پارادتى قورعانىس ءمينيسترىنىڭ ءبىرىنشى ورىنباسارى, گەنەرال-لەيتەنانت مارات قۇسايىنوۆ, ماڭعىستاۋ وبلىسىنىڭ اكىمى نۇرلان نوعاەۆ, قارۋلى كۇشتەردىڭ ارداگەرلەرى باقىلادى. اسكەري-تەڭىز كۇشتەرىنىڭ باس قولباسشىسى, كونتر-ادميرال ساكەن بەكجانوۆ شەرۋدى باسقاردى.
سالتاناتتى ساپتا بىرىنەن كەيىن ءبىرى «قازاقستان», «ورال», «سارىارقا», «ماڭعىستاۋ» زىمىراندى-ارتيللەريالىق كەمەلەرى, «الاتاۋ» مينا-تارتقىش كەمەسى, «تابيعات» جانە «جايىق» گيدروگرافيالىق كەمەلەرى ءجۇردى. جاعالاۋ بويىمەن بىردەي ساپ تۇزەگەن تەڭىزشىلەر كورەرمەندەردى كەمە ارتيللەرياسى قارۋىنىڭ دۇركىندەتكەن داۋىسىمەن قارسى الدى.
قالا جاعالاۋىندا شەرۋدىڭ قۇرلىقتاعى بولىگى ءوتتى. اسكەري وركەستردىڭ ۇنىمەن سالتاناتتى مارشپەن اقتاۋ گارنيزونىنىڭ اسكەري بولىمدەرىنىڭ سالتاناتتى ەسەپتوپتارى ءجۇرىپ ءوتتى. سونىمەن قاتار كورەرمەندەرگە اسكەري كەمەلەردىڭ وق جاۋدىرۋى ارقىلى بۇركەمەلەپ, تەڭىز جاعالاۋىنا تاكتيكالىق دەسانت ءتۇسىرۋ كورىنىسى ۇسىنىلدى. ناقتىراق ايتقاندا, تەڭىز جاياۋ اسكەرلەرى بيىل اسكەري-تەڭىز كۇشتەرىنىڭ قاتارىنا قوسىلعان «قايسار» بروندى جىلدام قايىعىنان دەسانت ءتۇسىرۋ تاپسىرماسىن پىسىقتادى. وقۋ-جاۋىنگەرلىك تاپسىرمالاردى ورىنداۋ بارىسىندا تەڭىز جاياۋ اسكەرلەرىنىڭ روتاسى شارتتى قارسىلاس قولىنداعى پلاتسدارمدى قايتاردى.
ءداستۇر بويىنشا اسكەري قىزمەتشىلەر ماڭعىستاۋ جاۋىنگەرلەرىن ەسكە الدى. ماڭگىلىك الاۋعا گۇل شوقتارىن قويۋ راسىمىنە كەڭەس وداعىنىڭ باتىرى, حالىق قاھارمانى, عارىشكەر, اۆياتسيا گەنەرال-مايورى توقتار اۋباكىروۆ, كونتر-ادميرال راتمير كومراتوۆ, قارۋلى كۇشتەردىڭ ارداگەرلەرى قاتىستى.
قارۋلى كۇشتەر ۇلتتىق اسكەري-پاتريوتتىق ورتالىعىنىڭ ورتالىق ءانسامبلى مەن ورتالىق اسكەري وركەسترى دايىنداعان مەرەكەلىك كونتسەرت قالا تۇرعىندارىنا كەرەمەت كوڭىل كۇي سىيلادى. ءىس-شارانىڭ ەڭ قىزىقتى ءساتى – اسكەري-تەڭىز كۇشتەرىنىڭ 30 جىلدىق مەرەيتويىنا ارنالعان مەرەكەلىك وتشاشۋ بولدى.
