ۇلتتىق سپورت جانە مەملەكەتتىك مۇددە

وسىندايدا سايىن دالانىڭ توسىندە ەركىن ويقاستاپ, جۇيرىك جاراتقان, كوكپار تارتىپ, تەڭگە ىلگەن, بايگەگە ءتۇسىپ, ات ۇستىندە اۋدارىسپاقتان كۇش سىناسقان قازاق ۇلدارىنىڭ ويىنىن قايتا جاڭعىرتۋعا نە كەدەرگى دەپ تولعاناسىڭ. كەشە ۇلتتىق سپورت قاۋىمداستىعى مەن باق باسشىلارى باس قوسىپ, وسى تاقىرىپتى تەرەڭنەن قاۋزادى, ورامدى وي ايتتى.

باسقوسۋدا ۇلتتىق سپورت قاۋىمداستى­عىنىڭ پرەزيدەنتى يسلامبەك سالجانوۆ قاۋىمداستىقتىڭ جىل ىشىندە ۇيلەسىمدى ىسكە اسىرعان جۇمىستارىن تۇگەندەپ, سالاداعى وزەكتى ماسەلەلەر مەن كەدەرگىلەردى دە جىپكە تىزگەندەي باياندادى. جاڭا باسشىلىقتىڭ ۇلتتىق ويىنداردى جاڭاشا باعىتتا دامىتۋعا دەن قويىپ وتىرعانى بىردەن بايقالدى. مىسالى, جىل ىشىندە ۇلتتىق سپورت قاۋىمداستىعىنىڭ قۇرامىنا ەنگەن 9 فەدەراتسيانىڭ جەتەۋىنىڭ باسشىسى جاڭادان سايلانعان. ءارى ولاردىڭ بارلىعى دەرلىك ءتۇرلى سالادا ءىستىڭ كوزىن تابا بىلگەن كاسىپكەرلەر ەكەن.

سۋرەتتى تۇسىرگەن – يگور بۋرگاندينوۆ

– بۇگىن ءبىز ۇلتتىق سپورتقا قاتىستى ماسەلەلەردى ورتاعا سالساق, پىكىرلەسسەك, كەڭەسسەك دەپ نيەتتەندىك. سەبەبى بارشاڭىز بىلەسىزدەر, ۇلتتىق سپورتتىڭ ارتىندا ۇلتتىڭ تاريحى, ءداستۇرى, رۋحى تۇر. بىزگە دەيىن قاۋىمداستىقتىڭ قۇرامىندا 6 فەدەراتسيا بولعان. قازىر 9-عا جەتتى: «كوكپار», «بايگە», «جامبى اتۋ», «اۋدارىسپاق», «تەڭگە ءىلۋ», «قۇسبەگىلىك», ء«داستۇردى ساداق اتۋ», «توعىزقۇمالاق», «اسىق اتۋ». ۇلتتىق سپورتتى ناسيحاتتاۋ, دامىتۋ باعىتىنداعى جۇمىستار ۇزىلگەن جوق. كەشەگى سايلانعان فەدەراتسيا پرەزي­دەنتتەرى – تاۋەلسىزدىك جىلدارىندا بەلگىلى ءبىر جەتىستىككە جەتكەن, وزدەرىن ۇلت جاناشىرى رەتىندە تانىتقان ازاماتتار. ولار ءبىلىمى, تاجىريبەسىن جانە ماڭداي تەرىمەن تاپقان قاراجاتىن ۇلتتىق سپورتتى دامىتۋعا جۇمساپ وتىر. قولدان كەلگەنشە فەدەرتسيانى دامىتۋعا ۇلەس قوسىپ كەلەدى, دەدى ي.سالجانوۆ.

وسى ورايدا ۇلتتىق سپورت قاۋىمداس­تىعىنىڭ پرەزيدەنتى 9 فەدەراتسيا ءوز الدىنا بولەك ۇيىمداستىرعان ايتۋلى الاماندار جايىندا تارقاتىپ ايتىپ بەردى. سونىڭ ىشىندە قاۋىمداستىق سپورتشىلارى 12 حالىقارالىق جارىستا 39 التىن, 27 كۇمىس, 29 قولا مەدال جەڭىپ العانىن ايرىقشا ايتۋعا بولادى.

