فوتو: ۇكىمەتتىڭ ءباسپاسوز قىزمەتى
كەزدەسۋدىڭ باسىندا ءسوز العان ءاليحان سمايىلوۆ ۇكىمەت جۇمىسى دامىعان كاسىپكەرلىككە نەگىزدەلگەن ارتاراپتاندىرىلعان ەكونوميكا قۇرۋعا باعىتتالعانىن اتاپ ءوتتى. ونىڭ ىشىندە ورتا بيزنەس نەگىزگى لوكوموتيۆتەردىڭ ءبىرى بولماق.
«وڭتۇستىك وڭىرلەردەگى ىسكەرلىك بەلسەندىلىك ايتارلىقتاي جوعارى, ال كەيبىر كورسەتكىشتەر بويىنشا ولار كوش باستاپ تۇر. بۇل وبلىستاردا ءداستۇرلى تۇردە اۋىل شارۋاشىلىعى, ازىق-ت ۇلىك جانە جەڭىل ونەركاسىپتەگى ءوندىرىس, سونداي-اق ساۋدا-ساتتىق دامىعان», دەدى ۇكىمەت باسشىسى.
پرەمەر-مينيستر 7 ايدىڭ قورىتىندىسى بويىنشا ءتورت وبلىستىڭ بارلىعىندا دا وڭ دامۋ ديناميكاسى بار ەكەنىن اتاپ ءوتتى. اتاپ ايتقاندا, وڭدەۋ ونەركاسىبى مەن اگرووندىرىس كەشەنىندە ءوندىرىس ۇلعايىپ, قۇرىلىس جۇمىستارى مەن نەگىزگى كاپيتالعا تارتىلعان ينۆەستيتسيالار كولەمى ارتتى.
كەزدەسۋ اياسىندا ورتا بيزنەستىڭ جۇمىس ىستەپ تۇرعان جوبالارى مەن جاڭا كاسىپورىنداردى ىسكە قوسۋ بويىنشا جوسپارلارى تانىستىرىلدى. ولاردىڭ قاتارىندا الماتى وبلىسىندا ۆولفرام كەنىن وڭدەيتىن تاۋ-كەن بايىتۋ كومبيناتى مەن ءىرى كولىك-لوگيستيكالىق ورتالىق, جەتىسۋ وبلىسىندا قازاقستانداعى العاشقى تولىق تسيكلدى يندۋستريالىق اككۋمۋلياتورلىق باتارەيالاردى وندىرەتىن زاۋىت, جامبىل وبلىسىندا جاڭا ءسۇت فابريكاسى جانە تاعى باسقالارىنىڭ قۇرىلىسى بار.
كەزدەسۋ بارىسىندا كاسىپكەرلەر نەسيەلەۋ مەن سۋبسيديالاۋدىڭ قولجەتىمدىلىگىن ارتتىرۋ, جەتىسپەيتىن تەمىرجول جانە كولىك جولدارىن سالۋ, اۋىل شارۋاشىلىعى كووپەراتسياسىن دامىتۋ, ەكولوگيالىق زاڭناما نورمالارىن ساقتاۋ جانە ءىرى ساۋدا جەلىلەرىنە بىردەي قولجەتىمدىلىكتى قامتاماسىز ەتۋ ماسەلەلەرىن كوتەردى.
مەتاللۋرگيا, ەت جانە ءسۇت وندىرەتىن مال شارۋاشىلىعى, قۇس جانە ماقتا شارۋاشىلىقتارىن قولداۋ, سونداي-اق «قورعاس – شىعىس قاقپاسى» ارنايى ەكونوميكالىق ايماعىنىڭ تيىمدىلىگىن ارتتىرۋ بويىنشا ناقتى ۇسىنىستار ايتىلدى.
ءار ماسەلە بويىنشا ورتالىق مەملەكەتتىك ورگاندار مەن اتالعان وڭىرلەر اكىمدىكتەرىنىڭ باسشىلارى تولىق تۇسىنىكتەمە بەردى.
