«ازيا جاڭعىرىعى» العاش رەت 2007 جىلى ۇيىمداستىرىلىپ, قازىر وسى ونەر سالاسىنداعى بەدەلدى حالىقارالىق فەستيۆالدىڭ بىرىنە اينالعان. وسى ۋاقىتقا دەيىن وندا الەمنىڭ ۇزدىك تسيرك نومىرلەرى كورسەتىلىپ, الەمنىڭ تۇكپىر-تۇكپىرىندەگى اتاقتى تسيرك ارتىستەرىنىڭ ونەرىن تاماشالاۋعا مۇمكىندىك بەردى. بۇگىندە فەستيۆال وتەتىن كۇندەردى استانا جۇرتشىلىعى عانا ەمەس, بارشا رەسپۋبليكا حالقى اسىعا كۇتەدى.
بيىل ون ءتورتىنشى رەت وتكەن فەستيۆال ازيا ەلدەرىنىڭ عانا ەمەس, ەۋروپا, سولتۇستىك امەريكا مەملەكەتتەرىنىڭ تسيرك مايتالماندارىن جينادى. اتاپ ايتساق, اقش, فرانتسيا, موڭعوليا, قىرعىزستان, وزبەكستان, رەسەي, بەلارۋس, ماجارستان, قىتاي, بولگاريا, يزرايل, ياكۋتيا, گەرمانيا, تاجىكستان جانە قازاقستان ارتىستەرى ا جانە ب كونكۋرس باعدارلامالارىندا بەس كۇن بويى استانالىق تسيرك ارەناسىندا ونەر كورسەتتى.
ونەر دوداسىنا قاتىسۋشىلارعا وسى سالادا الەمدە مويىندالعان ماماندار باعا بەردى.
سونىمەن, ايتۋلى فەستيۆالدىڭ گران-پري جۇلدەسىن «اعايىندى گەرتنەرلەردىڭ اتتراكتسيونى» تسيرك ءنومىرى (گەرمانيا) يەلەنسە, التىن جۇلدەنى جوعارى ورىنداۋشىلىق شەبەرلىگى مەن كاسىبيلىگى ءۇشىن «Slack Wire» (قىتاي) ەركىن سىمداعى تسيرك ءنومىرى, «كارپە ديەم» اۋە گيمناستتارى تسيركىنىڭ قويىلىمى (شىمكەنت), ادىلەت تيكانوۆتىڭ جەتەكشىلىگىمەن «حاسساك» قوس ماچتى تسيرك اكروباتى (الماتى), سونداي-اق يليا تيۋفياەۆتىڭ جەتەكشىلىگىمەن قوس تاياقتاعى اكروباتتار جەڭىپ الدى. ال كۇمىس جۇلدە اندرەي پوگورەلوۆتىڭ جەتەكشىلىگىمەن «وتتى دوڭگەلەك» تسيرك ءنومىرى (رەسەي), اۋە گيمناستتارىنىڭ «سەزىمدەر قوزعالىسى» تراپەتسيالىق تراپەتسيا اكتىسى (بەلارۋس), «دۋەت انترەسول» (رەسەي) دوڭگەلەكتەگى اۋە گيمناستتارىنىڭ ونەرىنە بۇيىردى. قولا جۇلدە «Earth Sky» ەكۆيليبر تسيرك ءنومىرى (بولگاريا), ماچتاداعى اەرواكروباتتاردىڭ قويىلىمى (ياكۋتيا), «ارمانىڭا ۇمتىل» اۋە گيمناستيكاسىنىڭ تسيرك نومىرىنە (الماتى) تابىستالدى. بۇدان بولەك, ارنايى سىيلىقتار تاپسىرىلىپ, ءتۇرلى الەمدىك فەستيۆالدارعا شاقىرتۋلار بەرىلدى.
ءداستۇرلى تۇردە ءوتىپ كەلە جاتقان فەستيۆال قازاق تسيرك ونەرىنىڭ دامۋىنا, شىعارماشىلىق تىنىسىنىڭ كەڭەيۋىنە ىقپال ەتەتىنى ءسوزسىز. كورەرمەنگە لىق تولى زال, ءتۇرلى ەموتسيا, جاس تا, كارى دە قىزىعا تاماشالاعان ارتىستەر – سونىڭ دالەلى.
