فوتو: اقتوبە وبلىسى اكىمدىگىنىڭ ءباسپاسوز قىزمەتى
كونستيتۋتسيا كۇنى قارساڭىندا ينستيتۋت بازاسىندا اسكەري انت قابىلداۋ ءراسىمى ءوتتى. سالتاناتتى شاراعا وبلىس اكىمى ەرالى توعجانوۆ قاتىستى.
«بۇگىن سىزدەر قازاقستان حالقىنا جانە ونىڭ زاڭدى تۇردە سايلانعان پرەزيدەنتىنە ادال قىزمەت ەتۋگە اسكەري انت قابىلداعالى تۇرسىزدار. اسكەري انت قابىلداۋ كۇنىمەن شىن جۇرەكتەن قۇتتىقتايمىن! وقۋ باعدارلاماسىن تابىستى يگەرىپ, قازاقستان رەسپۋبليكاسى قارۋلى كۇشتەرىنىڭ ۇلگىلى اسكەري قىزمەتشىسى بولۋلارىڭىزعا شىن تىلەكتەستىگىمدى بىلدىرەمىن. باتىر بابامىز باۋىرجان مومىش ۇلىنىڭ ء«تارتىپسىز ەل بولمايدى, تارتىپكە باس يگەن ەل - قۇل بولمايدى» دەگەن قاناتتى ءسوزىن ەستەن شىعارماي, وتانىمىزدىڭ يگىلىگى مەن دامۋى ءۇشىن ايانباي قىزمەت ەتۋگە شاقىرامىن», دەگەن ءوڭىر باسشىسى جاس وتان قورعاۋشىلارعا ساتتىلىك تىلەدى.
ۇشقىشتار ينستيتۋتى – ورتالىق ازياداعى ۇشۋ جانە ينجەنەرلىك-تەحنيكالىق قۇرامدى بىرلەسىپ وقىتۋدى جۇزەگە اسىراتىن جالعىز اسكەري وقۋ ورنى. تاۋەلسىزدىك العالى اسكەري ينستيتۋتتان قارۋلى كۇشتەر قاتارىنا 2700-دەن استام وفيتسەر قوسىلدى.
قازىرگى ۋاقىتتا وقۋ ورنى 13 بىلىكتىلىك بويىنشا جوعارى اسكەري-كاسىپتىك ءبىلىم بەرۋ باعدارلاماسىمەن وفيتسەرلىك كادرلاردى وقۋ پروتسەسىنە زاماناۋي اۆياتسيالىق ترەناجەردى ەنگىزە وتىرىپ, ازىرلەۋدە. 2021 جىلدان باستاپ ينستيتۋت ۇشقىشسىز ۇشۋ اپپاراتتارىن پايدالانۋ بويىنشا ماماندار دايارلاۋدى باستادى.
