1. قازاقستان رەسپۋبليكاسىنىڭ پرەزيدەنتى قاسىم-جومارت توقاەۆ ۆەتنام سوتسياليستىك رەسپۋبليكاسىنىڭ پرەزيدەنتى ۆو ۆان تحىونگتىڭ شاقىرۋىنا وراي 2023 جىلعى 20-22 تامىز ارالىعىندا ۆەتنامعا رەسمي ساپارمەن باردى.
2. ساپار اياسىندا پرەزيدەنت قاسىم-جومارت توقاەۆ ۆكپ وك-نىڭ باس حاتشىسى نگۋەن فۋ چونگپەن كەزدەستى, پرەزيدەنت ۆو ۆان تحىونگپەن, پرەمەر-مينيستر فام مين چينمەن جانە ۇلتتىق جينالىس توراعاسى ۆىونگ دين حيۋەمەن كەلىسسوزدەر جۇرگىزدى, سونداي-اق باكنين جانە حايزىونگ پروۆينتسيالارىنداعى بىرقاتار ەكونوميكالىق جانە مادەني نىسانداردى ارالادى.
3. ساپار بارىسىندا تاراپتار ساياسي, ساۋدا-ەكونوميكالىق, ينۆەستيتسيالىق, كولىك-لوگيستيكالىق, مادەني جانە تۋريستىك سالالارداعى ىنتىماقتاستىقتى دامىتۋ شارالارى تۋرالى, سونداي-اق حالىقارالىق جانە وڭىرلىك كۇن ءتارتىبىنىڭ ءوزارا قىزىعۋشىلىق تۋدىراتىن وزەكتى ماسەلەلەرى بويىنشا جان-جاقتى پىكىر الماستى.
4. كەلىسسوزدەر بارىسىندا پرەزيدەنت قاسىم-جومارت توقاەۆ پەن پرەزيدەنت ۆو ۆان تحىونگ قازاقستان مەن ۆەتنامدى ءداستۇرلى دوستىق قارىم-قاتىناستار بايلانىستىراتىنىن راستادى. تاراپتار سوڭعى كەزدەرى ەكىجاقتى قاتىناستارداعى ىلگەرىلەۋشىلىككە قاناعاتتانۋشىلىق ءبىلدىرىپ, قالىپتاسقان ءوزارا سەنىمدى ساياسي ديالوگتى ەرەكشە اتاپ ءوتتى.
قازاقستان مەن ۆەتنام اراسىنداعى ىنتىماقتاستىق ءوزارا ءتيىمدى ءىس-قيمىل جاساۋ ءۇشىن جوعارى الەۋەتى بار جاڭا سالالاردى قوسا العاندا, ءوزارا مۇددەلىلىكتى بىلدىرەتىن بارلىق باعىتتار بويىنشا كەڭەيىپ جاتقانى باسا ايتىلدى.
مەملەكەت باسشىلارى بارلىق دەڭگەيلەردە, ونىڭ ىشىندە ەكى ەلدىڭ پارتيالارى, ۇكىمەتتەرى جانە پارلامەنتتەرى جەلىسى بويىنشا دەلەگاتسيالار الماسۋدى, سونداي-اق حالىقتار اراسىنداعى مادەني بايلانىستاردى جانداندىرۋ; ءوزارا تۇسىنىستىك پەن سەنىمدى نىعايتۋ, سونداي-اق ەكىجاقتى سان سالالى ءوزارا ءىس-قيمىلدى كەڭەيتۋ ماقساتىندا ۇكىمەتارالىق كوميسسيا, ساياسي كونسۋلتاتسيالار مەن باسقا دا فورماتتار سياقتى قولدانىستاعى ىنتىماقتاستىق تەتىكتەرىن ءتيىمدى تۇردە ىسكە قوسۋ نيەتىن راستادى.
5. پرەزيدەنتتەر ساۋدا-ەكونوميكالىق ىنتىماقتاستىقتى دامىتۋدىڭ ماڭىزدىلىعىن اتاپ ءوتتى, بيزنەستىڭ ەكى ەلدىڭ نارىقتارىنا ءوزارا قول جەتكىزۋى ءۇشىن قولايلى جاعدايلار جاساۋ جانە ءوزارا پايدالى ساۋدانى قامتاماسىز ەتۋدىڭ ءتيىمدى تەتىكتەرىن, ونىڭ ىشىندە قازاقستاننان ۆەتنامعا جانە كەرى قاراي كونتەينەرلىك تاسىمالداردى ۇلعايتۋ ءۇشىن شارالار قابىلداۋ ماقساتىندا قولدانۋ مۇمكىندىگىن قاراستىرۋ نيەتىن راستادى.
