الەۋمەتتىك جوبالارعا – 4 ملرد تەڭگە
«حالىق» قورى ماڭعىستاۋداعى الەۋمەتتىك جوبالارعا قولداۋ كورسەتىپ وتىر. بۇل ماقساتقا 4 ملرد تەڭگەدەن اسا قاراجات جۇمسالماق.
ماڭعىستاۋ وبلىسىنىڭ اكىمدىگى مەن «حالىق» جەكە قايىرىمدىلىق قورى ىنتىماقتاستىق تۋرالى ءۇش مەموراندۋمعا قول قويدى. بولىنگەن قاراجات جاڭاوزەندە دەنە شىنىقتىرۋ-ساۋىقتىرۋ ورتالىعى مەن 20 اۋلا الاڭىن سالۋعا, بەينەۋدەگى استىق تەرمينالىنىڭ جۇمىسىن قالپىنا كەلتىرۋگە جانە جاڭعىرتۋعا جۇمسالادى.
سۋ تۇششىتۋ زاۋىتى سالىنادى
تۇپقاراعان اۋدانى اقشۇقىر اۋىلىندا قۋاتتىلىعى تاۋلىگىنە 4 مىڭ تەكشە مەتر سۋ تۇششىتۋ زاۋىتى سالىنادى.
تۇپقاراعان اۋدانى اكىمىنىڭ مىندەتىن اتقارۋشى تالعات التىنعاليەۆتىڭ ايتۋىنشا, اقتاۋعا جاقىن ورنالاسقان اقشۇقىر جانە ساين شاپاعاتوۆ اۋىلدارىندا دا سۋ تاپشىلىعى ورىن الىپ وتىر. «حالىق» قورى جوبانى قولداۋعا 300 ملن تەڭگە بولەدى.
ورتالىق قۇدىق ارقىلى اۋىز سۋعا قول جەتكىزگەندەردىڭ ءبىرى – تالشىن ماقسۇتكىزى. قازىر ول ءوز باقشاسىنا جاقسى كۇتىم جاساي باستاعالى اعاشتار جەمىس بەرە باستاعانىن ايتادى.
«وسى كوكتەمنەن باستاپ ۇيىمىزگە ورتالىق جۇيەدەن سۋ كەلە باستادى. ماڭعىستاۋ وڭىرىندە جاز وتە ىستىق ەكەنىن بىلەسىزدەر. مەن بالالارمەن بىرگە باقشامىزدى سۋارىپ, ەندى ەڭبەگىمىزدىڭ جەمىسىن جيناي الاتىنىمىزعا قۋانىشتىمىن. بۇل ءۇشىن «حالىق» قايىرىمدىلىق قورىنا العىسىمدى بىلدىرگىم كەلەدى», دەدى ساين شاپاعاتوۆ اۋىلىنىڭ تۇرعىنى.
سپورت ورتالىعى بوي كوتەرەدى
قور قازىرگى زامانعى دەنە شىنىقتىرۋ-ساۋىقتىرۋ ورتالىعىن سالۋعا 1,4 ملرد تەڭگە بولەدى. سونداي-اق جاڭاوزەندە 20 اۋلا بالالار الاڭىن سالادى.
جاڭاوزەندە جاڭا سپورت ورتالىعىنىڭ قۇرىلىسى تۇرعىنداردىڭ دەنساۋلىعىن جاقسارتۋعا عانا ەمەس, جاڭا جۇمىس ورىندارىن قۇرۋعا دا ىقپال ەتەدى. ونىڭ قۇرىلىسى كەزىندە 150 ۋاقىتشا جۇمىس ورنى, ال اشىلعاننان كەيىن 50 تۇراقتى جۇمىس ورنى پايدا بولماق.
جاڭاوزەن قالاسى ءماسليحاتىنىڭ حاتشىسى ساقي مىڭبايدىڭ ايتۋىنشا, نىسانداردى سالۋ بالالارعا عانا ەمەس, جاستارعا دا ءتيىمدى بولادى.
