فوتو: uww.org
– اۋەلى جەڭىسىڭ قۇتتى بولسىن, يسحار. قازاق ەلى بالۋاندارىنان جاستار اراسىنداعى الەم چەمپيوناتىنىڭ التىن مەدالىن جەتى جىلدان بەرى كۇتتى.
– راحمەت قۇتتىقتاۋىڭىزعا. دۇرىس ايتاسىز, ءبىزدىڭ ەلدىڭ بالۋاندارى جاستار اراسىنداعى الەم چەمپيوناتىنىڭ بيىگىنە شىعا الماي كەلە جاتقانى نامىسىمىزدى قايرادى. بۇل مەنىڭ جاستار اراسىنداعى سوڭعى الەم چەمپيوناتىم ەدى. سوندىقتان نە بەل كەتەر, نە بەلبەۋ ۇزىلەر دەپ بارىمدى سالدىم. بۇعان دەيىن كىشى جاسوسپىرىمدەر, جاسوسپىرىمدەر, جاستار اراسىنداعى الەم بىرىنشىلىكتەرىنە بەس مارتە قاتىستىم, التىن مەدال بۇيىرمادى, قولا مەن كۇمىستى قاناعات تۇتتىم. وسى جولى بارىمدى سالدىم.
– بەلدەسۋلەرگە توقتالساڭ, قالاي ءوربىدى, قاي ەلدىڭ بالۋانىنان قاۋىپتەندىڭ؟
– كىلەمدەگى قارسىلاسىڭنىڭ ەشقايسى دا وسال ەمەس. دەسە دە سولاردىڭ ىشىندە رۋمىن بالۋانى دەنيس ميحايمەن جولىم تۇيىسسە قالاي بولار ەكەن دەگەن ىشتەي ۋايىم بولدى. وتە تەگەۋرىندى سپورتشى. بىراق ەكەۋمىز ەكى توپقا تۇستىك تە, ول فينالدىق بەلدەسۋگە دەيىن جەتپەي, ورتا جولدا ءسۇرىندى. وسى جولعى الەم چەمپيوناتىنىڭ بارلىق بەلدەسۋى اۋىر ءوتتى, قاي-قايسى دا وسال ەمەس, جاسوسپىرىمدەر, جاستار اراسىندا الەم چەمپيونى اتانعان بالۋاندار, ەۋروپا, ازيا بىرىنشىلىكتەرىندە ءبارىن جىققان جىگىتتەر قاتىستى. باعىمىز جانىپ, ەلىمىزدىڭ مەرەيىن تاسىتقانىما تاۋبە دەيمىن.
– فينالدا ازەربايجاندىق بالۋاندى ۇتتىڭ. 2021 جىلى رەسەيدىڭ ۋفا قالاسىندا وتكەن جاسوسپىرىمدەر اراسىنداعى الەم چەمپيوناتىندا قولا جۇلدە ءۇشىن بەلدەسۋدە ازەربايجاندىق ەلمير اليەۆكە ەسە جىبەرىپ ەدىڭ, ەندى مىنە اليەۆتىڭ جەرلەسى فاريد سادىحلىنى فينالدا ايقىن باسىمدىقپەن جىقتىڭ.
– ءسىز اتاعان ەلمير اليەۆ وتە قارۋلى, تەحنيكالىق الەۋەتى دە زور بالۋان. نەگىزى 55 كەلى سالماقتا الەم چەمپيوناتىنا سادىحلى ەمەس, اليەۆ قاتىسۋى ءتيىس ەدى. جاتتىعۋ جيىنىندا قولىن جاراقاتتاپ الىپ جولى تۇسپەدى. ءوزىم دە اليەۆتى كۇتكەن ەدىم, ەكى جىل بۇرىنعى كەتكەن ەسەنى قايتارسام دەگەن ىشتەگى ارپالىس ءالى دە بار.