پرەمەر-مينيستر اتاپ وتكەندەي, كاسىپكەرلەردى جان-جاقتى قولداۋ – ۇكىمەت جۇمىسىنىڭ ماڭىزدى بولىگى. وتكەن جىلدىڭ قورىتىندىسى بويىنشا رەسپۋبليكادا شاعىن جانە ورتا بيزنەس نىساندارىنىڭ سانى 27%-عا, ال وسى سالادا جۇمىسپەن قامتىلعاندار سانى 18%-عا ءوسىپ, 4,1 ملن ادامعا جەتكەن. جالپى ەلدىڭ ءجىو-سىندەگى شوب ۇلەسى 36,5%-عا دەيىن ءوستى.
«بۇل كاسىپكەرلەردىڭ پروبلەمالىق ماسەلەلەرىن تىڭداپ, ولاردى بىرتىندەپ شەشۋ بويىنشا كۇندەلىكتى بىرلەسكەن جۇمىستىڭ ناتيجەسى. وسى ورايدا قالعان بيزنەسكە قويىلاتىن ارتىق تالاپتاردى جويۋ ونىڭ دامۋىنا قوسىمشا سەرپىن بەرمەك», دەدى ءاليحان سمايىلوۆ.
ۇكىمەت باسشىسى بۇگىنگى تاڭدا قازاقستان ەكونوميكاسىنىڭ ءوسۋى 4,8%-عا دەيىن جەدەلدەگەنىن, بۇل جاقسى كورسەتكىش ەكەنىن ايتتى. سونىمەن قاتار ۇكىمەت ءتيىستى دامۋ باعدارلامالارىن ىسكە اسىرۋدى جالعاستىرۋدا.
ء«بىزدىڭ ماقساتىمىز – ەكونوميكالىق ءوسىمدى 7-دەن 10%-عا دەيىن ارتتىرۋ, بىراق بۇل ءۇشىن بانكتەر قولجەتىمدى نەسيەلەر بەرىپ, كاسىپكەرلەر كوتەرىپ وتىرعان وزەكتى ماسەلەلەردى شەشۋ قاجەت. وسى ماسەلەلەردىڭ بارلىعى بويىنشا جۇمىس ىستەپ جاتىرمىز», دەدى پرەمەر-مينيستر.
سونىمەن بىرگە ۇكىمەت باسشىسى قازىرگى ۋاقىتتا «اتامەكەن» ۇلتتىق پالاتاسىمەن ءوزارا ءىس-قيمىل جاساي وتىرىپ, بيزنەس ءۇشىن قولايلى جاعدايلار جاساۋ بويىنشا جۇيەلى شارالار قابىلدانىپ جاتقانىن اتاپ ءوتتى. اتاپ ايتقاندا, بۇل ارتىق تالاپتاردى جانە اكىمشىلىك جۇكتەمەنى ازايتۋعا, مەملەكەتتىك باقىلاۋ جانە قاداعالاۋ راسىمدەرىن اۆتوماتتاندىرۋعا, سالىقتىق اكىمشىلەندىرۋدى جەڭىلدەتۋگە جانە تسيفرلاندىرۋعا, مەملەكەتتىك ساتىپ الۋعا جانە تاعى باسقالارعا قاتىستى.
قورىتىندىلاي كەلە, ءاليحان سمايىلوۆ ۇكىمەت اپپاراتى, ورتالىق مەملەكەتتىك ورگاندار مەن وڭىرلەر اكىمدىكتەرىنەن كەزدەسۋ بارىسىندا كوتەرىلگەن ماسەلەلەر مەن ۇسىنىستاردى ءتيىستى دارەجەدە پىسىقتاپ, سونداي-اق ورتا بيزنەسپەن وتكەن كەزدەسۋلەر بارىسىندا ايتىلعان ماسەلەلەردىڭ شەشىلۋىنە مونيتورينگ جۇرگىزۋدى تالاپ ەتتى.
