بريفينگكە يدم قۇرىلىس جانە تۇرعىن ءۇي-كوممۋنالدىق شارۋاشىلىق ىستەرى كوميتەتىنىڭ, تسيفرلىق دامۋ, يننوۆاتسيالار جانە اەروعارىش ونەركاسىبى مينيسترلىگىنىڭ اقپاراتتىق قاۋىپسىزدىك كوميتەتىنىڭ, سونداي-اق استانا قالاسى اكىمدىگىنىڭ جانە «ۇلتتىق اقپاراتتىق تەحنولوگيالار» اق دەپارتامەنتىنىڭ وكىلى قاتىستى. ءباسپاسوز كونفەرەنتسياسىندا تۇرعىن ءۇي كەزەگىنىڭ ءبىر جۇيەگە كەلتىرىلىپ, زاڭمەن رەتتەلگەلى جاتقانى ءسوز بولدى. كونستيتۋتسياعا سايكەس ەلىمىزدە ازاماتتاردى تۇرعىن ۇيمەن قامتاماسىز ەتۋ ءۇشىن جاعدايلار جاسالعان. زاڭدا كورسەتىلگەن ساناتتاعى مۇقتاج ازاماتتارعا تۇرعىن ءۇي زاڭىمەن بەلگىلەنگەن نورمالارعا ساي مەملەكەتتىك تۇرعىن ءۇي قورلارىنان ولاردىڭ شاما-شارقى كوتەرەتىن اقىعا بەرىلەدى دەلىنگەن.
مەملەكەتتىك قوردان تۇرعىن ءۇيدى الۋدىڭ جالپى ءتارتىبى «تۇرعىن ءۇي قاتىناستارى تۋرالى» زاڭىمەن رەتتەلەدى. ماسەلەن, استانا, الماتى, شىمكەنت سىندى مەگاپوليستەردە تۇرعىن ءۇي كەزەگىنە ىلىگۋ ءۇشىن ءۇش جىلدىق تىركەلىمىڭىز بولۋى شارت. جالپى, مەملەكەت ەسەبىنەن باسپاناعا قول جەتكىزۋ ءۇشىن جاعدايىڭىز قويىلعان تالاپتار مەن ەرەجەلەرگە سايكەس بولۋى كەرەك. قازىرگى كۇنى قالا اكىمدىكتەرى جاساعان تۇرعىن ءۇي كەزەكتەرىنىڭ كوبى سول تالاپتار مەن ەرەجەلەرگە ساي كەلمەيدى. اتالعان كوميتەتتەر مەن مەملەكەتتىك ورگاندار وسى قاتەلىكتەردى تۇزەۋگە بەلسەنىپ وتىر. ناتيجەسى – تومەندەگىدەي.
قۇرىلىس جانە تۇرعىن ءۇي-كوممۋنالدىق شارۋاشىلىق ىستەرى كوميتەتى توراعاسىنىڭ ورىنباسارى ب.قابدول ايتقانداي, بۇگىندە تۇرعىن ءۇي كەزەگىندە 646 819 ازامات تۇر ەكەن. كەيىنگى جىلدارى ولاردىڭ قاتارى كۇن سايىن ۇلعايىپ كەلەدى. ايتالىق, كەيىنگى 10 جىلدا كەزەك 6 ەسە ارتىپتى.
«انىعىن ايتقاندا, حالىق تاراپىنان اتالعان كەزەككە باسپاناسى بار ازاماتتار تۇرىپ جاتقانى تۋرالى كوپتەگەن شاعىم ءتۇسىپ جاتىر. وسىعان بايلانىستى ءبىزدىڭ ۆەدومستۆو تسيفرلىق دامۋ, يننوۆاتسيالار جانە اەروعارىش ونەركاسىبى مينيسترلىگىمەن بىرلەسىپ, اتالعان ءتىزىمنىڭ زاڭ تالاپتارىنىڭ سايكەستىگىنە تالداۋ جۇرگىزدى. ونىڭ ناتيجەسىندە كەزەكتە تۇرعان 96,1 مىڭ ازاماتتىڭ كەيىنگى 5 جىلدا جەكە باسپاناسى بولعانى, 533 ادامدا قازاقستان ازاماتتىعى جوق ەكەنى, 91,4 مىڭداي ادامنىڭ تۇرعىلىقتى جەرى كەزەككە تىركەلگەن وڭىرمەن سايكەس كەلمەيتىنى, سونداي-اق 29 مىڭ ادامنىڭ سول مەكەنگە تىركەلمەگەنى جانە 15,6 مىڭ ادامنىڭ قايتىس بولىپ كەتكەنى انىقتالىپ وتىر», دەدى ب.قابدول.
دەمەك ءۇي كەزەگىندە تۇرعان 232 مىڭعا جۋىق ازاماتتىڭ جەكە دەرەكتەرى زاڭ تالاپتارىنا ساي بولماعاندىقتان, تىزىمنەن شىعارۋعا تۋرا كەلەدى. راسىندا اكىمدىكتەر سايكەس كەلمەيتىن ازاماتتاردى كەزەكتەن شىعارۋدى باستايدى. ناتيجەسىندە, ناعىز مۇقتاج جاندار كەزەككە تۇرادى. ءادىل قوعام قۇرۋ ءۇشىن شىنىمەن مۇقتاج ازاماتتارعا مەملەكەت تاراپىنان كومەك كورسەتۋ وتە ماڭىزدى. سوندىقتان باسپانا كەزەگىندە مۇقتاج ازاماتتار عانا تۇرۋى كەرەك.
نەگىزىندە ءادىل قوعام مەملەكەتتىڭ دە, ءاربىر ازاماتتىڭ دا ورتاق جاۋاپكەرشىلىگى مەن اشىقتىعى ارقىلى قالىپتاسادى. وسىلايشا, ءار ءىستى ىجداھاتپەن تۇگەندەۋ بارلىق ازاماتقا قاجەت. ال كەزەكتەن شىعارىلاتىن ازاماتتار مەملەكەت كومەگىنىڭ شىن مۇقتاج جاندارعا جەتۋى كەرەك ەكەنىن ءبىلۋى كەرەك.
«اتالعان ءتىزىمدى تۇگەندەۋ كەزەكتىڭ قوزعالۋ ۇدەرىسىن جەدەلدەتۋگە جانە راسىمەن دە باسپاناعا مۇقتاج ازاماتتاردىڭ قۇقىعىن كەز كەلگەن وعاش, تەرىس ارەكەتتەردەن قورعاۋعا مۇمكىندىك بەرەدى», دەپ ءسوزىن قورىتتى ب.قابدول.
