اتاۋلى ءىس-شارانى وتكىزۋ ءۇشىن اۋىلدىق ايماقتاردى تۇراقتى دامىتۋ قورى, سونداي-اق كاتونقاراعاي اۋدانىنىڭ كاسىپكەرلەرى قولداۋ ءبىلدىردى. مەرەيتوي اياسىنداعى باستى ءىس-شارا – جازۋشىنىڭ تۋعان جەرى شىڭعىستاي اۋىلىندا ورالحان بوكەي مۋزەي ءۇيىنىڭ اشىلۋى. مۋزەي جەرگىلىكتى اقساقالداردىڭ باتاسىمەن جازۋشىنىڭ تۋعان جەرى شىڭعىستاي اۋىلىندا اشىلدى.
اۋىلدىق ايماقتاردى تۇراقتى دامىتۋ قورىنىڭ قۇرىلتايشىسى سەرىك تولىقپاەۆتىڭ دەمەۋشىلىگىمەن 10 ملن تەڭگەگە ورالحان بوكەي تۇرعان ءۇيدى ساتىپ الىپ, مۋزەي جاساقتادى. قورداعىلار مۋزەيدىڭ تۋريستەر اراسىندا دراماتۋرگ شىعارماشىلىعىن ناسيحاتتاپ قانا قويماي, جالپى ءوڭىردىڭ تۋريستىك الەۋەتىن ارتتىرۋعا ۇلەس قوساتىنىنا سەنىم ءبىلدىردى.
«ورالحان بوكەيدىڭ 80 جىلدىعىنا ورايلاستىرىلعان ءىس-شارالار كاسىپكەرلەردىڭ قولداۋىمەن قولعا الىندى. بۇگىن – مەرەيتويدىڭ العاشقى كۇنى. قازىر قالامگەر اتىنداعى مۇراجاي-ءۇيدىڭ سالتاناتتى اشىلۋى بولادى. بيىل قورىمىز 54 ملن تەڭگە كولەمىندە جەرگىلىكتى كاسىپكەرلەر قاراجات جيناپ, جازۋشىنىڭ بالالىعى وتكەن تۋعان ءۇيىن ساتىپ الىپ, مۇراجايعا اينالدىردى. مۇراجاي مەملەكەت قاراۋىنا بەرىلدى. جالپى باس دەمەۋشىلەر رەتىندە قاتونقاراعاي كاسىپكەرلەرى قولداۋ ءبىلدىردى. ودان كەيىن ەتنو اۋىلدا الامان بايگە وتەدى. جالپى, ورالحان بوكەيدىڭ 80 جىلدىعىن تويلاۋ رەسپۋبليكا كولەمىندە, حالىقارالىق دەڭگەيدە وتپەك. 15 قىركۇيەكتە استانادا جازۋشى شىعارماشىلىعىنا ارنالعان دوڭگەلەك ۇستەل, «ازىرەت سۇلتان» مەشىتىندە قۇران باعىشتاپ, اس بەرۋ جوسپارلانىپ وتىر. ودان كەيىن «قار قىزى» پەساسى ساحنالاندىرىلادى. ال الماتىدا جازۋشىلار وداعى حالىقارالىق كونفەرەنتسيا ۇيىمداستىرىپ, اقىندار ايتىسى وتكىزىلەدى. كاتونقاراعاي دەگەندە ەسىمىزگە بىردەن ورالحان بوكەي ورالادى. ورالحان – وسى جەردىڭ كوركەمدىگىن, تۇمسا تابيعاتىن تالايعا سوزبەن سۋرەتتەپ بەرگەن قالامگەر. سوندىقتان ونىڭ مەرەيتويىن ابىرويمەن وتكىزۋ – ءبىز ءۇشىن امانات», دەدى اۋىلدىق ايماقتاردى تۇراقتى دامىتۋ قورى باسشىسى سەرىك ءجۇنىسوۆ.
