مەملەكەت باسشىسىنىڭ 100 زاماناۋي وقۋشىلار سارايىن سالۋ باعدارلاماسىن جۇزەگە اسىرۋ اياسىندا بوي كوتەرگەن ورتالىقتا 33 ۇيىرمە جۇمىس ىستەيدى.
قالا اكىمى ەربولات دوساەۆ جاڭا ورتالىق اۋدان مەكتەپتەرى مەن بالاباقشالارعا جاقىن ماڭنان اشىلعانىن جەتكىزىپ, ەڭ جوعارى ستاندارتتار بويىنشا ءبىلىم بەرۋ تەحنولوگيالارىمەن جابدىقتالعاندىعىن اتاپ ءوتتى. ورتالىقتىڭ اشىلۋىمەن الاتاۋ اۋدانىندا وقۋشىلار مەن اتا-انالارعا ىڭعايلى ءبىلىم بەرۋ كلاستەرى قۇرىلىپ وتىر. ارنايى باعدارلامالارمەن قامتىلعان سەكتسيالار بالالارعا مەكتەپتە العان ءبىلىمىن تەرەڭدەتۋگە جانە كەڭەيتۋگە مۇمكىندىك بەرەدى.
شىعارماشىلىق ورتالىقتا تىگىن شەبەرحاناسى, اسپازدىق ستۋدياسى, سپورت زالدارى, اكتەرلىك شەبەرحانا, مۋزىكالىق جانە دىبىس جازۋ ستۋدياسى, قىسقى باقتا ورنالاسقان ارت-ستۋديا بار. مۇنداعى كوۆوركينگ ايماعى, بالالاردىڭ كوڭىلىن كوتەرۋگە ارنالعان ينتەراكتيۆتى پروەكتسيالىق زال جانە وقۋشىلارعا ارنالعان دەمالىس ايماعى, اشىق تەرراسا دا بالالاردىڭ كوڭىلىنەن شىقتى.
ورتالىقتا سونىمەن بىرگە مودەلدەۋ, VR سىنىپتارى, اۆيامودەلدەۋ, ونەركاسىپتىك ديزاين سياقتى سەكتسيالار جۇمىس ىستەيدى. بالالارعا كاسىپتىك باعدار بەرۋگە باعىتتالعان ستۋديالار كوللەدجدەرمەن جانە جوعارى وقۋ ورىندارىمەن دە تىعىز بايلانىستى جۇمىس ىستەيدى. مىسالى, اسپازدىق ستۋدياسى سەرۆيستىك قىزمەت كورسەتۋ كوللەدجىمەن, ال فيزيكا جانە حيميا زەرتحانالارى قالاداعى جوعارى وقۋ ورىندارىمەن بالالاردى تارتىمدى باعدارلامالارىمەن قىزىقتىراتىن بولادى. وسى ورايدا قالا اكىمى WorldSkills فورماتىنداعى چەمپيوناتتارعا قاتىساتىن تاجىريبەلى تالىمگەرلەر مەن بەيىندى جوعارى وقۋ ورىندارى مەن كوللەدج ستۋدەنتتەرى شىعارماشىلىق ورتالىققا كەلەتىن بالالارمەن ىنتىماقتاستىقتى دامىتۋعا بەلسەنە قاتىسۋى قاجەت دەدى.
ورتالىقتا ەرەكشە قاجەتتىلىكتەرى بار بالالاردى دا سەكتسيالارعا تارتۋ مۇمكىندىگى قاراستىرىلعان. مىسالى, موتوريكانى دامىتۋعا باعىتتالعان سەكتسيالار, ۆيرتۋالدى كابينەت باعدارلامالارى ينكليۋزيۆتى باعىتتا ىسكە اسادى. مۇندا لوگوپەد, دەفەكتولوگ, پسيحولوگ ماماندار ءۇشىن ارنايى زالدار مەن كوررەكتسيالىق كابينەتتەر بار.
الماتى