«قازىر حالىق سانى ارتىپ كەلەدى. جاڭا جۇمىس ورىندارىنىڭ اشىلۋى جاستاردى شابىتتاندىرادى. سونىمەن قاتار بالالارىمىز دا جاڭا اۋلا الاڭدارىنا قۋاناتىنى انىق. جاس ۇرپاقتىڭ مادەني ورتادا قالىپتاسۋى ماڭىزدى. جاڭا جۇمىس ورىندارى ولاردىڭ دامۋىنا تىكەلەي اسەر ەتەدى. مۇنداي جوبالاردىڭ كوپ بولعانىن قالايمىز», دەدى س.مىڭباي.
دەنە شىنىقتىرۋ-ساۋىقتىرۋ ورتالىعى – بۇل ادامدار بوكس, كۇرەس, شاعىن فۋتبول, تەننيس, ۆولەيبول جانە باسكەتبول سياقتى ءتۇرلى سپورت تۇرلەرىمەن اينالىسا الاتىن سپورت مەكەمەسى. ورتالىق سپورتزالمەن, كيىم اۋىستىراتىن بولمەلەرمەن جانە دۋش بولمەلەرىمەن جابدىقتالعان.
اۋلا الاڭدارىنا كەلەتىن بولساق, قازىر اكىمدىك 20 ۋچاسكەنى تاڭدايدى. جاڭاوزەننىڭ 55 جىلدىعىنا وراي قۇرىلىس اياقتالىپ, قالا تۇرعىندارىنا تاپسىرىلۋعا ءتيىس.
استىق تەرمينالىن قالپىنا كەلتىرەدى
2021 جىلى بەينەۋ استىق تەرمينالى بانكروت دەپ تانىلىپ, بىرنەشە جىل جۇمىس توقتاپ قالدى.
پرەزيدەنت قاسىم-جومارت توقاەۆ ماڭعىستاۋ وبلىسىنىڭ الەۋمەتتىك-ەكونوميكالىق دامۋى جونىندەگى كەڭەستە تەرمينال قىزمەتىن قايتا باستاۋ قاجەتتىگىن اتاپ ايتقان بولاتىن.
ەندى ماڭعىستاۋ وبلىسىنىڭ اكىمدىگى مەن «حالىق» قورى بەينەۋ استىق تەرمينالىنىڭ جۇمىسىن قايتا باستاۋ ءۇشىن 1,8 ملرد تەڭگەگە قايىرىمدىلىق كومەك كورسەتۋ تۋرالى مەموراندۋمعا قول قويدى. بۇل ءوڭىردى ۇنمەن جانە جەممەن قامتاماسىز ەتۋگە, سونىمەن قاتار ورتالىق ازيا ەلدەرىنە (وزبەكستان, تۇرىكمەنستان, اۋعانستان, ت.ب.) ەكسپورتتىق الەۋەتتى ىسكە اسىرۋعا مۇمكىندىك بەرۋگە ءتيىس.
بەينەۋ اۋدانى اكىمىنىڭ ورىنباسارى جالعاس تەمىروۆتىڭ ايتۋىنشا, بۇل تەرمينالدىڭ جۇمىسى 2018 جىلى توقتاتىلعان.
«كومپانيانىڭ بەلگىلى ءبىر قارىزدارىنا بايلانىستى بۇل ءىرى تەرمينالدىڭ جۇمىسى 5 جىل بويى توقتاپ تۇردى. تەرمينالدىڭ ونىمدىلىگى جىلىنا 90 مىڭ توننا استىق پەن 30 مىڭ توننا ەتتى قۇرايدى. جۇمىستىڭ قايتا جاندانۋى ارقىلى حالىقتى استىقپەن قامتاماسىز ەتۋ جانە جۇمىسقا ورنالاستىرۋ ماسەلەسى شەشىلىپ جاتىر. جاقىن ارادا جۇمىسقا 200-دەن اسا ادام قابىلدانادى. بۇل جەرگىلىكتى تۇرعىندار ءۇشىن وتە ماڭىزدى», دەدى ج.تەمىروۆ.
«حالىق» قورىنان الىنعان اقشاعا ماڭعىستاۋ وبلىسىنىڭ اكىمدىگى «كاسپي» الەۋمەتتىك-كاسىپكەرلىك كورپوراتسياسىمەن بىرلەسىپ, بەينەۋ اۋدانىنداعى استىق تەرمينالىن قالپىنا كەلتىرىپ, ودان ءارى جۇمىس ىستەۋگە باعىتتالعان قىزمەتتى ۇيلەستىرۋدى قامتاماسىز ەتەدى.