ءىس-شاراعا ورالحان بوكەي شىعارمالارىنا ارقاۋ ەتكەن, تابيعاتىن جىرلاۋدان جالىقپاعان ءور التايدىڭ تورىنە جازۋشىنىڭ جاقىندارى, اقىندار, جەرلەستەرى جينالدى. تالانتتى ورەننىڭ ءبيۋستى مەن جازۋشى اتىنداعى سكۆەردىڭ اشىلۋىنا كۋا بولدى. سونداي-اق شىڭعىستاي اۋىلىندا ء«تور التاي بوياۋلارى» اتتى رەسپۋبليكالىق پلەنەر-كورمەسى ۇيىمداستىرىلدى. سۋرەتشىلەر 50-دەن استام ەتيۋد سالىپ, ورىندالعان جۇمىستاردى و. بوكەي مۇراجايىنا سىيعا تارتتى.
كاتونقاراعاي اۋدانىنىڭ قۇرمەتتى ازاماتى, جازۋشىلار جانە جۋرناليستتەر وداقتارىنىڭ مۇشەسى جانىبەك قابدۋالي ۇلى قىزىروۆ قالامگەرلەر شىعارماشىلىعىن دارىپتەپ, ەسىمىن ەسكە الۋعا ارنالعان جيىن جاس ۇرپاقتىڭ تاربيەسى ءۇشىن ماڭىزدى ەكەنىن العا تارتتى.
«ورالحان بوكەي — قازاق جۇرتشىلىعىنىڭ ماقتانىشى. قىسقا عانا عۇمىرىندا تالانتىمەن, ەڭبەگىمەن ۇلكەن جەتىستىكتەرگە جەتتى. قالامداس دوسى ءابىش كەكىلباەۆتىڭ سوزىمەن ايتساق: «ورەكەڭ — تالانتىمەن ەلىن دە, جەرىن دە, ءوزىن دە الەمگە تانىتىپ, بيىكتەن كورىنگەن تۇلعا». ورالحان — كاتونقاراعايدىڭ ماقتانىشى. الاقانداي عانا كاتونقاراعايدان قاليحان ىسقاق, ورالحان بوكەي, الىبەك اسقاروۆ, ديداحمەت ءاشىمحان سىندى كوپ مىقتى قالامگەر شىقتى. ال ورالحانداي تالانتتى جازۋشىنى ەسكە الۋعا ارنالعان شارا كاتونقاراعايلىقتاردىڭ رۋحىن كوتەرەرى ءسوزسىز. تالانتتى ۇلدارىمىزبەن ماقتانامىز دەپ قانا قويماي, مۇنداي جيىنداردى ءجيى وتكىزۋ كەرەك. ويتكەنى جاس ۇرپاققا ۇلگى ەتىپ, ەسكە سالىپ تۇرعان ابزال. توي تويعا ۇلاسسىن!», دەدى جانىبەك قىزىروۆ.
ايتا كەتسەك, جيىنعا ورالحان بوكەيدىڭ جيەنى كلارا نۇرجاقىپقىزى ماعزۋموۆا قاتىسىپ, جينالعان قاۋىمدى قالامگەردىڭ مەرەيتويىمەن قۇتتىقتادى. كاتونقاراعايدا اشىلىپ جاتقان ورالحان بوكەيدىڭ مۇراجاي-ۇيىنە يراندا ارنايى توقىلعان, قالامگەردىڭ پورترەتى بەينەلەنگەن كىلەم سىيلادى. سونىمەن قاتار ورالحاننىڭ جەكە شاپانى مەن 1964 جىلى تۇسكەن سۋرەتىن تابىستادى.
جازۋشىنىڭ اتىنا قۇران باعىشتالىپ, اس بەرىلدى, سونداي-اق اۋداننىڭ قۇرمەتتى قوناقتارىنا «ورالحان بوكەيگە 80 جىل» اتتى توسبەلگىلەرى تابىستالدى.
سونداي-اق ءىس-شارا اياسىندا «شولپانداي تاڭ الدىنا تۋىپ – باتتى» اتتى جاڭا كىتاپ جارىق كوردى. سونىڭ تۇساۋكەسەرىنە قاتىسقان كوپشىلىك اۋدان يپپودرومىندا ەلىمىزدىڭ تۇكپىر-تۇكپىرىنەن كەلگەن ۇزدىك شاباندوزداردى انىقتادى. مەرەيتوي كەشى جەرگىلىكتى جۇلدىزداردىڭ قاتىسۋىمەن وتكەن ۇلكەن گالا كونتسەرتپەن قورىتىندىلاندى.
