ەل ىشىندە قولتىعىمىزدان دەمەسە, دەم بەرىپ جەبەسە, نارىق ايدىنىندا سۋداعى بالىقتاي ەركىن ءجۇزىپ كەتەر ەدىك دەگەن ءسوز ءجيى ايتىلادى. ارينە, دۇنيە قۇرالۋ ءۇشىن وڭ جامباسىنا كەلەتىن ءىس باستاۋ ءۇشىن دە العاشقى قاراجاتتىڭ اۋاداي كەرەك ەكەنى بەلگىلى. بۇل باعدارلامانىڭ باستى ماقساتى – اۋىل حالقىنىڭ الەۋمەتتىك-تۇرمىستىق جاعدايىن جاقسارتۋ. ءماندى مۇرات جۇزەگە اسۋى ءۇشىن اۋىل مەن شاعىن قالالاردىڭ تۇرعىندارىنا 1,2 ملرد تەڭگە كولەمىندە نەسيە بەرىلگەلى وتىر. شىنتۋايتىندا بەرىلىپ تە جاتىر. بيىل ماۋسىم ايىنىڭ سوڭىندا «Kokshe» الەۋمەتتىك-كاسىپكەرلىك كورپوراتسياسى» اق وڭىرلىك تۇراقتاندىرۋ قورىمەن شارت جاساسقان. وتىنىمدەردى قابىلداۋ ءجۇرىپ جاتىر. بار تالاپتى سارالاي كەلە, اۋىل تۇرعىندارىنىڭ جەڭىلدەتىلگەن نەسيە الىپ, ءوز كاسىبىن دوڭگەلەتۋگە مۇمكىندىگى بار. كۇنى بۇگىنگە دەيىن جالپى كولەمى 872 ملن تەڭگە بولاتىن نەسيەگە 139 ءوتىنىم بەرىلگەن. 56 تالاپكەردىڭ وتىنىشتەرى قاناعاتتاندىرىلىپتى. ارقيلى سەبەپپەن 11 ءوتىنىش بەرۋشىنىڭ قۇجاتتارى كەيىن قايتارىلعان. قازىر ولار كەم-كەتىگىن تولىقتىرىپ, زاڭداستىرۋدا.
وبلىستىق اۋىل شارۋاشىلىعى جانە جەر قاتىناستارى باسقارماسى باسشىسىنىڭ ورىنباسارى قاسىم يتقۇسوۆتىڭ ايتۋىنا قاراعاندا, 250 ادام نەسيە الىپ, جۇمىسىن باستاعان كەزدە جاڭا جۇمىس ورىندارى دا اشىلماق. تاۋەكەل ەتۋدەن تايسالعاندار ءۇشىن بۇل دا – نەسىبە. ورتاشا نەسيە كولەمى 4,8 ملن تەڭگەنى قۇرايدى. ءوڭىردىڭ ءاربىر اۋدانىندا نەسيە الۋشىلاردىڭ قۇجاتتامالارىن ىرىكتەپ, دايىنداۋدى قولعا الىپ وتىرعان جۇمىس توپتارى قۇرىلعان.
وسى ارادا ەل ەڭسەسىن تىكتەۋگە ىقپالى تيەتىن باعدارلاماعا قاتىسۋشىلارعا بەرىلەتىن نەسيە شارتىن ايتا كەتسەك, ارتىقتىعى بولماس. ەڭ باستىسى, سىياقى مولشەرلەمەسىنىڭ جىلدىق كولەمى 2,5 پايىزدان اسپايدى. نەسيەنى وتەۋ مەرزىمى – 5 جىل. بىراق ونىڭ ىشىندە مال شارۋاشىلىعىمەن اينالىساتىندارعا جەتى جىلعا دەيىن بەرىلەدى. شاعىن نەسيەنىڭ ەڭ جوعارى كولەمى – 8,6 ملن تەڭگە. ارينە, كەپىل بولۋى قاجەت.