تاراپتار تۋريزم, اقپاراتتىق تەحنولوگيالار, اۋىل شارۋاشىلىعى, كولىك جانە لوگيستيكا سياقتى جانە باسقا دا الەۋەتتى ىنتىماقتاستىق باعىتتارىن تالقىلادى.
6. مەملەكەت باسشىلارى قازاقستان مەن ۆەتنام اراسىنداعى ساۋدانىڭ وسۋىنە ىقپال ەتەتىن ۆەتنام سوتسياليستىك رەسپۋبليكاسى مەن ەۋرازيالىق ەكونوميكالىق وداق اراسىنداعى ەركىن ساۋدا تۋرالى كەلىسىمدى ىسكە اسىرۋدىڭ وڭ ناتيجەلەرىن جوعارى باعالادى. تاراپتار ەكىجاقتى ساۋدانى ودان ءارى ىلگەرىلەتۋ ءۇشىن وسى كەلىسىمنىڭ ارتىقشىلىقتارىن پايدالانۋعا دايىن ەكەندىگىن ءبىلدىردى.
7. پرەزيدەنتتەر 2022 جىلعى قازاندا قازاقستان رەسپۋبليكاسى مەن ۆەتنام سوتسياليستىك رەسپۋبليكاسى اراسىندا تىكەلەي اۋە قاتىناسىنىڭ اشىلۋى ەكى ەل اراسىنداعى ساۋدا-ەكونوميكالىق, ينۆەستيتسيالىق, تۋريستىك جانە مادەني ىنتىماقتاستىقتىڭ دامۋىن ىنتالاندىرۋعا قولايلى جاعدايلار جاساعانىن قاناعاتتانۋشىلىقپەن اتاپ ءوتتى.
8. مەملەكەت باسشىلارى 2009 جىلعى 15 قىركۇيەكتەگى قازاقستان رەسپۋبليكاسىنىڭ ۇكىمەتى مەن ۆەتنام سوتسياليستىك رەسپۋبليكاسىنىڭ ۇكىمەتى اراسىنداعى ءبىلىم بەرۋ سالاسىنداعى ىنتىماقتاستىق تۋرالى كەلىسىمگە تولىقتىرۋ ەنگىزۋ تۋرالى 2017 جىلعى 3 قاڭتارداعى حاتتامانىڭ نەگىزىندە ءبىلىم بەرۋ سالاسىنداعى ىنتىماقتاستىقتى جانداندىرۋعا قىزىعۋشىلىق ءبىلدىردى.
9. پرەزيدەنتتەر مادەني-گۋمانيتارلىق بايلانىستاردى جانداندىرۋدىڭ, ونىڭ ىشىندە ەكى حالىقتى جۇمىلدىرۋ جانە ءوزارا تۇسىنىستىكتى تەرەڭدەتۋ, مادەنيەتتەردى بىرلەسىپ بايىتۋ جانە ەكىجاقتى قاتىناستاردى تۇتاس دامىتۋ ماقساتىندا عىلىم, سپورت جانە دەنساۋلىق ساقتاۋ سالاسىنداعى ىنتىماقتاستىق پەن الماسۋدى كەڭەيتۋدىڭ ماڭىزدىلىعىن راستادى.
10. مەملەكەت باسشىلارى حالىقارالىق ۇيىمدار مەن فورۋمدار شەڭبەرىندە جۇزەگە اسىرىلىپ جاتقان ەكى ەلدىڭ تىعىز ۇيلەسىمى مەن ءوزارا قولداۋىن جوعارى باعالادى. تاراپتار وڭىردەگى بەيبىتشىلىك, دامۋ مەن وركەندەۋ تۇرعىسىنان مۇشە مەملەكەتتەر اراسىنداعى ىنتىماقتاستىقتى نىعايتۋ ماقساتىندا كوپجاقتى فورۋمداردا, اتاپ ايتقاندا ازياداعى ءوزارا ءىس-قيمىل جانە سەنىم شارالارى جونىندەگى كەڭەس (اوسشك) شەڭبەرىندە ىنتىماقتاستىقتى ودان ءارى وربىتۋگە ۇمتىلىسىن اتاپ ءوتتى.
