ينكليۋزيۆتى ءبىلىم بەرۋدى دامىتۋدىڭ ۇلتتىق عىلىمي-پراكتيكالىق ورتالىعىنىڭ دەرەكتەرى بويىنشا ەلىمىزدە 400-دەن استام ارنايى ءبىلىم بەرۋ ۇيىمى جۇمىس ىستەيدى. وسى ورايدا ەرەكشە ءبىلىم بەرۋدى قاجەت ەتەتىن بالالاردىڭ ارنايى جانە ينكليۋزيۆتى ءبىلىم الۋىن, پەداگوگ كادرلارمەن قامتاماسىز ەتۋ, ءبىلىم بەرۋ ساپاسىن ارتتىرۋ باعىتىنداعى ءىس-شارالار وڭىرلەر بويىنشا ىسكە اسىپ كەلەدى.
الماتى قالالىق ءبىلىم باسقارماسىنىڭ باسشىسى ءلاززات جىلقىباەۆانىڭ ايتۋىنشا, وڭتۇستىك استانادا ينكليۋزيۆتى ءبىلىم بەرۋدى جۇزەگە اسىراتىن مەكتەپتەر سانى جىل سايىن ارتىپ كەلەدى. قازىرگى ۋاقىتتا قالادا 182 مەكتەپتە ەرەكشە ءبىلىم بەرۋ قاجەتتىلىگى بار بالالارعا جاعداي جاسالعان. بيىلعى وقۋ جىلىنان باستاپ تاعى دا 16 مەكتەپ ءتىزىمدى تولىقتىرادى. 2020-2021 وقۋ جىلىندا ينكليۋزيۆتى ءبىلىم بەرۋمەن 3 672 بالا قامتىلسا, 2022-2023 وقۋ جىلىندا بۇل كورسەتكىش 4 632-ءنى قامتىپ وتىر.
– قازىرگى كەزدە ەرەكشە ءبىلىم بەرۋ قاجەتتىلىكتەرى بار بالالاردى قولداۋ كابينەتتەرى جۇمىس ىستەسە, سونىڭ 8-ءى – اۋدانداردىڭ تىرەك مەكتەبى. بۇل باعىتتا ءبىلىم بەرۋ ءۇشىن مۇعالىمدەرگە ادىستەمەلىك كومەك قاراستىرىلعان. سونىمەن قاتار ءبىلىم بەرۋدەگى جاڭا تەحنولوگيالاردىڭ قالالىق عىلىمي-ادىستەمەلىك ورتالىعىنىڭ بازاسىندا ينكليۋزيۆتى رەسۋرستىق ورتالىق اشىلىپ, مەكتەپتەر ءۇشىن 600 پەداگوگتىڭ بىلىكتىلىگىن ارتتىرۋ جوسپارلانىپ وتىر. قازىرگى ۋاقىتتا مۇمكىندىگى شەكتەۋلى بالالارعا ارنايى پسيحولوگيالىق-پەداگوگيكالىق قولداۋ كورسەتەتىن جەكە ۇيىمداردا مەملەكەتتىك ءبىلىم بەرۋ تاپسىرىسىن ورنالاستىرۋعا كونكۋرس جاريالاندى, – دەدى ل.جىلقىباەۆا.
ونىڭ ايتۋىنشا, جازدىڭ باسىندا ناۋرىزباي اۋدانىندا جوبالىق قۋاتى اپتاسىنا 5 مىڭ بالانى قامتيتىن يننوۆاتسيالىق شىعارماشىلىق ورتالىق اشىلعان. بيىلعى وقۋ جىلى باستالعانعا دەيىن وسىنداي ورتالىقتى الاتاۋ اۋدانىندا اشۋ جوسپارلانعان. مۇنداي ورتالىقتاردىڭ مۇمكىندىگىن پايدالانىپ, قوسىمشا ءبىلىم سالاسىنا ەڭ ۇزدىك مامانداردى تارتىپ وتىرىپ, كرەاتيۆتى يدەيالار الاڭىنا اينالدىرۋ كوزدەلىپ وتىر.
سونىمەن قاتار وتكەن عاسىردىڭ 30-جىلدارى تۇركسىب جانە بوستاندىق اۋداندارىندا سالىنعان ەكى وقۋشىلار ءۇيىنىڭ ورنىنا كۇنىنە 800 بالانى قابىلداۋ مۇمكىندىگى بار زاماناۋي دامۋ جانە شىعارماشىلىق ورتالىقتارىن سالۋ جوسپارلانىپ وتىر. بۇگىنگى تاڭدا جوبا دايىن, ال قۇرىلىس-مونتاج جۇمىستارى كەلەر جىلى باستالادى. 2025 جىلعا دەيىن قاجەتتىلىك بار اۋدانداردا حالىقارالىق ستاندارتتارعا سايكەس كەلەتىن قوسىمشا ءبىلىم بەرەتىن تاعى دا 3 زاماناۋي ورتالىق سالىنباقشى.
الماتى
