جوسپار مەملەكەت باسشىسىنىڭ تاپسىرمالارىن ىسكە اسىرۋ ماقساتىندا ازىرلەندى جانە الەۋمەتتىك قامسىزداندىرۋدىڭ نەگىزگى ماسەلەلەرىن شەشۋگە, سونداي-اق حالىقتىڭ ءومىر ءسۇرۋ ساپاسىن ارتتىرۋعا باعىتتالعان.
قۇجاتتا دەنساۋلىق ساقتاۋ, ءبىلىم بەرۋ, سپورت نىساندارىنىڭ قۇرىلىسى, ينجەنەرلىك ينفراقۇرىلىمدى قايتا جاڭعىرتۋ, ەكونوميكانىڭ ناقتى سەكتورىن, ونەركاسىپتى, اوك, شاعىن جانە ورتا بيزنەستى دامىتۋ, حالىقتى جۇمىسپەن قامتۋ, ت.ب. بويىنشا 83 شارا كورسەتىلگەن.
2027 جىلعا دەيىن جوسپاردى ىسكە اسىرۋعا شامامەن 107 ملرد تەڭگە ءبولۋ جوسپارلانعان, ونىڭ ىشىندە 62 ملرد تەڭگەدەن استامى جەكە ينۆەستيتسيالار ەسەبىنەن بولماق. شىعىنداردىڭ باسىم بولىگىنە (58,3 ملرد تەڭگە) تىرشىلىكتى قامتاماسىز ەتەتىن ينفراقۇرىلىمدى دامىتۋ جانە توزۋىن ازايتۋ (23 جوبا) قاراستىرىلعان. اتاپ ايتقاندا, جەكە ينۆەستيتسيالار ەسەبىنەن جىلۋ ەلەكتر ورتالىعىن كۇردەلى جوندەۋدەن وتكىزۋ جوسپارلانعان.
جوسپارعا سايكەس, 2027 جىلعا قاراي قالادا ونەركاسىپتىك ءوندىرىس كولەمى 550 ملرد تەڭگە دەڭگەيىندە قامتاماسىز ەتىلسە, وڭدەۋشى سەكتور ءونىمى كەمىندە 70% بولماق. جالپى, اۋىل شارۋاشىلىعى ءونىمىنىڭ كولەمى 10%-عا ارتادى.
قۇجاتتا جۇمىسپەن قامتۋ ماسەلەسى, اسىرەسە جاستاردى جۇمىسپەن قامتۋعا جانە كاسىپورىندارداعى كادر تاپشىلىعى ماسەلەسىن شەشۋگە ەرەكشە كوڭىل بولىنگەن. دەنساۋلىق ساقتاۋ سالاسىندا مەديتسينالىق كوللەدج اشۋ ارقىلى كادرلىق الەۋەتتى ارتتىرۋ جوسپارلانعان. سونداي-اق كورسەتىلەتىن مەديتسينالىق قىزمەتتىڭ جاقسارۋىنا ورتالىق قالالىق اۋرۋحانانى كۇردەلى جوندەۋدەن وتكىزۋ جانە تەحنيكالىق جابدىقتاۋ اسەر ەتپەك.
سونىمەن قاتار ەكولوگيالىق پروبلەمالاردى شەشۋ شارالارى جوسپارلانعان. اتاپ ايتقاندا, اتموسفەراعا لاستاۋشى زاتتاردىڭ شىعارىندىلارىن ازايتۋ (9,8 مىڭ تونناعا دەيىن), ونەركاسىپتىك كاسىپورىنداردىڭ قورشاعان ورتانى قورعاۋ بويىنشا مىندەتتەمەلەرىن ورىنداۋدا جاۋاپكەرشىلىگىن ارتتىرۋ شارالارى بار. ال جاقسى جانە قاناعاتتانارلىق جاعدايداعى جولدار ۇلەسىن بەلگىلەنگەن مەرزىمگە دەيىن 74%-دان 90%-عا ارتتىرۋ جوسپارلانعان.
ستەپنوگور قالاسى مەن وعان ىرگەلەس ايماقتاردىڭ اۋماعى – 290 مىڭ گەكتاردان اسادى, حالىق سانى – 68,5 مىڭ ادام. قالا اكىمشىلىگىنە ءبىر اۋىلدىق وكرۋگ جانە 9 ەلدى مەكەن – 4 كەنت, 5 اۋىل كىرەدى. ونەركاسىپ سالاسى – قالا ەكونوميكاسىنىڭ درايۆەرى. اقمولا وبلىسىنىڭ ونەركاسىپ وندىرىسىندەگى ستەپنوگور قالاسىنىڭ ۇلەسى – 25,3%.