ۇلتتىق سپورت تۇرلەرى قاۋىمداستى­عىنىڭ قۇرامىنداعى 9 فەدەراتسيادا رەسپۋبليكا بويىنشا 7 500-گە جۋىق جاتتىقتىرۋشى بار. ياعني ولار ەلدەگى 15 639 ۇلتتىق سپورت سەكتسياسىندا جۇمىس ىستەيدى. ناتيجە ءتاپ-ءتاۋىر. دەگەنمەن ۇلتتىق سپورتتىڭ دامۋىنا كەسە-كولدەنەڭ تۇرعان كەدەرگىلەر دە بار. ايتار بولساق, سپورت جاناشىرلارىن ەڭ ءبىرىنشى كەزەكتە ينفراقۇرىلىمنىڭ جايى الاڭداتادى. ءيا, قازىر قاۋىمداستىق قۇرامىنا كىرەتىن 9 سپورتتىڭ التاۋى اتپەن تىكەلەي بايلانىس­تى بولىپ تۇر. سپورتتىڭ وسى تۇرلەرىنەن جارىستار جازدا كوگالدا وتسە, قىستا وتكىزۋ ءۇشىن ەلدە حالىقارالىق ستاندارتتارعا ساي جابىقتالعان بىردە-ءبىر نىسان جوق. ەلدە 40-قا جۋىق يپپودروم بولعانىمەن, وكىنىشكە قاراي, ولار دا حالىقارالىق جارىستار وتكىزۋگە جارامايدى. سالدارىنان قاۋىمداستىق جۇزدەن جۇيرىكتەر باق سىنايتىن ۇشقىر بايگەدەن دە حالىقارالىق جارىس وتكىزە الماي وتىر. سوسىن, مامان دايارلاۋعا, حالىقارالىق جارىستار وتكىزۋگە مىقتاپ دەن قويۋ قاجەت. بۇعان تاعى قارجى كەرەك. ابىروي بولعاندا ۇلتتىق سپورت تۇرلەرى قاۋىمداستىعىنىڭ باسشىلىعى ەلدىگى جوو-مەن بەرىك بايلانىس ورناتىپ, مامان دايارلاۋ بويىنشا وقۋ باعدارلاماسىن ازىرلەۋگە كىرىسىپ كەتكەن.

دوڭگەلەك ۇستەلدە ي.سالجانوۆ حالىق­ارالىق جارىستاردا توپ جارىپ, ۇزدىكتەردى قاپى قالدىرىپ جۇرگەن شاباندوز باۋىر­جان مىرزاباەۆ جونىندە تەبىرەنە, مەيىرلەنە اڭگىمەلەدى. باۋىرجاندى ەلدە ەكىنىڭ-ءبىرى تاني قويماس. ول – الماتىنىڭ تۋماسى. بالا جاستان اتتىڭ قۇلاعىندا ويناپ وسكەن. چەحيادا قورادا قارا جۇمىسقا جەگىلىپ جۇرگەنىنە قاراماي, جۇيرىك جاراتىپ, چەحيانىڭ ءۇش دۇركىن جەڭىمپازى بولعان. كەيىن گەرمانيادا 111 بايگەنى ۇتىپ, رەكورد ورناتقان. مۇنىمەن توقتاماي, جاپونيا حالقىن دا ءتانتى ەتكەن. ورايلى ساتتە ي.سالجانوۆ جۋرناليستەردى حالىقارالىق مەديادا ەسىمى ءجيى ايتىلاتىن باۋىرجان مىرزاباەۆتىڭ كوركەم فيلم تۇسىرۋگە بەرگىسىز ءومىرىن ەلگە تانىتۋعا شاقىردى.

