فوتو: gov.kz
«مەملەكەت باسشىسى ءوزىنىڭ العاشقى قازاقستان حالقىنا جولداۋىندا ۇلكەن ساياسي وزگەرىستەر تۋرالى جاريالادى. سەبەبى ەلدىڭ قوعامدىق-ساياسي ءومىرىن جاڭعىرتپايىنشا, ەكونوميكالىق رەفورمالاردى جۇرگىزۋ مۇمكىن بولمايتىن ەدى. ازاماتتىق قوعامدى دامىتۋ تۇجىرىمداماسى ىسكە اسىرىلىپ جاتىر. بۇل قۇجات دەموكراتيانى نىعايتۋدىڭ جاڭا كەزەڭى جانە كوپپارتيالىقتى دامىتۋ مەن باسەكەلى سايلاۋدى وتكىزۋ جولىنداعى العاشقى قادام بولدى. پرەزيدەنت جانىنداعى ۇلتتىق قوعامدىق سەنىم كەڭەسىنىڭ جۇمىسىن جالعاستىرۋ ءۇشىن جالپىۇلتتىق دەڭگەيدە ۇلتتىق قۇرىلتاي قۇرىلدى», دەدى اليحان سمايىلوۆ.
بۇدان سوڭ ول بەيبىت جينالىستاردى ۇيىمداستىرۋ مەن وتكىزۋدىڭ جاڭا ءتارتىبى زاڭناما دەڭگەيىندە رەتتەلگەنىن ايتتى.
«العاش رەت زاڭ جۇزىندە سىبايلاس جەمقورلىق قىلمىس ورىن العان مەملەكەتتىك ورگان باسشىسىنىڭ جاۋاپكەرشىلىگى بەكىتىلدى. اكىمشىلىك راسىمدىك-پروتسەستىك كودەكس قابىلداندى. ول ازاماتتار مەن بيزنەستىڭ مۇددەسىن قورعاۋدى قامتاماسىز ەتەدى. زاڭ جۇزىندە ازاماتتاردىڭ قۇقىقتارىن قورعاۋ كەپىلدىگى ارتىپ, قىلمىستىق پروتسەستە تاراپتاردىڭ سايىسكەرلىگى جانە تەڭدىگى قامتاماسىز ەتىلدى. العاش رەت مەملەكەتتىك ورگاندار ءۇشىن ازاماتتاردىڭ وتىنىشتەرىمەن جۇمىس ىستەۋىنە ارنالعان بىرىڭعاي اقپاراتتىق جۇيە ەنگىزىلدى. اۋداندىق ماڭىزى بار قالالار, اۋىلدار, كەنتتەر جانە اۋىلدىق وكرۋگتەر اكىمدەرىن سايلاۋ ينستيتۋتى ەنگىزىلدى. ونىڭ اياسىندا 1576 اۋىل اكىمى سايلاندى», دەدى ۇكىمەت باسشىسى.
سونداي-اق ول جەر كودەكسىنە ءتيىستى تۇزەتۋلەر ەنگىزۋ ارقىلى شەتەلدىكتەرگە جانە شەتەلدىك زاڭدى تۇلعالارعا اۋىل شارۋاشىلىعى جەرلەرىن بەرۋگە تۇپكىلىكتى تىيىم سالىنعانىن ءسوز ەتتى.
