«استانانىڭ» تاس-تالقانىن شىعاردى
ءوز ەلىمىزدە وتكەن ويىندا «استانا» بولگاريانىڭ «لۋدوگورەتسىن» 2:1 ەسەبىمەن ۇتقان ەدى. قارىمتا ماتچتا جەرلەستەرىمىز جاقسى ويىن ورنەگىن كورسەتەدى دەپ ۇمىتتەندىك. ويتكەنى بىلتىرعى ماۋسىمدا ەل چەمپيونى اتانعان ەلوردالىق كوماندانىڭ ساپىندا مىقتى ويىنشىلار جەتەرلىك. ونىڭ ۇستىنە جىل سايىن ولار ەۋروليگا تۋرنيرلەرىنە قاتىسىپ, مول تاجىريبە جينادى. وكىنىشكە قاراي, ءبارى ءبىز ويلاعانداي بولمادى. رازگرادتاعى باسەكەدە الاڭ يەلەرى «استانانىڭ» تاس-تالقانىن شىعاردى.
كەزدەسۋدىڭ 25-مينۋتىندا بەرنارد تەكپەتەي ەسەپ اشسا, ارادا ءتورت مينۋت وتكەندە دەمبو داربو تارازى باسىن تەڭەستىردى. سول كەزدە «ۋھ» دەپ ءبىر تەرەڭ تىنىستادىق. بۇل ەسەپ ءبىرىنشى كەزەڭنىڭ سوڭىنا دەيىن ساقتالدى. الايدا ۇزىلىستەن كەيىن «استانانى» مۇلدە تانىماي قالدىق. ولاردىڭ ءجيى قاتەلەسكەنى بىلاي تۇرسىن, قارسىلاستارىنىڭ قارقىنىنا ىلەسە الماي, دارمەنسىز كۇي كەشتى. بولگاريالىق فۋتبولشىلاردىڭ قوس قاپتالدان قىسقانى جانە ورتا تۇستان ۇيىمداستىرعان شابۋىلدارىنىڭ بارلىعى دەرلىك ناتيجەلى بولدى. ەكىنشى كەزەڭدە بەرنارد تەكپەتەي (50-مينۋت) ەكىنشى گولىن سوقسا, ياكۋب پەتروۆسكي دە (47 مەن 58-مينۋتتار) ءدۋبلدىڭ اۆتورى اتاندى. تاعى ءبىر دوپتى كيريل دەسپودوۆ (67-مينۋت) قاقپاعا توعىتتى. سونىمەن قاتار 76-مينۋتتا قوناقتاردىڭ جارتىلاي قورعاۋشىسى دۋشان ءيوۆانچيچتىڭ الاڭنان قۋىلعانىن دا ايتا كەتكەن ءجون. ءسويتىپ, رازگرادتا 1:5 ەسەبىمەن ۇتىلعان «استانا» ەۋروپا ليگاسىنداعى جورىعىن اياقتادى. ەندى ولار كونفەرەنتسيا ليگاسىنىڭ پلەي-وفف كەزەڭىندە باق سىنايدى.
«توبىلدى» توبىقتان قاعا المادى
ۋەفا-نىڭ كونفەرەنيا ليگاسىنىڭ ءۇشىنشى ىرىكتەۋ كەزەڭىندە «توبىل» مەن «دەرري سيتي» ابدەن تىرەستى. سودان ءبىر اپتا بۇرىن قوستانايدا وتكەن ويىن 1:0 ەسەبىمەن الاڭ يەلەرىنىڭ پايداسىنا شەشىلگەن-ءدى. دۋبليندەگى «تاللاحت» ستاديونىندا ماتچتىڭ 15-مينۋتىندا ۋيليام پەتچينگ 11 مەترلىك نۇكتەدەن نىسانانى ءدال كوزدەگەندە, كوڭىلىمىزدىڭ ءپاس بولعانىن نەسىنە جاسىرايىق. الدا ءالى 1 ساعات 15 مينۋتتاي ۋاقىت بار. سول ۋاقىت ارالىعىندا يرلانديالىق فۋتبولشىلار ۇزدىكسىز شابۋىلداپ, تاعى بىرنەشە دوپتى توردا توعىتاتىن شىعار دەپ ويلادىق. ءيا, سولايى سولاي بولدى. بىراق «توبىلدىڭ» ويىنشىلارى سالقىنقاندىلىق تانىتىپ, سول ەسەپتى باسەكەنىڭ سوڭىنا دەيىن ساقتاپ قالدى.
قوسىمشا ۋاقىتتا دا جەڭىمپاز انىقتالمادى. سودان قوس كوماندا پەنالتي سوقتى. العاشىندا ورتاعا شىققان ءتورت ويىنشىنىڭ بارلىعى دا نىسانانى ءدال كوزدەدى. ولار – پاتريك ماكەلەني, برەندون كاۆانا, دانيەل مۋللەن, دجوردان ماكەنەفف («دەرري سيتي») جانە رامازان ورازوۆ, ميليان ۆۋكادينوۆيچ, ەۆگەني شاحوۆ, رومان اسرانقۇلوۆ («توبىل»). ودان كەيىن يرلانديالىق جارتىلاي قورعاۋشى بەن دوەرتي مەن قازاقستاندىق كوماندا ساپىنداعى بوسنيالىق لەگيونەر يوۆان يليچ ءمۇلت كەتتى. سوڭىندا الاڭ يەلەرى قاتارىنان كيان كاۆانا عانا گول سوقسا, «توبىلدىڭ» ويىنشىلارى اراسىنان بويان ملادجوۆيچ پەن پاۆەل كيرەەنكو مەرگەندىك تانىتىپ, ءوز كوماندالارىن پلەي-وفف كەزەڭىنە الىپ شىقتى. ەسەپ – 6:5.
«سەپسي» سان سوقتىرىپ كەتتى
كونفەرەنتسيا كۋبوگىنە قاتىسقان تاعى ءبىر كوماندامىز – «اقتوبە» جانكۇيەرلەر سەنىمىن اقتاي المادى. رۋمىنيانىڭ سفىنتۋ-گەورگ قالاسىندا جەرگىلىكتى «سەپسيمەن» وتكەن العاشقى ماتچ 1:1 ەسەبىمەن تەڭ اياقتالعاندا, جەرلەستەرىمىزدىڭ كەلەسى كەزەڭگە شىعاتىنىنا ەشكىمنىڭ كۇمانى بولمادى. الايدا اندرەي كارپوۆيچتىڭ شاكىرتتەرى بۇل دوداعا دايار بولماي شىقتى.
باسەكە بارىسىندا قوس كوماندا الما-كەزەك شابۋىلدار ۇيىمداستىرعانىمەن, ءبىر ساعاتتان اسا ۋاقىت بويى ولار ءبىر-ءبىرىنىڭ وسال تۇسىن تابا المادى. بۇل رەتتە «اقتوبەنىڭ» ويىنشىلارى بەلسەندى كورىنگەنى راس. بىراق ەسەپتى قوناقتار اشتى. كەزدەسۋدىڭ 66-مينۋتىندا نيكولاە پەۋن نىسانى ءدال كوزدەدى – 1:0. سول ەسەپ ويىننىڭ سوڭىنا دەيىن ساقتالدى. ناتيجەسىندە, «سەپسي» اتالعان جارىستىڭ پلەي-وففىنا جولداما السا, «اقتوبە» ءۇشىن ەۋروليگاداعى جورىق اياقتالدى.
