تۋريزم يندۋسترياسى كوميتەتىنىڭ بۇگىنگى مالىمەتىنشە, 2023 جىلدىڭ العاشقى توقسانىندا ەلىمىزگە كەلگەن شەتەلدىك تۋريستەردىڭ سانى 2,3 ەسە ۇلعايدى. بيىلعى قاڭتار-ناۋرىز ارالىعىندا ەلىمىزگە 227,7 مىڭ شەتەلدىك تۋريست كەلگەن. بۇل بىلتىرعى سايكەس كەزەڭمەن سالىستىرعاندا 130 مىڭ ادامعا نەمەسە 2,3 ەسە كوپ. 2022 جىلى 97 مىڭ شەتەلدىك قوناق كەلگەن. سونىمەن قاتىر بيىل ىشكى ءتۋريزمنىڭ دە كورسەتكىشى 20%-عا ارتىپتى. ياعني بيىل 1 ملن 348 مىڭ ادام ەل ىشىندە ساياحاتتاعان.
«بىلتىر ەلىمىزگە 1 ملن-عا جۋىق شەتەلدىك تۋريست كەلدى. بيىل بۇل كورسەتكىش 1,4 ملن-عا دەيىن وسەدى دەپ جوسپارلانىپ وتىر. بۇل شەتەلدىك قوناقتاردىڭ ەلىمىزگە دەگەن قىزىعۋشىلىعىنىڭ ارتىپ كەلە جاتقانىن كورسەتەدى. ماسەلەن, جاز باستالعالى ەلىمىزگە كەلگەن شەتەلدىكتەر سانى 3 ەسە ارتتى», دەيدى تۋريزم يندۋسترياسى كوميتەتىنىڭ توراعاسى داستان رىسپەكوۆ.
تۋريزم – تابىس كوزى. قازىر الەم ەلدەرى اراسىندا تابىسىنىڭ توقسان پايىزىنان استامىن تۋريزمنەن تۇسكەن قاراجات قالىپتاستىراتىن ەلدەر جەتەرلىك. ماسەلەن, ەكونوميكاسى تۋريزمگە تاۋەلدى ەلدەردىڭ قاتارىندا گرەكيا, پورتۋگاليا, يسپانيا, يتاليا بار.
تۋريزم يندۋسترياسى كوميتەتىنىڭ مالىمەتىنشە, بۇل سالانى دامىتۋعا قاتىستى رەسپۋبليكانىڭ نەگىزگى 10 تۋرستانساسىندا ينفراقۇرىلىمداردى جاڭعىرتۋ, سەرۆيس ساپاسىن ارتتىرۋ, حالىقارالىق ارەنادا ەلىمىزدىڭ تۋريستىك الەۋەتىن ىلگەرىلەتۋ جانە ت.ب. شارالاردى ىسكە اسىرۋ كوزدەلگەن. اتاپ ايتقاندا, بالقاش, قاپشاعاي, الاكول جانە باياناۋىل كۋرورتتىق ايماقتارىنا اپاراتىن اۆتوجولدار سالۋ جانە دەمالىس ايماقتارىن موبيلدىك بايلانىسپەن 100% قامتۋ, بۋراباي كۋرورتتىق ايماعىندا قاجەتتى ينجەنەرلىك جەلىلەر جۇرگىزۋ, سۋ قويمالارىندا قوسىمشا سۋدا قۇتقارۋ ستانسالارىن سالۋ, ت.ب. ءىس-شارالار جوسپارلانعان. سونىمەن قاتار جاڭا اۋە باعىتتارىن اشۋ, تۋريستىك قىزمەتتەردى تسيفرلاندىرۋ, قوناقۇي بيزنەسىندە جانە سالانىڭ باسقا سەكتورلارىندا ستاندارتتاردى ارتتىرۋ جونىندە جۇمىس جۇرگىزىلمەك.
اتالعان مەكەمەنىڭ كوزدەگەن مەجەسى 2030 جىلعا دەيىن بارلىق شارانى ىسكە اسىرۋدىڭ ناتيجەسىندە ىشكى تۋريستەردىڭ سانىن 11 ملن ادامعا دەيىن, شەتەلدىك تۋريستەردى 4 ملن ادامعا دەيىن, سالادا جۇمىسپەن قامتۋدى 800 مىڭ ادامعا دەيىن ارتتىرۋ, سونداي-اق دۇنيەجۇزىلىك ەكونوميكالىق فورۋمنىڭ رەيتينگىسىنە سايكەس ءتۋريزمدى دامىتۋ بويىنشا قازاقستاندى الەمنىڭ ۇزدىك 50 ەلىنىڭ قاتارىنا قوسۋ بولىپ وتىر.
