ورتالىق ازياداعى ۇشقىشتار مەن ينجەنەرلىك-تەحنيكالىق قۇرامدى دايىندايتىن جالعىز وقۋ ورنىندا كونستيتۋتسيا كۇنى قارساڭىندا اسكەري انت قابىلداۋ ءراسىمى ءوتتى. سالتاناتتى جيىنعا وبلىس اكىمى ەرالى توعجانوۆ قاتىستى.
«سىزدەر بۇگىن قازاقستان حالقىنا جانە ونىڭ زاڭدى سايلانعان پرەزيدەنتىنە ادال قىزمەت ەتۋگە انت قابىلداپ جاتىرسىزدار. ءبارىڭىزدى شىن جۇرەكتەن قۇتتىقتايمىن! وقۋ باعدارلاماسىن ءساتتى يگەرىپ, ەلىمىزدىڭ قارۋلى كۇشتەرىنىڭ ۇلگىلى اسكەري قىزمەتكەرى بولۋلارىڭىزعا تىلەكتەسپىن! ء«تارتىپسىز ەل بولمايدى, تارتىپكە باعىنعان قۇل بولمايدى» دەگەن باتىر باۋىرجان مومىش ۇلىنىڭ ءسوزىن باسشىلىققا الىڭىزدار. وتان ءۇشىن جانقيارلىقپەن قىزمەت ەتىڭىزدەر», دەدى ءوڭىر باسشىسى.
وقۋ ورنىنا ءتۇسىپ جاتقان جاس كۋرسانتتار ەلىمىزدىڭ ءار تۇكپىرىنەن كەلگەن. سولاردىڭ ءبىرى تاراز قالاسىنىڭ تۋماسى نۇراسىل قۇرمان جاستايىنان ۇشقىش بولۋدى ارمانداعانىن ايتادى. «تۋىستارىمنىڭ ىشىندە اسكەري ادامدار بار. ءوزىم دە جاستايىمنان ۇشقىش بولعىم كەلدى. وقۋعا ءتۇسۋ وڭاي بولعان جوق. بىراق 40 كۇندىك ىرىكتەۋدەن سۇرىنبەي ءوتتىم. ماماندىعىم – جاۋىنگەرلىك باسقارۋ وفيتسەرى. ۇشاقتاردى باسقارامىن», دەيدى ول.
تاۋەلسىزدىك العالى بەرى اسكەري ينستيتۋت 2 700 وفيتسەر دايارلاپ شىعاردى. قازىرگى كۇنى وقۋ ورنى زاماناۋي اۆياتسيالىق قۇرال-جابدىقتاردى قولدانا وتىرىپ, جوعارى بىلىكتى اۆياتسيا ماماندارىن دايارلاپ كەلەدى. 2021 جىلدان بەرى ينستيتۋتتا ۇشقىشسىز ۇشاتىن اپپاراتتاردى باسقاراتىن ماماندار دايارلاۋ باستالدى.
