ەلىمىزدىڭ ءار ءوڭىرىنىڭ تۇرعىندارى ينفراقۇرىلىمدى دامىتۋعا, تازا اۋىز سۋمەن قامتاماسىز ەتۋگە, ەرەكشە قاجەتتىلىكتەرى بار ادامداردى قولداۋعا قاتىستى جانە باسقا دا ماسەلەلەرمەن «اmanat» پارتياسىنا جۇگىندى. ماسەلەن, شىعىس قازاقستان وبلىسىنداعى التاي قالاسىنىڭ 40 مىڭ تۇرعىنى اتىنان حابارلاسقان ءبىر توپ ازامات وسينوۆ اسۋىن اينالىپ وتەتىن جاڭا جول سالۋ ماسەلەسىن كوتەردى. بۇل اسۋعا جىل سايىن مىڭداعان تۋريست كەلەدى.
«التاي جانە شەكارا ماڭىنداعى كاتونقاراعاي اۋداندارىنىڭ تۇرعىندارى ءۇشىن بۇل جولدىڭ ماڭىزى زور. مۇنداعى قۇرىلىس 2018 جىلى باستالعان ەدى, بىراق كەيىن توقتاپ قالدى. مەملەكەتتىك ورمان قورىنان جەر تەلىمدەرىن بەرۋ جۇمىستارى كەشىكتىرىلۋىنە بايلانىستى جولدى جوندەۋگە قاجەت ماتەريالدار قىمباتتاپ كەتتى. سىزدەن جولدى جوندەۋ جۇمىستارىن تەزدەتۋگە كومەك كورسەتۋىڭىزدى سۇرايمىز», دەلىنگەن ازاماتتاردىڭ ۇجىمدىق ۇندەۋىندە.
ەرلان قوشانوۆ پارتيا فيليالىنا يندۋستريا جانە ينفراقۇرىلىمدىق دامۋ مينيسترلىگى جانە شىعىس قازاقستان وبلىسىنىڭ اكىمدىگىمەن بىرلەسە وتىرىپ, جول قۇرىلىسىنا قاجەتتى بارلىق جەر تەلىمىن بەرۋ ماسەلەسىن تەز ارادا شەشۋدى تاپسىردى. سونداي-اق قاجەتتى قاراجاتتى ءبولۋدى جەدەلدەتۋ كەرەك ەكەنىن ايتتى.
ال اقتاۋ قالاسىنىڭ تۇرعىندارى – ەرلى-زايىپتى جالعاس قۋاتوۆ پەن ايسۇلۋ قۇرمانعازيەۆا كاسىپكەرلىكپەن اينالىسىپ, ساۋدا پاۆيلونىن اشۋدى جوسپارلاپ وتىر. ەكەۋى دە ەكىنشى توپتاعى مۇگەدەك ساناتىندا. «جۇمىسىمىزدى باستاۋ ءۇشىن رۇقسات الۋعا جاردەمدەسۋىڭىزدى جانە ماتەريالدىق تۇرعىدا كومەك كورسەتۋىڭىزدى سۇرايمىز», دەدى ايسۇلۋ قۇرمانعازيەۆا.
ەرلان قوشانوۆ پارتيانىڭ وڭىرلىك فيليالىنا ءوتىنىش بەرۋشىلەرگە بارىنشا كومەك كورسەتۋدى تاپسىردى. ءماجىلىس توراعاسى ەرەكشە قاجەتتىلىكتەرى بار ادامداردى جان-جاقتى قولداۋ – «اmanat» پارتياسىنىڭ باسىمدىقتارىنىڭ ءبىرى ەكەنىن اتاپ ءوتتى.
سونداي-اق اقمولا وبلىسى شورتاندى كەنتىنىڭ 8 مىڭنان استام تۇرعىنى اۋىز سۋ تاپشىلىعىن وتكىر سەزىنىپ وتىر. ماسەلەنىڭ شەشىمىن ىزدەگەن سەرىكبول مەرەي پارتيا توراعاسىمەن كەزدەسۋگە كەلدى. «قولدانىستاعى جەتى ۇڭعىمانىڭ تەك تورتەۋى جۇمىس ىستەپ تۇر, قالعاندارىندا سۋ قورى تاۋسىلعان. اسىرەسە جاز مەزگىلىندە ەگىستىكتەردى سۋارۋعا جانە تەحنيكالىق قاجەتتىلىكتەرگە كوپ مولشەردە پايدالانىلعاندىقتان سۋ تاپشىلىعى ايتارلىقتاي سەزىلەدى», دەدى ول.
ەرلان قوشانوۆ بۇل ماسەلەنى شەشۋ ءۇشىن قازىرگى ۋاقىتتا توپتىق سۋ قۇبىرىن تارتۋ جوباسى ازىرلەنگەنىن ايتتى. جۇمىس كولەمى مەن ونى ورىنداۋشىلار بەلگىلى بولدى. «اmanat» پارتياسىنىڭ ماجىلىستەگى فراكتسياسى سۋ قۇبىرى جەلىلەرىن قايتا جوندەۋگە رەسپۋبليكالىق بيۋدجەتتەن جاقىن ارادا ءتيىستى قاراجات ءبولۋدى ءوز باقىلاۋىنا الادى.
ال ەلوردا تۇرعىنى, 11 بالانىڭ اناسى نۇرگۇل قادىرباەۆا ەكى ۇلى ارمان مەن اناس فۋتبولدان قازاقستان مەن تمد ەلدەرىندە وتكەن چەمپيوناتتاردا جوعارى شەبەرلىك كورسەتكەنىن اتاپ ءوتتى. ءسويتىپ, ولار پورتۋگالياداعى «Bsports» جاستار كلۋبىنا ونەر كورسەتۋگە شاقىرتۋ العان. بىراق قارجىلىق جاعدايدىڭ قيىندىعىنا بايلانىستى بارا الماي وتىر.
پارتيا توراعاسى باتىر اناعا جاس فۋتبولشىلار ءۇشىن قاجەتتى كومەك كورسەتىلەتىنىن ايتتى. بۇل ماسەلەگە استانا اكىمدىگى مەن مادەنيەت جانە سپورت مينيسترلىگى دە اتسالىسادى. ەرلان قوشانوۆ قارالعان بارلىق ءوتىنىش بويىنشا پارتيا فيليالدارىنا ناقتى تاپسىرمالار بەرىپ, ولاردىڭ شەشىلۋىن جەكە باقىلاۋىنا الدى.