ۆەتنام تاراپى اسەان جانە وڭتۇستىك-شىعىس ازيا ەلدەرىمەن ىنتىماقتاستىقتى نىعايتۋدا بايلانىستىرۋشى بۋىن بولىپ, قازاقستاندى قولداۋعا دايىن ەكەنىن ءبىلدىردى.
تاراپتار حالىقارالىق جانە وڭىرلىك ماسەلەلەر تۋرالى پىكىر الماستى. ۆەتنام تاراپى وڭتۇستىك قىتاي تەڭىزدەگى قازىرگى جاعداي تۋرالى حاباردار ەتتى. تاراپتار بەيبىتشىلىكتى, قاۋىپسىزدىك پەن تۇراقتىلىقتى ساقتاۋدىڭ, سونداي-اق حالىقارالىق قۇقىق پەن بۇۇ جارعىسى نەگىزىندە بارلىق داۋلاردى بەيبىت جولمەن شەشۋدىڭ ماڭىزدىلىعىن اتاپ ءوتتى.
11. ساپار شەڭبەرىندە مىناداي قۇجاتتارعا: (1) قازاقستان رەسپۋبليكاسى مەن ۆەتنام سوتسياليستىك رەسپۋبليكاسى اراسىنداعى سوتتالعان ادامداردى بەرۋ تۋرالى شارتقا; (2) قازاقستان رەسپۋبليكاسىنىڭ ۇكىمەتى مەن ۆەتنام سوتسياليستىك رەسپۋبليكاسىنىڭ ۇكىمەتى اراسىنداعى ۇلتتىق پاسپورتتاردىڭ يەلەرىن ۆيزالىق تالاپتاردان ءوزارا بوساتۋ تۋرالى كەلىسىمگە; (3) قازاقستان رەسپۋبليكاسىنىڭ ۇكىمەتى مەن ۆەتنام سوتسياليستىك رەسپۋبليكاسىنىڭ ۇكىمەتى اراسىنداعى 2023–2025 جىلداردا ساۋدا-ەكونوميكالىق ىنتىماقتاستىقتى جەدەل دامىتۋ جونىندەگى بىرلەسكەن ءىس-قيمىل جوسپارىنا; (4) قازاقستان رەسپۋبليكاسىنىڭ مادەنيەت جانە سپورت مينيسترلىگى مەن ۆەتنام سوتسياليستىك رەسپۋبليكاسىنىڭ مادەنيەت, سپورت جانە تۋريزم مينيسترلىگى اراسىنداعى تۋريزم سالاسىنداعى ىنتىماقتاستىق تۋرالى مەموراندۋمعا; (5) قازاقستان رەسپۋبليكاسى سىرتقى ىستەر مينيسترلىگىنىڭ ينۆەستيتسيالار كوميتەتى مەن ۆەتنام سوتسياليستىك رەسپۋبليكاسىنىڭ ينۆەستيتسيالار جونىندەگى اگەنتتىگى اراسىنداعى ىنتىماقتاستىق تۋرالى مەموراندۋمعا; (6) «QazTrade» cاۋدا ساياساتىن دامىتۋ ورتالىعى» اق مەن «VietTrade» ۆەتنامنىڭ ساۋداعا جاردەمدەسۋ جونىندەگى اگەنتتىگى اراسىنداعى ىنتىماقتاستىق تۋرالى مەموراندۋمعا; (7) «حابار» اگەنتتىگى» اق مەن «Vietnam Television» اراسىنداعى ءوزارا تۇسىنىستىك تۋرالى مەموراندۋمعا قول قويىلدى.
12. قازاقستان رەسپۋبليكاسىنىڭ پرەزيدەنتى قاسىم-جومارت توقاەۆ ۆەتنام سوتسياليستىك رەسپۋبليكاسىنىڭ پرەزيدەنتى ۆو ۆان تحىونگ پەن ۆەتنام حالقىنا جىلى شىرايلى قوناقجايلىلىعى ءۇشىن شىنايى ريزاشىلىعىن ءبىلدىردى. پرەزيدەنت قاسىم-جومارت توقاەۆ پرەزيدەنت ۆو ۆان تحىونگتى وزىنە ىڭعايلى ۋاقىتتا قازاقستانعا كەلۋگە شاقىردى. پرەزيدەنت ۆو ۆان تحىونگ شاقىرۋدى ريزاشىلىقپەن قابىلدادى. ساپار مەرزىمى ديپلوماتيالىق ارنالار ارقىلى كەلىسىلەتىن بولادى.
