بىرىمەن-ءبىرى جىمداسىپ, يىقتاسا قاتار ورىلگەن ءتۇرلى تۇستەر گالەرەياسى بەينەلەنگەن كارتينا كورۋشىنىڭ نازارىن بىردەن اۋدارتادى. جالپى, كەسكىنى قۇراق كورپەنى ەسكە تۇسىرگەن سۋرەت اتاۋىنا قاراپ, ەرىكسىز ويعا باتاسىڭ. ادامنىڭ ءبىر ساتتە مىڭ سان تاراپقا قۇبىلاتىن ويىن بىرەۋ كوركەمسوزبەن جەتكىزسە, ەندى بىرەۋ بوياۋلى تۇسپەن ايشىقتايدى. ويدىڭ قاي كەزدە قانداي تۇسكە بويالىپ جاتقانىن اركىمنىڭ ءوز ءىشى عانا بىلسە كەرەك. اۆتور دا ءوز بويىنان بايقاعان وي قۇبىلىستارىن سالىپ وتىر. كارتيناعا ۇزاق ءۇڭىلىپ تۇرىپ, ءتۇرلى بوياۋدىڭ اراسىنان سول ساتتەگى ءوز وي-ءتۇسىڭدى, ءوز كۇيىڭدى ىزدەيدى ەكەنسىڭ.
اتالعان شىعارمادا بارلىق ءتۇس بەينەلەنگەن. جالپى, اۆتور سۋرەت سالۋدا كوك پەن كۇلگىن ءتۇستى ءجيى قولدانادى. «وي تۇستەرىندە» دە سولاي. بىراق قارا ءتۇس جوق. سۋرەتشىنىڭ ويىنشا, قارا ءتۇس بولسا, ء«ومىر تۇستەرى» دەپ اتالار ەدى.
«بۇل كارتينانى سالۋعا ءبىر اي ۋاقىت جۇمسادىم. مەدياتيۆتى كوڭىل كۇيدە سالدىم دەسەم بولادى. ايتپەسە مۇنداي كارتينانى سالۋ قيىنعا سوعار ەدى. ال ادام ويىنىڭ ءتۇرلى كۇيلەرىن تۇسپەن بەينەلەۋ يدەياسى قالاي تۋدى دەيسىز عوي, ىلعي ءوز ويلارىمدى باقىلاپ ءجۇردىم. ياعني وزىمە ەكسپەريمەنت جاسادىم. بايقاعانىمدى تۇستەرمەن جەتكىزگىم كەلدى», دەيدى سۋرەتشى.
ءيا, ءومىر ويدان باستالادى. وي-سانامىزدا, بەينەلەپ ايتقاندا, قانداي ءتۇس كوبىرەك بولسا, ءومىرىمىز دە, ومىرگە دەگەن كوز-قاراس تا سول تۇسكە قاراي وزگەرە بەرمەك.
اۆتور قالامىنا كورىنبەيتىن ەنەرگيالاردى بەينەلەۋ ءستيلى ءتان. «وي تۇستەرىنەن» بولەك «تىنىشتىق دىبىسى», «جۇپار ءتۇسى», باسقا دا كارتينالارى بار. ايتا كەتەيىك, ر.اقاناەۆتىڭ جۇمىستارى «شىعىستىق گالەرەيا» (ماسكەۋ), «الىس الەمدەر» (ۆاشينگتون), «Has Sanat» (استانا), «تريبۋنا» (الماتى) گالەرەيالارىندا قويىلعان. سونداي-اق كارتينالارى قازاقستان پرەزيدەنتىنىڭ (2005), رەسەي, گەرمانيا, فرانتسيا, امەريكا, كانادا, ليحتەنشتەين, شۆەيتساريانىڭ جەكە كوللەكتسيالارىندا ساقتاۋلى. «ارت-ميف» (ماسكەۋ قالاسى, 1993), «ەل جاستارى» (ماسكەۋ قالاسى, 1986) كورمەلەرىنە قاتىسقانى دا بەلگىلى. ماسكەۋ (1995), ەرفۋرت (1994), ۆاشينگتون (1999), استانا (2004), الماتى (2002) قالالارىندا جەكە كورمەسىن وتكىزگەن.
