تەحنيكالىق جانە كاسىپتىك بىلىمگە قاتىستى زاماناۋي ترەندتەردى سالاعا ەنگىزۋ – كوللەدجدەر الدىنداعى ماڭىزدى ميسسيا بولماق. مامانداردىڭ پىكىرىنە سۇيەنسەك, ونەركاسىپتى دامىتۋداعى جاھاندىق ترەندتەر قازىرگى كۇنى نەگىزگى جەتى باعىتقا ويىسىپ وتىر. ونىڭ العاشقى ەكەۋى – تسيفرلاندىرۋ بازاسىنداعى تەحنولوگيالىق دامۋ مەن ەكونوميكالىق كۇش-قۋاتتىڭ ازيا ەلدەرىنە قاراي اۋىسۋى. ءومىردىڭ ءتۇرلى سالاسىن تسيفرلاندىرۋ ەلىمىزدە 3D پرينتەر, بۇلتتى سەرۆيس, Big data, 5G جيىلىگى, كۆانتتىق سەرۆيس جانە تاعى باسقا جۇيەلەردە كورىنىس تاۋىپ وتىر. عالىمدار 2030 جىلعا قاراي جەر بەتىندە ۆيرتۋالدى فابريكالار كوبەيىپ, جاساندى ينتەللەكت كەز كەلگەن وندىرىستە باستى ورىنعا شىعاتىنىن بولجاپ وتىر. بۇل كوشتەن قازاقستان دا قالماۋى كەرەك. ونىڭ ۇستىنە كەيىنگى ۋاقىتتا دامىعان ەلدەر وزدەرىنىڭ ۇلكەن زاۋىت-فابريكالارىن ءبىزدىڭ مەملەكەتتىڭ اۋماعىندا تۇرعىزۋعا كوڭىل ءبولىپ وتىرعانى تاعى بار. ولارعا جەرگىلىكتى جەردەن جاڭا تەحنولوگيانىڭ ءتىلىن مەڭگەرگەن جاس ماماندار قاجەت بولادى.
كەلەسى باعىتتار – ايماقتاردىڭ وزىندىك ونەركاسىپتىك ساياساتىن دامىتۋ, جاسىل ەكونوميكا, وندىرىستەردىڭ تۇيىق تسيكلدارىنا ءمان بەرۋ, كووپەراتسيالاردىڭ جانە ونەركاسىپتىك-يننوۆاتسيالىق دامۋداعى مەملەكەت ءرولىن كۇشەيتۋ. وسى جەتى ترەند ارقىلى بولاشاقتا كاسىپتىك ءبىلىم بەرۋدىڭ قاعيدالارىن جەتىلدىرۋ شارت.
– پەداگوگ مامانداردىڭ باستى ماقساتى – زامانعا ساي ساپالى ءبىلىم بەرۋمەن قاتار, جۇمىس بەرۋشىلەردىڭ تالاپتارىنا ساي كادر دايارلاۋ. ول ءۇشىن وقۋ ءۇردىسىنىڭ مازمۇنىنا وزگەرتۋلەر ەنگىزىلىپ, دۋالدى وقىتۋ باعدارلامالارىن جەتىلدىرۋگە باسىمدىق بەرىلگەن. ياعني ستۋدەنتتەر ءۇشىن ءبىرىنشى كەزەكتە تاجىريبەلىك داعدىلاردى دامىتۋعا جاعداي جاساۋ ماڭىزدى. دۋالدى ءبىلىم بەرۋ باعدارلاماسى ەلىمىزدە 2014 جىلدان بەرى جۇزەگە اسىرىلىپ كەلەدى. سول كەزدەن بەرى حالىقارالىق تاجىريبە مەن وزىق ءادىس-تاسىلدەرگە باسىمدىق بەرىلىپ وتىر. بۇل تۇرعىدا ءار ءوڭىردىڭ ەكونوميكالىق جانە الەۋمەتتىك ەرەكشەلىكتەرىن ەسكەرگەن ءجون. وقۋ باعدارلامالارى دا وسىعان باعىتتالۋعا ءتيىس. ەكونوميكانى تسيفرلاندىرۋ, ء«ومىر بويى وقۋ» قاعيداتتارىن دامىتۋ ارقىلى جۇمىسشىلاردىڭ بىلىكتىلىگىن كوتەرۋگە مۇمكىندىك بار. جىل سايىن ەڭبەك نارىعىنا 400 مىڭداي جاس مامان شىعادى. الايدا ورتا بىلىكتى ماماندارعا دەگەن سۇرانىس جىل سايىن ءوسىپ, بۇگىندە ولارعا دەگەن قاجەتتىلىك 70 پايىزعا جەتكەن. سوندىقتان «ۇلتتىق بىلىكتىلىك جۇيەسى» اياسىندا كاسىپتىك بىلىكتىلىكتى