بۇل جوباعا اۋىل جانە شاعىن قالا تۇرعىندارى, ونىڭ ىشىندە جۇمىسسىزدار, زەينەتكە جاسى تولماعان, بۇرىنعى جۇمىسىنان قىسقارتىلعان جۇمىسكەرلەر ءوزىن-ءوزى جۇمىسپەن قامتيتىن ادامدار نەمەسە ءىسىن جاڭا باستاۋعا بەل بۋعان كاسىپكەرلەر قاتىسا الادى.
بۇگىنگى بەتالىسىن تارازى باسىنا تارتساڭىز, جەڭىلدەتىلگەن نەسيە بەرۋ باعدارلاماسىن جۇرتشىلىق جاقسى قابىلداپ وتىر. اسىرەسە اتباسار, جاقسى, ارشالى, ءبىرجان سال اۋداندارىندا ىنتا بىلدىرۋشىلەر كوپ. قولىنا قاراجات تيگەندەر مال, قۇس شارۋاشىلىعىمەن اينالىسا الادى. سونداي-اق كارتوپ پەن كوكونىس وسىرەمىز دەسەڭىزدەر, ەرىكتەرىڭىز. ءتىپتى قاراجاتى جەتىپ جاتسا, قاجەتتى تەحنيكا مەن قۇرال-جابدىقتار دا الۋعا بولادى. بيزنەستىڭ باسقا تۇرلەرىن دە دامىتامىن دەپ العا ۇمتىلساڭىز, ەركىڭىز ءبىلسىن.
ءوتىنىم بىلدىرۋشىلەردىڭ ىنتاسىن سارالاساق, مال شارۋاشىلىعىن دامىتۋعا نيەت بىلدىرۋشىلەر كوپ. ونىڭ ىشىندە ءسۇتتى باعىتتى قولايلى كورىپ وتىرعاندار دا بار. كۇنى بۇگىنگە دەيىن بىرنەشە كاسىپكەر اۋىل شارۋاشىلىعى تەحنيكالارىن ساتىپ الىپتى. ءتىپتى ءبىر ادام جەكە شاعىن بالاباقشا اشۋعا نيەت ەتكەن. وبلىستىق اۋىل شارۋاشىلىعى باسقارماسى اۋىل ادامدارىنا ناپاقا تاۋىپ بەرۋگە سەپتىگىن تيگىزەتىن باعدارلاما قىركۇيەك ايىندا اياقتالادى دەپ وتىر. دەمەك بۇرىن قۇلاقتانباعان ادامدار جەدەل قيمىلداپ قالۋى كەرەك. ءبىر جاقسىسى, نيەت بىلدىرۋشىلەر كوپ بولاتىن بولسا, قوسىمشا قاراجات تا بولىنەتىن سىڭايلى.
ەندى وسى ارادا مال باعۋ ماسەلەسىنە توقتالا كەتەلىك. ءبىزدىڭ وڭىردە جايىلىم مەن شابىندىق ماسەلەسى ۋشىعىپ تۇر. باسقارما باسشىسى ورىنباسارىنىڭ ايتۋىنا قاراعاندا, بۇرىننان جۇمىس ىستەپ كەلە جاتقان اگروقۇرىلىمدارمەن مەموراندۋمدار جاسالۋى مۇمكىن. ەل قامىن ويلاعان ازاماتتار جۇمىسىن جاڭا باستاعاندارعا جايىلىم جانە شابىندىقپەن كومەكتەسۋى قاجەت. ايتپاقشى نەسيەنىڭ 20 پايىزىن مال ازىعىن ساتىپ الۋعا جۇمساۋعا بولادى ەكەن.
ويعا العان شارۋا وڭىنان وڭعارىلسا, كاسىپكەرلەر وزدەرىنىڭ ءال-اۋقاتىن ارتتىرۋمەن بىرگە ەلدىڭ اق داستارقانىن ادال اسپەن تولتىرار ەدى.
اقمولا وبلىسى
