جىل سايىن حروم كەنىن مايدالاۋ پروتسەسىندە ءدوڭ تاۋ-كەن بايىتۋ كومبيناتىندا شامامەن 900 مىڭ توننا شلام جينالادى. قازىرگى ۋاقىتتا جالپى كولەمى 14,5 ملن توننانى قۇرايتىن ونىڭ قۇرامىندا 35%-عا دەيىن حروم وكسيدى بار. وزىق ستاندارتتار بويىنشا تەحنولوگيالىق جانە اۆتوماتتاندىرىلعان بايىتۋ فابريكاسى شلامداردان گراۆيتاتسيالىق ادىسپەن حروم وكسيدىن الۋعا مۇمكىندىك بەرەدى. الىنعان تاۋار كونتسەنتراتىندا كەم دەگەندە 48,5% حروم وكسيدى بولادى. جالپى جاڭا كاسىپورىن جۇمىس ىستەپ تۇرعان وندىرىستەردىڭ قالدىقتارىن جانە بۇرىننان جينالىپ كەلگەن شلامدى جىلىنا شامامەن 1,7 ملن توننا كولەمىندە قايتا وڭدەپ وتىرۋعا مۇمكىندىك بەرەدى.
اقتوبە وبلىسىنىڭ اكىمى ەرالى توعجانوۆتىڭ ايتۋىنشا, زاۋىت – ءوندىرىستىڭ تيىمدىلىگىن ارتتىرۋعا جانە ءوڭىردىڭ ەكولوگيالىق ءال-اۋقاتىن جاقسارتۋعا باعىتتالعان بۇرىننان جينالعان شلامداردى قايتا وڭدەۋ جونىندەگى اۋقىمدى باعدارلامانىڭ نەگىزگى جوبالارىنىڭ ءبىرى.
سونىمەن قاتار پرەمەر-مينيستر زاۋىتتىڭ جەرگىلىكتى ەكولوگيانى جاقسارۋعا ايتارلىقتاي ۇلەس قوساتىنىن اتاپ ءوتتى.
«بۇل جوبانىڭ ماڭىزى زور. ەڭ باستىسى – قايتا وڭدەۋدەن كەيىن قالدىقتاردىڭ قويمالارىن قورشاعان ورتاعا جانە حالىقتىڭ دەنساۋلىعىنا زيان كەلتىرمەيتىندەي ەتىپ, بارلىق ەكولوگيالىق ستاندارتقا سايكەس قالپىنا كەلتىرۋ قاجەت. ۇكىمەت وسى جانە باسقا دا شيكىزاتتى قايتا وڭدەۋ جوبالارىنا جان-جاقتى قولداۋ كورسەتەتىن بولادى», دەدى ءاليحان سمايىلوۆ.