ارتتىرۋدىڭ جاڭا ستاندارتتارى بىرتىندەپ قالىپتاسۋى كەرەك. بيىلعى شىلدەدە مەملەكەت باسشىسى قاسىم-جومارت توقاەۆ «كاسىپتىك بىلىكتىلىك تۋرالى» زاڭعا قول قويدى. قۇجات نەگىزىندە 632 كاسىپتىك ستاندارت ازىرلەنىپ, ول 3 520 ماماندىقتى قامتىدى. بۇرىن بىلىكتىلىك داعدىلارى 10 جىلعا دەيىن جارامدى بولسا, كەيىنگى جىلدارداعى ۇردىستەر نەبارى 2-5 جىلعا دەيىن عانا جەتەتىنىن كورسەتىپ وتىر. وسى سەبەپتەن كوپتەگەن ماماندىق بويىنشا تۇلەكتەردىڭ ءبىراز جىلدان سوڭ كوللەدجدەرگە اينالىپ سوعىپ, ءوز داعدىلارىن ءارى قاراي جەتىلدىرۋگە مۇمكىندىك الۋى زاڭدى دەگەن تۇجىرىمعا كەلدىك. بۇعان قوسا ورتا بىلىكتىلىكتى قاجەت ەتەتىن ماماندىق تۇرلەرى مىندەتتى جانە ەرىكتى سەرتيفيكاتتاۋعا جاتادى, – دەدى پاۆلوداردا وتكەن تەحنيكالىق جانە كاسىپتىك ءبىلىم بەرۋ ۇيىمدارىنىڭ رەسپۋبليكالىق تامىز كەڭەسىندە ەڭبەك جانە حالىقتى الەۋمەتتىك قورعاۋ ۆيتسە-ءمينيسترى ولجاس ورداباەۆ.
وقۋ-اعارتۋ مينيسترلىگى تەحنيكالىق جانە كاسىپتىك ءبىلىم دەپارتامەنتىنىڭ ديرەكتورى سەرىك جارتىباەۆ جاقىن ۋاقىتتا ەلىمىز بويىنشا جاڭادان 20 تسيفرلىق كوللەدج قۇرىلاتىنىن جەتكىزدى. قازىرگى كۇنى كەيبىر ورتا كاسىپتىك وقۋ ورىندارى كوممەرتسيالاندىرۋ ۇدەرىسىنە بەت بۇرعان. مىسالى, كوكشەتاۋداعى كوللەدج ءبىر جىلدا وزدەرى شىعارعان تاۋارلار مەن قىزمەتتەردەن 83 ملن تەڭگە تابىس تاپقان. ءبىلىم ورداسى ەندىگى جەردە شارۋاشىلىق جۇرگىزۋ قۇقىعىنداعى مەملەكەتتىك مەكەمەگە اينالۋدى جوسپارلاپ وتىر. مۇنداي مىسالدار ەلىمىزدىڭ ءار تۇكپىرىندە بار. مەملەكەتتىڭ ءوزى دە بۇعان مۇددەلى. جىل سايىن ەلىمىزدە 133 مىڭ جاس ازامات كاسىپتىك جانە تەحنيكالىق تەگىن بىلىممەن قامتىلىپ, ولارعا جاتاقحانا مەن شاكىرتاقى ۇسىنىلادى. جالپى, ستۋدەنتتەردى جاتاقحانامەن قامتۋ ماسەلەسى سوڭعى ۋاقىتتا وزەكتى بولا تۇسكەن. الداعى قىركۇيەك ايىندا ەلىمىزدىڭ وقۋ ورىندارىنا ستۋدەنتتەردى جاتاقحانامەن قامتۋدى مىندەتتەيتىن جاڭا زاڭ نورمالارى كۇشىنە ەنەدى. بۇل باعىتتا پاۆلودار وبلىسى جاقسى ناتيجەلەرىمەن كوزگە ءتۇسىپ وتىر. ءوڭىردىڭ اۋماعىندا كوللەدجدەردىڭ ستۋدەنتتەرى ءۇشىن جاڭادان
4 جاتاقحانا اشىلدى. جەرگىلىكتى وقۋ ورىندارى ستۋدەنتتەردىڭ بيزنەس يدەيالارىن ومىرشەڭ ەتۋگە دە بارىنشا دەن قويىپ, قولداۋ شارالارىن ۇزبەي جۇرگىزەدى.
ايتىپ وتەيىك, بۇگىنگى تاڭدا ەلىمىزدەگى 800-گە جۋىق كوللەدجدە دۋالدى باعىت بويىنشا 61 مىڭنان استام ستۋدەنت وقيدى. وقۋ ورىندارى 6 مىڭنان استام كاسىپورىنمەن ارىپتەستىك ورناتىپ, ولاردىڭ تاپسىرىسىمەن مامان دايارلايدى.
پاۆلودار وبلىسى
