مەملەكەت باسشىسىنىڭ ايتۋىنشا, وتكەن جىلدان بەرى قازاقستاندا اۋقىمدى ساياسي جاڭعىرۋ جۇمىستارى جۇرگىزىلىپ كەلەدى. قولعا العان شارالار ناتيجەسىندە بيلىك تارماقتارى اراسىندا ءتيىمدى تەپە-تەڭدىك ورنادى.
«وزدەرىڭىزگە ءمالىم, بىلتىردان بەرى ەلىمىزدە اۋقىمدى ساياسي جاڭعىرۋ جۇمىستارى جۇرگىزىلدى. نەبارى ءبىر جارىم جىلدىڭ ىشىندە كوپتەگەن وزگەرىس جاسالدى. وعان بارشاڭىز كۋا بولدىڭىزدار, رەفورمانى جۇزەگە اسىرۋ ءۇشىن بەلسەندى تۇردە جۇمىس ىستەدىڭىزدەر. قولعا العان شارالار ناتيجەسىندە بيلىك تارماقتارى اراسىندا ءتيىمدى تەپە-تەڭدىك ورنادى. باسقارۋ جۇيەسى ىقپالدى پارلامەنتى بار پرەزيدەنتتىك رەسپۋبليكا ۇلگىسىنە كوشتى. ەلىمىزدە «كۇشتى پرەزيدەنت – ىقپالدى پارلامەنت – ەسەپ بەرەتىن ۇكىمەت» تۇجىرىمداماسى بارىنشا ورنىقتى», دەدى قاسىم-جومارت كەمەل ۇلى.
پرەزيدەنتتىڭ ايتۋىنشا, قازاقستاننىڭ ساياسي جۇيەسىندە «حالىق ۇنىنە قۇلاق اساتىن مەملەكەت» قاعيداتى ناقتى ىسكە اسىرىلۋى قاجەت.
«بۇل جەردە پارلامەنتتىڭ ءرولى ەرەكشە. ادام قۇقىعىن قورعاۋ سالاسىندا ماڭىزدى قادامدار جاسالدى. ادىلدىكتى جانە زاڭ ۇستەمدىگىن ورناتۋ ءۇشىن اۋقىمدى جۇمىس جۇرگىزىلىپ جاتىر. شەشىم قابىلداۋ ۇدەرىسىنە ازاماتتاردىڭ قاتىسۋ مۇمكىندىگى ارتتى. قوعامنىڭ ساياسي مادەنيەتى مۇلدە جاڭا سيپاتقا يە بولدى», دەپ اتاپ ءوتتى مەملەكەت باسشىسى.
