پرەزيدەنتكە ۆەدومستۆونىڭ بيىلعى ءۇشىنشى توقساننىڭ باسىنان بەرى اتقارعان جۇمىستارىنىڭ نەگىزگى ناتيجەسى مەن بۇعان دەيىن بەرىلگەن تاپسىرمالارىنىڭ ورىندالۋ بارىسى جانە الداعى كەزەڭگە ارنالعان جوسپارى تۋرالى مالىمەت بەرىلدى.
قاسىم-جومارت توقاەۆقا قازاقستان اۋماعىندا لاڭكەستىك ارەكەت جاساۋدى جوسپارلاعان راديكالدى توپتىڭ قۇرىقتالعانى تۋرالى باياندالدى. تەرروريستىك قىلمىستار بويىنشا 7 سوتقا دەيىنگى تەرگەۋ امالدارى باستالدى جانە 3 ەكسترەميست سوتتالدى.
ەرمەك ساعىمباەۆتىڭ ايتۋىنشا, تەرروريزمگە قارسى ءىس-قيمىل شارالارىن جەتىلدىرۋ ماقساتىندا ۇقك تەرروريزمگە قارسى ورتالىعى 103 وقۋ-جاتتىعۋ جيىنىن ۇيىمداستىردى.
سونىمەن قاتار مەملەكەت باسشىسىنا كريمينوگەندىك احۋالدى جاقسارتۋ جۇمىستارىنىڭ ناتيجەلەرى تۋرالى باياندالدى. اتاپ ايتقاندا, قوعامعا قاۋىپ توندىرگەن 5 قىلمىستىق توپ ارەكەتىنىڭ جولى كەسىلدى. زاڭسىز قارۋ اينالىمىنا قاتىسى بار 2 ارنا جويىلدى. ۇلتتىق قاۋىپسىزدىك ورگاندارى پوليتسيامەن بىرلەسىپ, قارۋ جاسىرىلعان 12 ورىندى انىقتادى. جالپى سانى 59 قارۋ, 3 گراناتا جانە 3 339 وق-ءدارى تاركىلەندى.
ەسىرتكىگە قارسى كۇرەس بارىسىندا 7 زەرتحانا, 8 حالىقارالىق جانە ايماقتىق ەسىرتكى تاسىمالىنىڭ جولى كەسىلدى. 660 كەلىدەن استام ەسىرتكى جانە 17 توننادان اسا پرەكۋرسور تاركىلەندى.
بۇدان بولەك, مەملەكەتتىك شەكارانى قورعاۋ جانە زاڭسىز كوشى-قونمەن كۇرەس سالاسىندا 4 257 قۇقىق بۇزۋشى ۇستالدى. قۇنى 3,8 ميلليارد تەڭگەدەن اساتىن ۆاليۋتا مەن تاۋارلاردىڭ زاڭسىز تاسىمالدانۋىنا جول بەرىلمەدى. سونداي-اق قارۋ, وق-ءدارى جانە ەسىرتكى الىپ وتۋگە قاتىستى 120 ارەكەتكە توسقاۋىل قويىلدى.
اقپاراتتىق قاۋىپسىزدىكتى قامتاماسىز ەتۋ بارىسىندا ەلىمىزدىڭ اسا ماڭىزدى ينفراقۇرىلىم نىساندارىنا جاسالعان 36 ميلليوننان استام كيبەرشابۋىل مەن 866 DDoS-شابۋىل تويتارىلدى.
كەزدەسۋ سوڭىندا قاسىم-جومارت توقاەۆ ۇلتتىق قاۋىپسىزدىك ورگاندارىنىڭ جۇمىس باعىتتارى بويىنشا بىرقاتار ناقتى تاپسىرما بەردى.
