جۋىردا اقتوبە وبلىسىنا ىسساپارمەن بارعان پرەمەر-مينيستر ءاليحان سمايىلوۆقا وڭىردەگى اقپاراتتىق تەحنولوگيالار مەن يننوۆاتسيالاردى دامىتۋدا ماڭىزدى ءرول اتقاراتىن وڭىرلىك Aqtobe IT Hub تانىستىرىلدى. ۇكىمەت باسشىسى ايتقانداي, ءاربىر قالادا قالالىق جانە اۋىل جاستارىنىڭ تسيفرلىق تەحنولوگيالاردا ءبىلىم الۋعا جانە قابىلەتتەرىن دامىتۋعا مۇمكىندىك بەرەتىن ءىت-يندۋستريانى دامىتۋ ورتالىعى بولۋى كەرەك. ويتكەنى بۇلار بولاشاقتا ەكونوميكامىزدى تسيفرلاندىرۋدىڭ نەگىزى بولۋعا ءتيىس. تسيفرلىق تەحنولوگيالارسىز ودان ءارى دامۋ مۇمكىن ەمەس.
پرەمەر-مينيستر تسيفرلىق تەحنولوگيالار سالاسىن دامىتۋ ءۇشىن ەل استاناسىندا سالىقتىق جەڭىلدىكتەردى قاراستىراتىن جانە اكىمشىلىك راسىمدەردىڭ بارلىعىن جەڭىلدەتەتىن حالىقارالىق IT-حاب قۇرىلعانىن اتاپ ءوتتى. «قازىر ناتيجەسىن كورىپ وتىرمىز. بىلتىرعى جىلدىڭ قورىتىندىسى بويىنشا IT ونىمدەرى مەن قىزمەتتەرى ەسەبىنەن ەكسپورت 300 ملن دوللاردان اسا سومانى قۇرادى. بيىل بۇل سوما 500 ملن دوللاردى قۇراپ وتىر. ەكى-ءۇش جىلدىڭ ىشىندە 1 ملرد دوللارعا جەتەدى دەپ كۇتىلۋدە. سوندىقتان بۇل تاجىريبەنى تاراتۋ ماڭىزدى», دەدى ول.
تسيفرلىق دامۋ, يننوۆاتسيالار جانە اەروعارىش ونەركاسىبى ءمينيسترى باعدات ءمۋسيننىڭ ايتۋىنشا, وڭىرلەردىڭ جۇمىس تاجىريبەسى قازىردەن وڭ ناتيجە كورسەتىپ وتىر. ماسەلەن, حابتاردا يدەيالارى مەن ستارتاپتارى بار جاس جانە تالانتتى كاسىپكەرلەر ەرتە كەزەڭدە تاربيەلەنەدى. ولار وقۋدان كەيىن Astana Hub-تىڭ وزىندە ودان ءارى وسۋگە, ماسشتابتاۋعا جانە اكسەلەراتسيادان وتۋگە, سونداي-اق شەتەلدەگى ارىپتەستىك بيزنەس-باعدارلامالارعا قاتىسۋعا مۇمكىندىك الادى.
وڭىرلىك حابتار يننوۆاتسيالىق جوبالاردى دامىتۋمەن, IT-سالاسى كادرلارىن دايارلاۋمەن جانە وقىتۋمەن اينالىسادى. سونداي-اق قىزىعۋشىلىق بىلدىرگەن جاندار باس قوساتىن ستارتاپتاردىڭ, ينۆەستورلاردىڭ, مەنتورلاردىڭ جەرگىلىكتى IT-قاۋىمداستىعىن قۇرايدى. ينكۋباتسيالىق كەزەڭدە ستارتاپ-جوبالاردى ازىرلەۋ كەزىندە كاسىپكەرلىككە وقىتۋ, ينۆەستيتسيالار تارتۋعا كومەكتەسۋ, قارجىلىق ەسەپ جۇرگىزۋ جانە PR-قولداۋ جۇزەگە اسىرىلادى.
– وڭىرلىك IT-حابتاردى دامىتۋ – Astana Hub-تىڭ باستى مىندەتتەرىنىڭ ءبىرى. ءبىز بيىل ەل بويىنشا 14 وڭىرلىك IT-حاب اشۋدى ماقسات ەتىپ وتىرمىز. بۇگىنگى تاڭدا Aqtobe IT Hub-تان بولەك 8 وڭىرلىك حاب تابىستى جۇمىس ىستەپ جاتىر. ولاردىڭ قاتارىندا Abai IT Valley, Kyzylorda Hub, Digital Jetisu, Zhambyl Hub, Oskemen IT Hub, Jaiq Hub, Turkistan IT Hub جانە Qostanai IT Hub بار, – دەيدى Astana Hub-تىڭ باسقارۋشى ديرەكتورى الينا ءابدىراحمانوۆا.
