«جەزقازعان – قىزىلوردا» تاسجولىنا بايلانىستى ماسەلە دە نازاردان تىس قالمادى. ۇكىمەت باسشىسىنىڭ ءبىرىنشى ورىنباسارىنىڭ ساپارى ناق وسى جولعا قاتىستى «قازاۆتوجول» باسشىلىعىنىڭ بايانداماسىن تىڭداۋدان باستالدى. ر.سكليار بۇل باعىتتاعى جۇمىستى جەدەلدەتۋدى تاپسىردى.
الداعى جىلۋ بەرۋ ماۋسىمىنا تىڭعىلىقتى دايىندالماسا بولمايدى. وتكەن جىلى وبلىس ورتالىعىنداعى جىلۋ-ەلەكتر ورتالىعىندا بىرنەشە مارتە كۇردەلى احۋال قالىپتاسقان ەدى. ءتىپتى بيىلعى جازدىڭ وزىندە بۇل ورتالىقتىڭ قىزمەتىنەن جىبەرىلگەن كەمشىلىك تۇرعىنداردى اۋرەگە تۇسىرگەن ەدى. سوندىقتان وتكەننىڭ ولقىلىعىن ورنىنا كەلتىرمەسە جاعداي قيىنداپ كەتۋى ابدەن مۇمكىن. جەزقازعان قالاسىنداعى جىلۋ قۇبىرلارىنىڭ 70 پايىزىنىڭ توزىعى جەتكەن. قازىر قۇبىرلاردى جاڭارتۋ جۇمىستارى ءجۇرىپ جاتىر. بۇل ماقساتقا 3 ملرد تەڭگە بولىنگەن. جۇمىس بيىل اياقتالۋعا ءتيىس.
جىلۋ-ەلەكتر ورتالىعىندا دا جوندەۋ جۇمىستارىن جۇرگىزۋگە 5 ملرد تەڭگە قاراستىرىلعان. الداعى قىستا 5 قازاندىق جۇمىس ىستەيدى دەپ جوسپارلانعان. ازىرگە جوسپارلانعان جۇمىستىڭ 60 پايىزى عانا اتقارىلعان. بۇل – ايتارلىقتاي جاقسى كورسەتكىش ەمەس. ويتكەنى قىس قىر استىنا كەلىپ قالدى. ر.سكليار جىل سوڭىنا دەيىن №4 جانە 9 قازاندىق اگرەگاتتارىن كۇردەلى جوندەۋدى, №7 قازاندىق اگرەگاتىن اعىمداعى جوندەۋدى, سونداي-اق №8 جانە 10 قازاندىق اگرەگاتتارىن جاڭعىرتۋ جونىندە تاپسىرما بەردى.
جىلۋ-ەلەكتر ورتالىعىنىڭ باسشىلىعىنا «ينۆەستيتسيا ورنىنا تاريف» باعدارلاماسى اياسىندا №10 قازاندىقتى سالۋ ماسەلەسىن شەشۋ تاپسىرىلدى. سونداي-اق الداعى جىلىتۋ ماۋسىمىنىڭ ساپالى ءوتۋى ءۇشىن جوندەۋ ناۋقانىن جۇرگىزۋدىڭ ماڭىزدىلىعى اتالىپ ءوتتى.
– ءبىز ءوز تاراپىمىزدان وبلىسقا قاجەتتى قارجىلىق قولداۋ جاسادىق. بولىنگەن قارجى تيىمدىلىگىن كورسەتۋى كەرەك. سىزدەردىڭ ەسەپتەۋلەرىڭىز بويىنشا ءتاريفتى (جىلۋ جەلىسىن جانە گەنەراتسيالايتىن كوزدەردى) ۇلعايتۋ تۇرعىسىنان ۇسىنىستارىڭىزعا دا قولداۋ كورسەتتىك. جىلۋ جەلىلەرىن دە قولدايمىز. جاعدايدى جاقسارتۋ, توزۋدى ازايتۋ, سەنىمدىلىكتى ارتتىرۋ ءۇشىن ينۆەستيتسيالار تارتىلۋى كەرەك. جۇمىستى شيراتا تۇسكەن دۇرىس. ەڭ باستىسى, حالقىمىز قىستان قىسىلماي شىعۋعا ءتيىس, – دەدى ر.سكليار.
تالاپ قويىلدى, ال ونىڭ ورىندالۋىن ۋاقىت كورسەتەدى.
ۇلىتاۋ وبلىسى
