قازىردىڭ وزىندە شۆەيتساريالىق ستەن ۆاۆرينكا, اۋستريالىق دومينيك تيم, امەريكالىق سەباستيان كوردا جانە تاعى باسقا تانىمال تەننيسشىلەر استاناعا كەلەتىندەرىن راستادى. ال سول ويىنشىلارعا قىسقاشا توقتالساق, 33 جاستاعى ستەن ۆاۆرينكا «ۇلكەن دۋلىعا» ساناتىنداعى تۋرنيرلەردى ءۇش رەت ۇتقان. اتاپ ايتساق, 2014 جىلى اۋستراليانىڭ اشىق بىرىنشىلىگى, 2015 جىلى رولان گارروس جانە 2016 جىلى US Open دوداسىندا باس جۇلدەنى ولجالادى. سول جارىستاردىڭ فينالىندا ول يسپانيالىق رافاەل نادال مەن سەربيالىق نوۆاك دجوكوۆيچ (ەكى رەت) سىندى اتتارى اڭىزعا اينالعان تەننيسشىلەردى تىزە بۇكتىردى. ستەن اتر جارىستارىن 16 مارتە ۇتتى. ودان بولەك, 2008 جىلى جۇپتىق سايىستا بەيجىڭ وليمپياداسىنىڭ جەڭىمپازى اتاندى. ءداۋىرى ءجۇرىپ تۇرعان كەزىندە شۆەيتساريانىڭ ساڭلاعى الەمدىك رەيتينگتە ءۇشىنشى ورىنعا دەيىن كوتەرىلدى. بۇگىنگى تاڭدا ۆاۆرينكا اتر رەيتينگىندە 21-ورىندى يەلەنىپ وتىر.
29 جاستاعى دومينيك تيم 2020 جىلى US Open تۋرنيرىندە توپ جاردى. اقتىق سىندا ول گەرمانيالىق الەكساندر زۆەرەۆتى ءسۇرىندىردى. سول كەزدە اۋستريانىڭ سايىپقىرانى الەمدىك رەيتينگتە ءۇشىنشى ساتىعا جايعاستى. ەكى رەت رولان گارروس جانە ءبىر رەت اۋستراليانىڭ اشىق بىرىنشىلىگىنىڭ فينالىندا وينادى. پاريجدەگى جارىستىڭ شەشۋشى تۇسىندا ول ەكى رەتىندە دە رافاەل نادالگە جول بەرسە, مەلبۋرندە نوۆاك دجوكوۆيچتەن جەڭىلدى. 2019 جانە 2020 جىلدارى اتر-ءدىڭ قورىتىندى تۋرنيرلەرىنىڭ فينالىندا ونەر كورسەتىپ, ءدۇبىرلى دودالاردىڭ 17-سىندە دارا شىقتى. جاراقاتىنا بايلانىستى ءبىراز ۋاقىت كورتقا شىقپاعاندىقتان, بۇگىندە تيم رەيتينگتە 83-ورىندا تۇر.
23 جاستاعى سەباستيان كوردا – قازىر ناعىز بابىندا. اتر تىزىمىندە 30-ورىنعا تۇراقتاعان اقش-تىڭ وكىلى بيىل اۋستراليانىڭ اشىق بىرىنشىلىگىنىڭ شيرەك فينالىنا دەيىن جەتتى. 2020 جىلى رولان گارروس جانە 2021 جىلى ۋيمبلدوننىڭ ءتورتىنشى كەزەڭىندە ءسۇرىندى. كەزىندە كوردا جاستار اراسىندا مەلبۋرندەگى «ۇلكەن دۋلىعا» ءتۋرنيرىن ۇتىپ, الەمدىك رەيتينگتە كوش باستادى.
جوعارىدا ەسىمدەرى اتالعان ساڭلاقتاردان بولەك, قازاقستاننىڭ دا ەڭ تاڭداۋلى تەننيسشىلەرى استاناداعى تۋرنيردە باق سىنايدى. سولاردىڭ اراسىنان الەكساندر بۋبليكتى جەكە-دارا اتاپ وتۋگە بولادى. 26 جاستاعى جەرلەسىمىز بيىل ۋيمبلدوننىڭ ءتورتىنشى كەزەڭىندە وينادى. 2020 جىلى جاسىل قۇرلىقتاعى «ۇلكەن دۋلىعا» ساناتىنداعى ءتۋرنيردىڭ جارتىلاي فينالىندا جانە 2021 جىلى پاريجدەگى دودانىڭ فينالىندا ونەر كورسەتتى. سوڭعى ەكى جىلدا مونپەلە مەن گاللەدەگى اتر جارىستارىنىڭ اقتىق سىنىندا گەرمانيالىق الەكساندر زۆەرەۆ پەن رەسەيلىك اندرەي رۋبلەۆتەن ايلاسىن اسىرىپ, باس جۇلدەنى قانجىعاسىنا بايلادى. بۇل كۇندەرى بۋبليك الەمدىك رەيتينگتە 27-ورىندى ەنشىلەپ وتىر.
