى قامتيدى», دەدى ەرلان قوشانوۆ.
ءماجىلىس توراعاسى ءبىرىنشى كەزەكتەگى مىندەتتەر قاتارىندا وتاندىق ءوندىرىستى دامىتۋ, ينفراقۇرىلىم ماسەلەلەرىن شەشۋ, حالىقتىڭ قارىز جۇكتەمەسىن ازايتۋ, زياندى ەڭبەك جاعدايىندا جۇمىس ىستەيتىن ادامداردى الەۋمەتتىك قولداۋ, سالىق جانە بيۋدجەت كودەكستەرىن قابىلداۋ, سونىمەن قاتار تسيفرلاندىرۋ, عىلىم مەن تەحنولوگيانى دامىتۋ ەكەنىن ايتتى. سۋعا قاتىستى ماسەلەلەردى تولىق شەشۋ ءۇشىن سۋ رەسۋرستارى جانە يرريگاتسيا مينيسترلىگى قۇرىلىپ, كولىك-لوگيستيكالىق سەكتوردى دامىتۋ ءۇشىن كولىك مينيسترلىگى قايتا قۇرىلادى. ءماجىلىس سپيكەرى پرەزيدەنتتىڭ اتوم ەلەكتر ستانساسىن سالۋ بويىنشا رەفەرەندۋم وتكىزۋ تۋرالى باستاماسىن ستراتەگيالىق شەشىمدەردىڭ ءبىرى دەپ اتادى. بۇل ماسەلە قوعامدا قىزۋ تالقىلانىپ جانە ول بۇكىل ەل تۇرعىندارىنىڭ پىكىرىن ەسكەرە وتىرىپ شەشىلەدى.
ء«بىزدىڭ مىندەتىمىز – مەملەكەت باسشىسى العا قويعان مىندەتتەردى زاڭنامالىق دەڭگەيدە ساپالى ءارى جەدەل ورىنداۋدى قامتاماسىز ەتۋ. رەسپۋبليكالىق بيۋدجەتتەن بولىنگەن ءاربىر تيىن مۇلتىكسىز ءوز ماقساتىنا جۇمسالۋعا ءتيىس. دەپۋتاتتار مۇنى قاتاڭ قاداعالاۋى قاجەت. زاڭ شىعارۋ پروتسەسى ازاماتتىق قوعامداستىقتىڭ پىكىرىن ەسكەرە وتىرىپ, اشىق بولۋى كەرەك», دەدى سپيكەر.
جالپى وتىرىستا ءماجىلىس دەپۋتاتى عالىمجان ەلەۋوۆتىڭ وكىلەتتىگى مەرزىمىنەن بۇرىن توقتاتىلدى. دەپۋتاتتار ەكس-ماجىلىسمەندى شىعارىپ سالىپ, جاڭا قىزمەتىنە ساتتىلىك تىلەدى. ودان سوڭ دەپۋتاتتار بىرقاتار جاڭا زاڭ جوباسىن جۇمىسقا قابىلدادى. سونىڭ ىشىندە 2024-2026 جىلدارعا ارنالعان رەسپۋبليكالىق بيۋدجەت جانە قازاقستان رەسپۋبليكاسىنىڭ ۇلتتىق قورىنان كەپىلدەندىرىلگەن ترانسفەرت, قوعامدىق بىرلەستىكتەر تۋرالى, تۇتىنۋشىلاردىڭ قۇقىقتارىن قورعاۋ تۋرالى زاڭ جوباسى مەن ىلەسپە تۇزەتۋلەر, اكىمشىلىك ادىلەت سالاسىن جەتىلدىرۋ جانە كەڭەيتۋ ماسەلەلەرى بويىنشا وزگەرىستەر مەن تولىقتىرۋلار جانە ەكى راتيفيكاتسيالىق زاڭ جوباسى بار.
