دەپۋتات ساپار بارىسىندا وڭىردەگى الەۋمەتتىك نىسانداردى جوندەۋ جۇمىستارىمەن تانىستى. سونىڭ اياسىندا ول №16 جۋالى كوللەدجىندە جانە «باۋىرجان مومىش ۇلى – بەرەكە-جۇرىمباي» باعىتىنداعى جولدا اتقارىلىپ جاتقان جۇمىسقا نازار اۋداردى. سونداي-اق ءۇش قاباتتى تۇرعىن ءۇيدىڭ قۇرىلىسىمەن تانىستى.
سونىمەن قاتار سەناتور اۋداندىق ءماسليحات دەپۋتاتتارىمەن كەزدەسىپ, وتكەن سەسسياداعى سەنات قىزمەتىنىڭ قورىتىندىلارى تۋرالى ايتىپ بەردى, جەرگىلىكتى جەردەگى ارىپتەستەرىن ىنتىماقتاسا جۇمىس ىستەۋگە شاقىردى.
«سەنات دەپۋتاتتارى ەل دامۋىنا تىكەلەي اسەر ەتەتىن اسا ماڭىزدى زاڭداردى قابىلداۋ ءۇشىن بەلسەندى جۇمىس ىستەپ كەلەدى. سونداي-اق ءبىز قابىلدانعان زاڭدارعا دا تۇزەتۋلەر ەنگىزۋ ىسىنە باسا ءمان بەرەمىز. بۇل رەتتە حالىقپەن كەرى بايلانىستىڭ ماڭىزدى ەكەنى ءسوزسىز. سول ءۇشىن دە شالعايداعى ەلدى مەكەندەردىڭ تۇرعىندارىمەن كەزدەسۋگە ۇلكەن كوڭىل ءبولىپ وتىرمىز. ءبىز بىرلەسكەن كۇش-جىگەردىڭ ارقاسىندا عانا ءتيىمدى جانە ادىلەتتى زاڭدار قابىلدايمىز», دەدى كەزدەسۋ بارىسىندا سەناتور بەكبولات ورىنبەكوۆ.
* * *
سەنات دەپۋتاتى عاۋەز نۇرمۇحامبەتوۆ «Kostanay Invest 2023» ينۆەستيتسيالىق فورۋمىنىڭ جۇمىسىنا قاتىسىپ, قوستاناي وبلىسىنىڭ ينۆەستيتسيالىق الەۋەتىن ارتتىرۋ ماسەلەلەرىنە نازار اۋداردى.
ءىس-شاراعا قاتىسۋشىلار قوستاناي وبلىسىنىڭ ينۆەستيتسيالىق الەۋەتىن كەڭەيتۋگە ىقپال ەتەتىن وندىرىستىك جانە الەۋمەتتىك سالاداعى جوبالارمەن تانىستى.
«وبلىس ەكونوميكاسىن ودان ءارى دامىتۋ ءۇشىن بەلسەندى تۇردە ينۆەستيتسيا تارتۋدىڭ ماڭىزى زور. وسى فورۋمدا كوپشىلىككە تانىستىرىلىپ وتىرعان جوبالاردى ىسكە اسىرۋ وڭدەۋ ونەركاسىبىنىڭ ۇلەسىن ارتتىراتىنى ءسوزسىز. بۇل ءوز كەزەگىندە ءوڭىردىڭ ەكونوميكالىق دامۋىنا تىڭ سەرپىن بەرەدى», دەدى عاۋەز نۇرمۇحامبەتوۆ.
سونىمەن قاتار سەناتور فورۋم بارىسىندا ايتىلعان بارلىق ۇسىنىس وڭدەۋ ونەركاسىبى سالاسىن رەتتەيتىن قولدانىستاعى زاڭنامانى ودان ءارى جەتىلدىرۋ كەزىندە ەسكەرىلەتىنىن جەتكىزدى.
* * *
سەناتور نۇرتورە ءجۇسىپ قىزىلوردا وبلىسى شيەلى اۋدانى №159 ورتا مەكتەپتىڭ ۇستازدارىمەن كەزدەستى.
كەزدەسۋدە ول ءبىلىم بەرۋگە, پەداگوگتەر مەن سالا قىزمەتكەرلەرىنىڭ الەۋمەتتىك كەپىلدىكتەرىن نىعايتۋعا جانە بالالاردى بۋللينگتەن قورعاۋعا قاتىستى پارلامەنت قابىلداعان زاڭدار تۋرالى ايتىپ بەردى.
دەپۋتات مەكتەپتىڭ ماتەريالدىق-تەحنيكالىق بازاسىمەن تانىسىپ, ءبىلىم ورداسىنداعى كىتاپحانانىڭ قورىنا نازار اۋداردى.
«كىتاپ – سارقىلماس دانالىقتىڭ قاينار كوزى. ءبىز اقىلدى جانە ءبىلىمدى ۇرپاقتى تاربيەلەۋ ءۇشىن كىتاپ وقۋعا دەگەن سۇيىسپەنشىلىكتى ارتتىرۋىمىز كەرەك. قازىرگى تاڭدا مەملەكەت ەل كىتاپحانالارىن ۇزدىك كىتاپتارمەن تولتىرا وتىرىپ, ساپالى ءبىلىم الۋعا بارلىق جاعدايدى جاساپ كەلەدى. بۇل باعىتتاعى جۇمىس ودان ءارى جالعاسا بەرەدى دەپ سەنەمىن», دەدى نۇرتورە ءجۇسىپ.
سەناتور كەزدەسۋ سوڭىندا مەكتەپ كىتاپحاناسىنا ءوزىنىڭ جەكە جيناعىنان 150 كىتاپ تارتۋ ەتتى.