سۋرەتشى شىعارماشىلىقتا جان-جاقتىلىعىمەن ەرەكشەلەنەدى. كەسكىندەمە, گرافيكا جانە ءمۇسىن ونەرى سالاسىنداعى ءتۇرلى سارىنداعى جۇمىستارى وزىندىك ستيلگە يە. ونىڭ ستيمپانك ستيلىندە ورىندالعان دون-كيحوت ءمۇسىنى ءا.قاستەەۆ اتىنداعى مۋزەيدە تۇر. تۋىندى كەلۋشىلەردىڭ نازارىن ەرەكشە فورماسى مەن ماتەريالىمەن باۋرايدى. ال «شىعۋ تەگى تۋرالى اڭىز» تريپتيحىندە جارتاسقا سالىنعان سۋرەتتەر كيىز كىلەمدى ەسكە تۇسىرەتىن ءتۇرلى ءتۇستى قۇراقتارعا تولى كەنەپتىڭ كەڭىستىگىندە بەينەلەدى. ياعني ءومىردىڭ بايىرعى فيلوسوفياسى, بولمىستىڭ نازىك ۇيلەسىمى سۋرەتشى قىلقالامىنىڭ ءبىر تاقىرىبىنا اينالعان.
سۋرەت ونەرىندە اۆتوردىڭ ءوز اتى عانا ەمەس, اۋلەتى دە ايگىلى ەكەنى بارشاعا ءمالىم. قازاق قىلقالام شەبەرلەرىنىڭ ىشىندە اقاناەۆتار ەسىمى ەرەكشە اتالارى ءسوزسىز. سىرلى سۋرەت سالۋدىڭ حاس شەبەرى اتانعان اقاناەۆ اۋلەتى – سۋرەتشىلەر ديناستياسى. ونىڭ باسىندا اماندوس اقاناەۆ پەن قازاقستاننىڭ ەڭبەك سىڭىرگەن قايراتكەرى نەللي بۋبە تۇر. بۇل كۇندە اتى الەمگە ايگىلەنگەن اۋلەتتىڭ باس يەسى, سۋرەتشى, كەسكىندەمەشى اماندوس اقاناەۆتىڭ قىلقالامىنان تۋىنداعان ءتورت مىڭنان استام ءتول تۋىندىنىڭ جارتىسىنا جۋىعى مەملەكەتتىك مۇراجايدان باستاپ, ماسكەۋدىڭ ترەتياكوۆ گالەرەياسىندا, اقش, يتاليا, فرانتسيا, گرەكيا, باسقا دا كوپتەگەن ەلدىڭ ورتالىق مۋزەيلەرىندە قويىلعان.
اتادان بالاعا دارىعان, قانمەن كەلگەن وشپەس ونەردى اسپەتتەپ, ءجىبىن ۇزبەي جالعاستىرۋ ءداستۇرى – ۇلتتىق قۇندىلىقتىڭ ناعىز كورىنىسى ەمەس پە؟
ايگىلى اۋلەتتىڭ بالالارى رۋسلاننىڭ, بوتاگوزدىڭ, ەسكەندىردىڭ كارتينالارى دا سۋرەت الەمىندە تانىمال. نەمەرەلەرى اسپارۋح, مۇحيت, رادا, گلەب, الەكساندرا جانە مۇحيتتىڭ زايىبى دارينا دا شىعارماشىلىقپەن اينالىسادى. ولاردىڭ تۋىندىلارى دا وتباسىلىق كورمەلەردە كوپشىلىك نازارىنا ۇسىنىلىپ ءجۇر. تۇتاس سۋرەتشىلەر تولقىنىن شىعارماشىلىقتاعى جارقىن ەنەرگەتيكا بايلانىستىرادى. كارتينالارىندا ءومىر بارداي, تىرشىلىكتىڭ تىنىسىن بەرىپ تۇرعانداي كورىنەدى. بۇگىنگى كەيىپكەرىمىز رۋسلان اقاناەۆتىڭ سۋرەت ونەرىندەگى وزىندىك بولمىسى, ەرەكشە قولتاڭباسى, سونى ءستيلىنىڭ سىرى دا وسى – سوناۋ تەرەڭنەن تارتاتىن, تاربيەمەن دارىعان التىن ۇزىكتىڭ جالعاسى ەكەنىنە كوزىمىز جەتتى.
