قازاقستاندىق تەننيسشى ۇلىبريتانيالىق حيزەر ۋوتسونمەن بىرگە باستاپقى كەزدەسۋىن امەريكالىقتار ەمما ناۆاررو/پەيتون ستەرنسپەن وتكىزدى.
ءبىر ساعاتتان استام ۋاقىتقا سوزىلعان كەزدەسۋدە قازاقستاندىق- ۇلىبريتانيالىق جۇپ 6:2, 6:4 ەسەبىمەن جەڭىسكە جەتتى. ولار التى برەيك-پوينتتىڭ تورتەۋىن پايدالاندى. قارسىلاس دۋەت ءۇش ەيس, ءبىر برەيكپەن كوزگە ءتۇستى. ەندى ا.دانيلينا/ح.ۋوتسون ءۇشىنشى اينالىمعا شىعۋ ءۇشىن ميۋ كاتو (جاپونيا)/الديلا سۋتدجياديمەن (يندونەزيا) تالاسادى.
سونىمەن قاتار اننا دانيلينا فينليانديالىق حارري حەليوۆاارامەن بىرگە ارالاس جۇپتا دا جارىستى جالعاستىرادى. ولار العاشقى اينالىمدا نيكول مەليچار (اقش)/مەتتيۋ ەبدەندى (اۋستراليا) 6:3, 5:7, 10:7 ەسەبىمەن جەڭدى. ەندى ەكىنشى اينالىمدا اليسيا پاركس/دەنيس كۋدلامەن شەبەرلىك بايقاسادى.
ال جۇپتاسىپ ونەر كورسەتۋدە سىنعا ءتۇسىپ جاتقان قازاقستاندىق اندرەي گولۋبەۆ ءبىرىنشى اينالىمدا رەسەيلىك رومان سافيۋللينمەن بىرگە امەريكاندىقتار الەكساندر كوۆاچەۆيچ پەن نيكولاس مورەنو دە البورانمەن كەزدەسىپ, 6:4, 6:3 ەسەبىمەن جەڭىسكە جەتتى.
