بۇگىندە ءوڭىردىڭ ونەركاسىپ سالاسىندا 838 كاسىپورىن جۇمىس ىستەيدى, ال جۇمىسپەن قامتىلعاندار سانى 43 مىڭ ادامدى قۇرايدى. بيىلعى 7 ايدىڭ قورىتىندىسىنا سايكەس وبلىستا وندىرىلگەن ءونىم كولەمى 510 ملرد تەڭگەگە (+7,8%) جەتتى. بۇل رەتتە وبلىستا وڭدەۋ ونەركاسىبى جاقسى دامىعان, ونىڭ جالپى كولەمىندەگى ۇلەسى 72%-عا دەيىن جەتەدى. اتاپ ايتقاندا, مينەرالدى تىڭايتقىشتار وندىرىسىندە 3,2 ەسە, قانت وندىرۋدە – 8,9%, ىرىمشىك پەن سۇزبەدە – 5,9%, اياق كيىم وندىرىسىندە – 20,2% ءوسىم بايقالادى. وڭدەۋ ونەركاسىبىندەگى حيميا ونەركاسىبىنىڭ ۇلەسى بۇگىندە 49%-دان اسادى.
وسىلايشا, «ەۆروحيم» كومپانياسى اۋقىمدى ينۆەستيتسيالىق جوبانىڭ ءبىرىنشى كەزەڭىن جۇزەگە اسىردى: تاۋ-كەن كەشەنىنىڭ بازاسىندا جىلىنا 660 مىڭ تونناعا دەيىن فوسفوريتتەر ءوندىرۋ جولعا قويىلدى, قۋاتتىلىعى جىلىنا 640 مىڭ توننا ورتاشا ۇساقتاۋ جانە ۇساق ۇنتاقتاۋ قوندىرعىسى سالىندى. ينۆەستيتسيا كولەمى $126 ملن-دى قۇرادى.
ەكىنشى كەزەڭ شەڭبەرىندە مينەرالدى تىڭايتقىشتار شىعاراتىن حيميا كەشەنىنىڭ قۇرىلىسى باستالدى. وندىرىستىك قۋاتتىلىعى جىلىنا كەمىندە 1 ملن توننانى قۇرايدى. ەكىنشى كەزەڭدى جۇزەگە اسىرۋ $1 ملرد-تان استام تىكەلەي شەتەلدىك ينۆەستيتسيا تارتۋعا جانە 1200 جاڭا جۇمىس ورنىن اشۋعا مۇمكىندىك بەرەدى.
پرەمەر-مينيستر ۇكىمەتتىڭ حيميا ونەركاسىبىندەگى جوبالاردى جۇزەگە اسىرۋعا ۇلكەن كوڭىل ءبولىپ وتىرعانىن, سوندىقتان جاڭا ءىرى زاۋىتتىڭ ءوڭىردىڭ عانا ەمەس, جالپى رەسپۋبليكانىڭ دامۋى ءۇشىن دە ماڭىزى زور ەكەنىن باسا ايتتى.
«بۇل جوبانى ىسكە قوسۋ اۋىل شارۋاشىلىعى سالاسىنىڭ قاجەتتى مينەرالدى تىڭايتقىشتارعا دەگەن سۇرانىسىن ءتيىستى دەڭگەيدە قامتاماسىز ەتەدى جانە قوسىمشا جۇمىس ورىندارىن اشۋعا مۇمكىندىك بەرەدى. سوندىقتان ىشكى جانە سىرتقى نارىقتا سۇرانىسقا يە ءونىمدى تەزىرەك شىعارۋ ءۇشىن زاۋىتتى ۋاقتىلى ىسكە قوسۋدىڭ ماڭىزى زور», دەدى ءاليحان سمايىلوۆ.
سونداي-اق ول قازىرگى تاڭدا مەملەكەت تىڭايتقىشتاردى قولدانۋ اياسىن كەڭەيتۋ بويىنشا شارۋالارعا بەرىلەتىن سۋبسيديا كولەمىن ارتتىرىپ جاتقانىن جەتكىزدى. ناتيجەسىندە بۇل اۋىل شارۋاشىلىعىنداعى ونىمدىلىكتى ايتارلىقتاي ارتتىرادى.
مۇندا ۇكىمەت باسشىسىنا «ەۆروحيم» جانە «شۋ» اۆتوماتتاندىرىلعان گاز تاراتۋ ستانسالارى قۇرىلىسىنىڭ بارىسى جايلى اقپارات بەرىلدى. بۇل سارىسۋ جانە شۋ اۋداندارىنىڭ 32 ەلدى مەكەنىن (61,7 مىڭ ادام), «ەۆروحيم-قاراتاۋ» جشس-نىڭ جاڭا حيميالىق كەشەنىن جانە مويىنقۇم اۋدانىنىڭ 24 ەلدى مەكەنىن (28,7 مىڭ ادام) گازبەن قامتۋعا مۇمكىندىك بەرەدى.
ءارى قاراي ءاليحان سمايىلوۆ شۋ اۋدانىندا ورنالاسقان «تاراز حيميالىق پاركى» ارنايى ەكونوميكالىق ايماعىنىڭ قىزمەتىمەن تانىستى. سونىمەن قاتار پرەمەر-مينيسترگە «TAS Market» جشس-نىڭ ونەركاسىپتىك كرەمني, گرافيت ەلەكترودتارى, پوليكرەمني جانە كۇن باتارەيالارى ءوندىرىسى جولعا قويىلعان كرەمني كلاستەرىن قۇرۋ جونىندەگى ينۆەستيتسيالىق جوباسى تانىستىرىلدى.
سونداي-اق «Qazaq Soda» جشس جۇزەگە اسىرىپ جاتقان ەلىمىزدەگى كالتسيلەندىرىلگەن سودا شىعاراتىن العاشقى زاۋىت قۇرىلىسىنىڭ جوباسى تانىستىرىلدى. كاسىپورىن 2025 جىلى پايدالانۋعا بەرىلەدى, ونىڭ وندىرىستىك قۋاتى جىلىنا 500 مىڭ توننا ءونىمدى قۇريدى, الداعى ۋاقىتتا 1,2 ملن تونناعا دەيىن جەتكىزىلمەك. «بيزنەستىڭ جول كارتاسى – 2025» مەملەكەتتىك باعدارلاماسى اياسىندا نىسانعا ەلەكتر جەلىلەرى تارتىلدى, سونىمەن قاتار سۋ قۇبىرىن تارتۋ جانە تەمىرجول ينفراقۇرىلىمىن جابدىقتاۋ جوسپارلانىپ وتىر.
ء«بىز بۇل جوبالاردى قولدايمىز جانە جەتىسپەيتىن ينفراقۇرىلىمدى تارتۋ بويىنشا جۇمىستاردى جالعاستىراتىن بولامىز. مۇنى ءبىر جىل ىشىندە ىسكە اسىرۋعا بولادى. يندۋستريا مينيسترلىگى مەن قتج-عا ءتيىستى تاپسىرما بەرەمىن», دەپ تۇيىندەدى ءسوزىن ءاليحان سمايىلوۆ.
