فوتو: اقپارات جانە قوعامدىق دامۋ مينيسترلىگى
«مەملەكەت باسشىسى ازاماتتىق قوعام قۇرۋ نەگىزگى باسىمدىقتىڭ ءبىرى ەكەنىن ۇنەمى ايتىپ كەلەدى. پرەزيدەنت جولداۋىندا, سايلاۋالدى باعدارلامالارىندا بۇل ماسەلەنىڭ ماڭىزىنا ءمان بەرگەنى بەلگىلى», دەپ جازدى دارحان قىدىرالى ءوز پاراقشاسىندا.
مينيستر بۇل فورۋمدا جاستار جايى دا ايتىلعانىن جازدى.
«مەملەكەت تاراپىنان جاستاردى قولداۋعا ايرىقشا نازار اۋدارىلىپ كەلەدى. بيىلعى ۇلتتىق قۇرىلتايدىڭ «ادىلەتتى قازاقستان – ادال ازامات» اتتى ەكىنشى وتىرىسىندا مەملەكەت باسشىسى: «جاس ۇرپاق تاريح تاعىلىمىن جانە ەلدىڭ جارقىن بولاشاققا ۇمتىلىسىن ءبىر ارناعا توعىستىرىپ جاتىر. وسى سەرپىلىستىڭ قارقىنىن ساقتاي وتىرىپ, ونى كۇشەيتە ءتۇسۋ – مەملەكەتتىڭ مىندەتى», دەپ اتاپ وتكەن بولاتىن. بۇگىنگى القالى جيىننىڭ جاستار ماسەلەسىنە ارنالۋىنىڭ دا وزىندىك ءمانى زور», دەيدى د.قىدىرالى.
ازاماتتىق قوعام ينستيتۋتتارىنىڭ ماڭىزدى توپتارىنىڭ ءبىرى – قوعامدىق كەڭەستەر. قازىرگى تاڭدا ەلىمىزدە 258 قوعامدىق كەڭەس جۇمىس ىستەيدى, ولاردىڭ قۇرامىنا 4 مىڭعا جۋىق جاناشىر ازامات, ءتۇرلى ساراپشى ماماندار تارتىلعان.
«بۇل فورۋمنىڭ ازاماتتىق قوعامنىڭ دامۋىنا ۇلەسى مول بولادى دەپ ويلايمىن. جيىندا شىمكەنت قالاسىنىڭ اكىمى مۇرات ايتەنوۆ, قازاقستاننىڭ ازاماتتىق اليانسىنىڭ توراعاسى بانۋ نۇرعازيەۆا جانە باسقا ساراپشىلار ءسوز سويلەپ, ءوز ويلارىن ورتاعا سالدى», دەپ جازدى د.قىدىرالى ءوزىنىڭ Facebook-تەگى پاراقشاسىندا.
