فوتو: ۇكىمەتتىڭ ءباسپاسوز قىزمەتى
فورۋم ءبىلىم جانە عىلىم سالاسىنىڭ قىزمەتكەرلەرىن, جوو جانە عزي وكىلدەرىن, قوعامدىق كەڭەس مۇشەلەرىن, جاس عالىمدار مەن ستۋدەنتتەردى, شەتەلدىك جانە وتاندىق ساراپشىلاردىڭ باسىن قوستى.
فورۋمنىڭ پلەنارلىق وتىرىسىن اشقان پرەمەر-مينيستر ءاليحان سمايىلوۆ شاراعا قاتىسۋشىلاردى ۆيدەو ارقىلى قۇتتىقتاپ, ەلدىڭ ەكونوميكالىق ءوسۋى ءۇشىن جوعارى ءبىلىم مەن عىلىمدى دامىتۋدىڭ ماڭىزدىلىعىن اتاپ ءوتتى.
«وزدەرىڭىز بىلەسىزدەر, عىلىم مەن جوعارى ءبىلىمنىڭ دامۋ ماسەلەلەرى مەملەكەت باسشىسىنىڭ – ءجىتى نازارىندا. سونداي-اق الدىمىزدا عىلىم سالاسىن قايتا قاراۋ مىندەتى تۇر. وسى باعىتتا عىلىمدى باسقارۋدىڭ جاڭا مودەلىنە كوشە باستادىق», دەدى پرەمەر-مينيستر.
پرەمەر-ءمينيستردىڭ ورىنباسارى تامارا دۇيسەنوۆا جوعارى ءبىلىم مەن عىلىمنىڭ ەلدىڭ يننوۆاتسيالىق دامۋى مەن ەل جاستارىنىڭ كاسىبي داعدىلارىن ارتتىرۋداعى ماڭىزىنا توقتالدى.
«ۇكىمەت مەملەكەت باسشىسىنىڭ تاپسىرماسى نەگىزىندە جوعارى ءبىلىم مەن عىلىمدى دامىتۋ, سونداي-اق جەكەلەگەن پروبلەمالار مەن نەگىزگى ماسەلەلەردى شەشۋ بويىنشا شارالار قابىلدادى. شەتەلدىڭ جەتەكشى ۋنيۆەرسيتەتتەرىنىڭ فيليالدارىن اشىپ جاتىرمىز. بۇل ءبىلىم ساپاسىن ارتتىرۋعا, تاجىريبەلەرمەن ءبولىسىپ, ەلىمىزدىڭ جوعارى وقۋ ورىندارىنىڭ باسەكەگە قابىلەتتىلىگىن ارتتىرۋعا باعىتتالعان», دەدى تامارا دۇيسەنوۆا.
عىلىم جانە جوعارى ءبىلىم ءمينيسترى ساياسات نۇربەك ءتۇرلى ۋنيۆەرسيتەتتەر مەن عىلىمي-زەرتتەۋ ينستيتۋتتارى اراسىنداعى ىنتىماقتاستىقتىڭ ماڭىزى تۋرالى ايتىپ, سونداي-اق الەمگە تانىلعان تابىستى جوبالاردىڭ مىسالدارىن كەلتىردى.
«2023-2025 جىلعى عىلىم سالاسىنىڭ جالپى بيۋدجەتى 3,5 ەسە ءوسىپ, 643 ملرد تەڭگەنى قۇرادى. مەملەكەت باسشىسىنىڭ تاپسىرماسىن ىسكە اسىرۋ اياسىندا عالىمداردىڭ مارتەبەسىن كوتەرۋ جانە كادرلىق الەۋەتتى نىعايتۋ بويىنشا جۇمىستار جۇرگىزىلدى. عالىمداردىڭ جالاقىسى 2 ەسە ءوستى. ورتاشا جالاقى – 257 مىڭ تەڭگە, ەڭ جوعارىسى 1,5 ملن تەڭگەگە دەيىن جەتەدى. زاڭنامانى جەتىلدىرۋ جانە عىلىمدى بيۋروكراتيادان ارىلتۋ شەڭبەرىندە حالىقارالىق تاجىريبەنى ەسكەرە وتىرىپ, عىلىم جانە تەحنولوگيالار جونىندەگى ۇلتتىق كەڭەس قۇرىلدى, ەكونوميكانىڭ ستراتەگيالىق سالالارى بويىنشا عىلىمي-تەحنولوگيالىق دامۋدىڭ جول كارتالارى قابىلداندى», دەدى مينيستر.
سونىمەن قاتار فورۋمدا Heriot-Watt University پرورەكتورىنىڭ ورىنباسارى (اكادەميالىق باسشىلىق), Tadhg O'donovan, قازاقستانداعى De Montfort ۋنيۆەرسيتەتىنىڭ پرەزيدەنتى Sakina Zafar, قر پرەزيدەنتى جانىنداعى ۇلتتىق عىلىم اكادەمياسىنىڭ ۆيتسە-پرەزيدەنتى اسقار جۇمادىلداەۆ جانە باسقا دا ساراپشىلار ءسوز سويلەدى.
جوعارى ءبىلىم جانە عىلىم فورۋمى – قازاقستاننىڭ ءبىلىم بەرۋ سالاسىنداعى ماڭىزدى وقيعا. ول ديالوگ الاڭى بولا وتىرىپ, تاجىريبە الماسۋعا جانە جاڭا دامۋ ستراتەگيالارىن دايىنداۋعا مۇمكىندىك بەرەدى. فورۋمدا ۇسىنىلعان يدەيالار مەن كەڭەستەر قازاقستاننىڭ جوعارى ءبىلىم جانە عىلىم سالاسىنداعى ۇستانىمدارىن نىعايتۋعا ىقپال ەتپەك.