وسىدان سوڭ باس رەداكتورلار كلۋبىنىڭ پرەزيدەنتى بيبىگۇل جەكسەنباي, ۇلتتىق مەديا قاۋىمداستىعىنىڭ توراعاسى كەمەلبەك ويشىباەۆ, «قازاق گازەتتەرى» جشس باس ديرەكتورى ديحان قامزابەك ۇلى, «حابار» اگەنتتىگى اكتسيونەرلىك قوعامىنىڭ باس ديرەكتورى بەرىك ءۋالي, Túrkistan حالىقارالىق ساياسي اپتالىعىنىڭ باس رەداكتورى باۋىرجان باباجان ۇلى جانە باسقا دا اقپارات قۇرالدارىنىڭ باسشىلارى ۇسىنىس-پىكىرىن ايتتى. ونىڭ ىشىندە ۇلتتىق سپورتقا عىلىمي نەگىز بەرۋگە, مامان دايارلاۋعا, ءتىپتى ءار اقپارات قۇرالى ءبىر سپورتتى كەمەلىنە جەتكىزىپ ناسيحاتتاۋ تۋرالى دا ۇسىنىس ايتىلدى. سوڭىرا تەلەارنا, ءباسپاسوز, سايت باسشىلارى ۇلتتىق سپورتتى تانىتۋعا نەگىزدەلگەن تىڭ يدەيالارىن, باعدارلامالارىن ۇسىندى.

قازىر قاۋىمداستىق وكىلدەرى كوشپەن­دىلەر ويىنىنا دايىندىقتى باستاپ كەتكەن. ەستە بولسا, IV دۇنيەجۇزىلىك كوش­پەلىلەر ويىنى بىلتىر تۇركيادا وتكەن ەدى. ەندى كەلەر جىلى دۋى باسىم دودادا باق سىنايتىن جاھان سپورتشىلارى بىزگە كەلەدى. وسى جارىستىڭ ابىرويلى ءوتۋىن پرەزيدەنت قاسىم-جومارت توقاەۆ تا نازارعا العان. كوشپەلىلەر ويىنى ءبىرىنشى رەت ۇيىمداستىرىلعاندا, جارىسقا قاتىسۋعا 19 مەملەكەتتەن 583 سپورتشى نيەت بىلدىرسە, بىلتىر تۇركيادا وتكەن ويىن­دا 102 ەلدەن 3 مىڭنان اسا سپورتشى باق سىناعان. كەلەر جىلى, ياعني ەلدە وتەتىن جارىسقا دا 3 مىڭنان اسا سپورتشى جانە 15 مىڭنان اسا تۋريست كەلەدى دەگەن جوسپار دا بار ەكەن.

كەزدەسۋ بارىسىندا ۇلتتىق سپورت قاۋىمداستىعى V دۇنيەجۇزىلىك كوش­پەلى­لەر ويىندارى قارساڭىندا, ياعني 1 قىر­­­كۇيەكتەن «Alaman» مەديا بايقاۋىن جا­­ريالاناتىنىن حابارلادى. بۇل قادام – ۇلتتىق سپورت تۇرلەرىن كەڭىنەن نا­سيحاتتاۋعا جول اشادى دەپ تۇيدىك. باي­قاۋعا ماتەريالدار قىر­كۇيەكتەن باستاپ كەلەر جىلى 1 ناۋرىزعا دەيىن قابىلدانادى. بايقاۋعا قالامى ۇشقىر ەل جۋرناليستەرى, اۆتورلار جانە شەتەلدىك باق-تان دا تىلشىلەر قاتىسىپ, ۇزدىك باعدارلاما, ۇزدىك اناليتيكالىق ماتەريال, ۇزدىك تانىمدىق ماتەريال, ۇزدىك سۇحبات, ۇزدىك فوتوسۋرەت, شەتەلدىك باق-تا جاريالانعان ۇزدىك ماتەريال, الەۋمەتتىك جەلىدەگى ۇزدىك ماتەريال اتالىمدارى بويىنشا جۇزدەن جۇيرىكتەر انىقتالماق. ءار اتالىم بويىنشا جەڭىمپازدار 1 ملن تەڭگەدەن السا, قالعان جۇلدەگەرلەردە سايكە­سىنشە قوماقتى قارجىلاي سىي­اقىمەن ماراپاتتالادى.