– ءبىز چەمپيونداردى قۇرمەتتەۋ, قوشەمەت كورسەتۋدى كەيدە اسىرا ورىنداپ جىبەرەمىز. ءتىپتى كەيبىرىن قۇشاعىمىزعا قاتتىراق قىسىپ, سپورتتاعى بيىگىنە جەتۋىنە كەدەرگى كەلتىرگەنىمىزدى دە اڭداماي قالامىز. ءوزىڭدى دە الەم چەمپيوناتىنان ءسان-سالتاناتپەن قارسى الدى. وبلىس باسشىلىعىنان باستاپ قۇرمەتتەپ جاتىر. كۇندە دۋمان, كۇندە توي سپورتشىنىڭ جاتتىعۋىنا كەدەرگى كەلتىرمەي مە؟
– ويىڭىزدى ءتۇسىندىم, ارينە جاتىعۋدان قول ۇزبەۋ كەرەك. ءبىز الەم چەمپيوناتىنان ورالعان سوڭ ون شاقتى كۇن دەمالىس الدىق. مۇمكىندىگىنشە كەزدەسۋ, سۇحبات, جيىن-تويدى سول ون كۇننىڭ ىشىندە وتكەرىپ الساق دەيمىز. ءارى قاراي جاتتىعۋىمىزعا الاڭسىز كىرىسۋ ءۇشىن. دۇرىس ايتاسىز, سپورتشى ءبىر كۇندىك جاتتىعۋدان قول ۇزسە, فيزيكالىق الەۋەتىن قالپىنا كەلتىرۋگە از كۇش جۇمسامايدى. جاتتىعۋ كەزىندەگى جۇكتەمە دە ەسەلەپ ارتا تۇسەدى. مۇنىڭ ءبارى دە جۇرەككە سالماق. سوندىقتان وقۋ-جاتتىعۋ جيىندارى كەزىندە بارىنشا بابىمىزدى جوعالتىپ الماس ءۇشىن قىدىرۋ, توي تويلاۋ سەكىلدى عادەتتى كەيىنگە ىسىرامىز. ءبىز ءۇشىن ماڭىزدىسى ايانباي تەر توگىپ, تىنىمسىز جاتتىعۋ عانا.
– ەندىگى مەجە وليمپيادا شىڭى عوي. جاقسىلىق ۇشكەمپىروۆ, ءشامىل سەرىكوۆتىڭ جازعى وليمپيادا ويىندارىنان التىن مەدال ولجالاعانىنا 43 جىل, يۋري مەلنيچەنكونىڭ اتلانتا وليمپياداسىنان التىن مەدالمەن ورالعانىنا 27 جىلدان استى. ءبىزدىڭ ەلدىڭ بالۋاندارىنا ءتورت جىلدا اينالىپ سوعاتىن دودانىڭ التىن مەدالى ءالى بۇيىرار ەمەس.
– ءبارىمىزدىڭ دە جانىمىزعا باتادى ارينە. دەگەنمەن دە ءۇمىتىمىزدى ۇزبەيىك, تالانتتى جاستاردىڭ شوعىرى ءوسىپ كەلەدى, سولاردىڭ اراسىنان ماڭدايى جارقىراپ مىقتى بالۋاندار شىعاتىنىنا بەك سەنەمىن. تەك ەڭبەكتەنىپ جاتتىعۋ كەرەك. مەنىڭ دە ارمانىم وليمپيادا چەمپيونى اتانىپ, ەلىمدى قۋانتسام دەيمىن.
– 55 كەلىدە كۇرەسىپ ءجۇرسىڭ, وليمپيادالىق سالماق سانالاتىن 60 كەلىگە اۋىساسىڭ با؟
– ءدال بۇگىن-ەرتەڭ 60 كەلىگە وتەمىن دەمەيمىن. ويتكەنى وليمپيادالىق سالماق بولعاندىقتان باسەكە وتە جوعارى. جەر جۇزىندە عانا ەمەس, ءوز ەلىمىزدە دە 60 كەلىدە بالۋانداردىڭ ءباسى جوعارىلاپ كەلەدى. ازىرگە وسى 55 كەلىدە كۇرەسەمىن. ەرەسەكتەر اراسىنداعى الەم چەمپيوناتىنا دا وسى ءوزىمنىڭ سالماعىمدا قاتىسىپ, چەمپيون اتانعىم كەلەدى. ودان كەيىن 60 كەلى سالماق دارەجەسىندە باعىمدى سىناپ كورسەم دەيمىن.
– اڭگىمەڭىزگە راحمەت!
اڭگىمەلەسكەن قۋانىش نۇردانبەك ۇلى,
«Egemen Qazaqstan»
